រាជធានីភ្នំពេញ ៖ រាជរដ្ឋាភិបាលកម្ពុជា នឹងចំណាយថវិកាប្រមាណ៥០០លានរៀលសម្រាប់ប្រតិបត្តិការចុះបង្ក្រាបឈ្មួញដែលជាឧកញ៉ារកស៊ីឈើនៅក្នុងខេត្តត្បូងឃ្មុំនិងក្រចេះ។
លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានថ្លែងថា រាជរដ្ឋាភិបាលពិតជាបានត្រៀមថវិកាប្រមាណ៥០០លានរៀលប្រាកដមែន ដើម្បីបង្ក្រាបបទល្មើសព្រៃឈើនៅខេត្តត្បូងឃ្មុំនិងក្រចេះ ។ ប៉ុន្តែថវិកានោះមិនទាន់មកដល់ដៃគណៈកម្មាការយើងនៅឡើយទេ ។ លោកបន្តថា ក្នុងប្រតិបត្តិការនេះ យើងនឹងប្រើប្រាស់កំលាំងសរុបទាំងអស់៣៦០នាក់ មានទាំងនគរបាលជាតិ១២០នាក់ កងរាជអាវុធហត្ថ១២០នាក់ និងកងទ័ពពិសេសឆ័ត្រយោង៩១១ចំនួន១២០ ដែលភាគច្រើនគឺកំលាំងនៅក្នុង ខេត្តផ្ទាល់តែម្តង។ លោកបន្តថា សម្តេច ហ៊ុន សែន បានប្រគល់ឧទ្ធម្ភាគចក្រ ២គ្រឿង សម្រាប់ប្រតិបត្តិការនេះផងដែរ ។
អាជ្ញាធរបានចុះបង្ក្រាបឃ្លាំងស្តុកឈើពីរកន្លែងរបស់លោកឧកញ៉ាមេឈ្មួញឈើ លឹម ប៊ុណ្ណា ហៅខ្នា គ្រាដែលប្រតិបត្ដិការនោះមានការចូលរួមពីស្ថាប័នជាច្រើនក្នុងនោះរួមមាននគរបាលស្រុកកងរាជអាវុធហត្ថ និងមន្ត្រីរដ្ឋបាលព្រៃឈើ ។
ទាក់ទិនករណីនេះ ក្រុមមន្ត្រីបាននិយាយថា ពួកគេនៅតែមិនទាន់អាចវាយតម្លៃពីទំហំនៃការបង្ក្រាបហើយមិនអាចចេញផ្សាយសេចក្តីលម្អិតណាមួយបានទេ ហើយខាងអាជ្ញាធរក៏មិនទាន់កំណត់ថាតើឈើទាំងនោះត្រូវបានគេកាប់ដោយខុសច្បាប់ឬយ៉ាងណាទេ។
គួរបញ្ជាក់ថា សម្តេចនាយករដ្ឋមន្ត្រីបានប្រគល់ភារកិច្ចនេះឲ្យលោក សៅ សុខា មេបញ្ជាការកងរាជអាវុធហត្ថលើផ្ទៃប្រទេសក្នុងការដឹកនាំគណៈកម្មការបង្ក្រាបការរត់ពន្ធឈើខុសច្បាប់ឆ្លងកាត់ព្រំដែនចូលទៅក្នុងប្រទេសវៀតណាម ហើយមុខសញ្ញាដែលត្រូវបង្ក្រាបមុនគេគឺលោកឧកញ៉ា សឹង្ហ សំអុល និងលោក លីម ប៊ុណ្ណា ហៅខ្នា ។
ទន្ទឹមប្រតិបត្តិការនោះកាលពីម្សិលមិញទាហាន និងនគរបាលរាប់រយនាក់ក៏បានស៊ើបអង្កេតលើដីសម្បទានក្នុងខេត្តក្រចេះនៅជិតព្រំប្រទល់ខេត្តមណ្ឌលគិរីផងដែរ គ្រាដែលលោក មេបញ្ជាការកងរាជអាវុធហត្ថខេត្តក្រចេះបានបញ្ជាក់ថា កងកម្លាំងបានរឹបអូសយកបានឈើរាប់ពាន់ដុំលើដីសម្បទានដែលកាន់កាប់ដោយក្រុមហ៊ុនចិនមួយ ប៉ុន្តែលោកមិនបានបញ្ចេញក្រុមហ៊ុននោះទេ ។
នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេសនិងជាប្រធានគណៈកម្មការជាតិដើម្បីទប់ស្កាត់និងបង្ក្រាបបទល្មើសព្រៃឈើ បាននិងកំពុងចេញដំណើរ ទៅខេត្តត្បូងឃ្មុំ និងក្រចេះ ដើម្បីត្រួតពិនិត្យបញ្ហាផ្សេងៗ ទាក់ទងទៅនឹងការនាំចេញឈើខុសច្បាប់ ទៅប្រទេសវៀតណាម។ នេះបើយោងតាមតាមការឲ្យដឹងពី លោក អេង ហ៊ី អ្នកនាំពាក្យ កងរាជអាវុធហត្ថលើផ្ទៃប្រទេស បានថ្លែងថា នៅរសៀលថ្ងៃទី១៨ ខែមករា ឆ្នាំ២០១៦នេះ ។
តាមសារព័ត៌មានក្នុងស្រុកមួយបានលើកយកការអះអាងរបស់លោក អេង ហ៊ី ដោយបញ្ជាក់ថា នាយឧត្តមសេនីយ៍ សៅ សុខា និងសមាជិកមួយចំនួន បានធ្វើដំណើរតាមឧទ្ធម្គាចក្រ ដើម្បីគឺចុះទៅពិនិត្យខេត្តត្បូងឃ្មុំ និងក្រចេះទៅលើគំនរឈើ ដែលនៅសេសសល់ ដើម្បីផ្ទៀងផ្ទាត់គ្នា ហើយឲ្យជំនាញវាស់វែងឲ្យរួចរាល់មុនថ្ងៃទី២០ មករាខាងមុខ។
យ៉ាងណាក៏ដោយ តាមព័ត៌មានទទួលបានក្រុមហ៊ុនចិនមួយនោះឈ្មោះ តុង មិន ហើយបើទោះបីជាសមត្ថកិច្ចមិនហ៊ានប្រាប់អំពីឈ្មោះក្រុមហ៊ុន តុង មិន នោះ ប៉ុន្តែគេដឹងថា ក្រុមហ៊ុននោះត្រូវបានមេការធំរបស់លោកឧកញ៉ា ទ្រី ភាព យកមកធ្វើជាបង្អែក ដើម្បីស្តុកឈើទុកសម្រាប់នាំចេញទៅវៀតណាម ៕
