ខេត្តសៀមរាប ៖និស្សិតនាយទាហានសកម្មជំនាន់ទី១៦សែនជ័យ ចំនួន១០៩នាក់ មានវត្តមានក្នុងពិធីសច្ចាប្រណិធាន នៅលើទីតាំងក្តាបែននៃប្រាសាទអង្គរវត្ត ។ ពិធីនេះ បានរៀបចំឡើងនាព្រឹកថ្ងៃទី១៧ ខែមករា ឆ្នាំ២០១៦ ក្រោមការអញ្ជើញចូលរួមជាអធិបតី ដោយឯកឧត្តមឧត្តមសេនីយឯក ហ៊ុន ម៉ាណែត នាយរងសេនាធិការចម្រុះនៃកងយោធពលខេមរភូមិន្ទ ។
បើតាមសេចក្តីរាយការណ៍របស់ឧត្តមសេនីយ៍ ប្រធានសាលានាយទាហានសកម្ម បានឲ្យដឹងថា ជាទូទៅនៅក្នុងកម្មវិធីសិក្សារបស់និស្សិតនាយទាហានសកម្មរយៈពេល៤ឆ្នាំ មុនពេលបញ្ចប់វគ្គសិក្សាហ្វឹកហ្វឺន តែងតែមានកម្មវិធីពិសេសមួយ ដែលហៅថា ពិធីសច្ចាប្រណិធាន ក្នុងន័យពញ្ញាក់ស្មារតីរបស់និស្សិតនាយទាហានសកម្ម ឲ្យមានភាពស្មោះត្រង់ សាមគ្គីភាព ការពារប្រជាជន ការពារជាតិ សាសនា ព្រះមហាក្សត្រ ក្នុងពេលបំពេញភារកិច្ច នៅតាមបណ្តាអង្គភាពនានា ក្នុងជួរនៃកងយោធពលខេមរភូមិន្ទ ។
ឧត្តមសេនីយ៍ឯក ហ៊ុន ម៉ាណែត នាយរងសេនាធិការចម្រុះនៃកងយោធពលខេមរភូមិន្ទ បានថ្លែងនូវការអបរអរសាទរ ចំពោះជោគជ័យរបស់និស្សិតនាយទាហានសកម្មជំនាន់ទី១៦សែនជ័យ ក្រោមការខិតខំប្រឹងប្រែង អំណត់ តស៊ូ ឆ្លងកាត់វគ្គសិក្សានិងហ្វឹកហ្វឺនជិត៤ឆ្នាំកន្លងមក ។ ជាមួយនោះដែរ ឯកឧត្តមក៏បានសម្តែងនូវការកោតសរសើរដោយស្មោះ ចំពោះនិស្សិតទាំងអស់ ដែលមានសេចក្តីក្លាហាន និងមនសិកាសេ្នហាជាតិខ្ពស់ ស័្មគ្រចិត្តចូលបំរើក្នុងជួរកងយោធពលខេមរភូមិន្ទ ។
គួររំលឹកឡើងវិញដែរថា ៖ របាយការណ៍របស់សាលានាយទាហានសកម្ម បានបញ្ជាក់ថា ៖ នៅក្នុងឆ្នាំទី៤ ( ឆ្នាំ២០១៥ – ២០១៦ ) នៃឆ្នាំបញ្ចប់វគ្គសិក្សាហ្វឹកហ្វឺនរបស់និស្សិតនាយទាហានសកម្មជំនាន់ទី១៦សែនជ័យ គឺមានលក្ខណៈតានតឺងនិងសកម្មជាងបណ្តាឆ្នាំកន្លងមក ព្រោះនិស្សិតទាំងអស់ត្រូវបានហ្វឹកហ្វឺនអន្តរាវុធតាមបណ្តាកងឯកភាពនានាដូចជា ៖ កាំភ្លើងធំ រថក្រោះ ការពារអាកាស សិក្សាស្វែងយល់យុទ្ធវិធី ថ្នាក់វរសេនាតូចថ្មើរជើង ចុះអនុវត្តដកពិសោធន៍ជាក់ស្តែង នៅតាមបណ្តោយខ្សែបន្ទាត់ព្រំដែនកម្ពុជាថៃ សិក្សាស្រាវជ្រាវ និង សរសេរសារណាប្រឡងបញ្ចប់វគ្គ ហើយបើតាមការគ្រោងទុករបស់សាលា វគ្គជំនាន់ទី១៦នេះ នឹងត្រូបិទបញ្ចប់វគ្គជាផ្លូវការ នៅថ្ងៃទី០៤ ខែកុម្ភៈ ឆ្នាំ២០១៦ ខាងមុខ ៕
ប៊ុនធឿន (សៀមរាប)
