មន្រ្តីជាន់ខ្ពស់នគរបាលជាតិ លើកបង្ហាញពី សមិទ្ធផលការងារ និងសុច្ឆន្ទៈ នៃការប្រើប្រាស់ បទពិសោធន៍សម្រាប់អនុវត្តបន្ត

ខេត្តបាត់ដំបង៖ នៅក្នុងពិធីប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្តរសក្តិ ដល់មន្រ្តីនគរបាល ជាតិ នៅស្នងការដ្ឋាននគរបាលខេត្តបាត់ដំបងចំនួន៥២៩នាក់ នារសៀលថ្ងៃទី១៣ ខែមករា ឆ្នាំ២០១៦នេះ ឯកឧត្តមនាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ និងជាមេបញ្ជាការនគរបាលជាតិ ប្រចាំទិសភូមិភាគទី៤ និងទី៥ បានថ្លែងថា ៖ ជោគជ័យការងារគ្រប់ផ្នែកគ្រប់ជំនាញ គឺបានមកពីការខិតខំ ប្រឹងប្រែងបំពេញភារកិច្ចរួមគ្នានៃកងកម្លាំងនគរបាលជាតិ ក្រោមកិច្ចកិច្ចសហការជាមួយអង្គភាព-ស្ថាប័នពាក់ ព័ន្ធ អាជ្ញាធរដែនដីគ្រប់លំដាប់ថ្នាក់ រួមទាំងការចូលរួមពីសំណាក់ប្រជាពលរដ្ឋផងដែរ ទាំងនេះអាចកត់ ត្រាទុកជាការចងចាំបាន ក៏ប៉ុន្តែអ្វីដែលកាន់ប្រសើរជាងនេះ គឺសុឆន្ទៈនៃការប្រើប្រាស់បទពិសោធន៍ កសាងផែនការសម្រាប់ការអនុវត្តបន្ត ប្រកបដោយប្រសិទ្ធភាព ។

នាយឧត្តមសេនីយ៍ ខេង សុមេធ បានឆក់យកឱកាសនោះ ដើម្បីលើកទឹកចិត្តដល់មន្រ្តីនគរបាលជាតិផង និងត្រូវបានប្រើប្រាស់ឱកាសនោះ ជាវេទិកាឆ្លុះបង្ហាញអំពីបទពិសោធន៍ការងារកន្លងមក ដើម្បីរៀបចំការ តម្រង់ ទិស លុបបំបាត់ភាពអសកម្មនានា ក្នុងជួរកងកម្លាំងនគរបាលជាតិ ។ ឯកឧត្តមបញ្ជាក់ថា ភាពអសកម្មវាគឺជា ជម្ងឺដែលត្រូវតែព្យាបាល បើមិនដូច្នោះទេ វានឹងអាចក្លាយជាហេតុបច្ច័យច្រើនណាស់ រាំងស្ទះដល់ការរីកចម្រើននៃសង្គមជាតិ ។

ឯកឧត្តម ឆ្លុះបង្ហាញថា ៖ ឆន្ទៈ គឺប្រៀបបានដូចជាមុខអាវុធ បើមិនសំលៀងគឺមិនមុតនោះទេ ហើយដុំដែក បើមិនលត់គឺមិនមានគុណភាពរឹងមាំនោះឡើយ ។ ឯកឧត្តមបន្តថា ៖ បើទោះជានៅក្នុងសង្គមណាក៏ដោយ បញ្ហាប្រឈមនានា វានៅតែបង្កកើតឡើងជាដរាប ដូច្នោះហើយ ទើបបណ្តាប្រទេសទាំងអស់លើពិភពលោក ត្រូវបានបង្កើតច្បាប់ ដើម្បីការពារសុវត្ថិភាពសង្គម សើសពីនេះ បញ្ហានៅត្រង់ថា មន្រ្តីអនុវត្តច្បាប់ ត្រូវបានក្លាយជាជនគំរូ ទើបច្បាប់មានប្រសិទ្ធភាពក្នុងការអនុវត្ត ។

ឯកឧត្តម ច័ន្ទ សុផល អភិបាលខេត្តបាត់ដំបង គូសបញ្ជាក់បន្ថែមថា ៖ យុទ្ធសាស្រ្តចតុកោណ ដំណាក់ កាលទី៣របស់រាជរដ្ឋាភិបាលកម្ពុជា គឺមានចំណុចជាច្រើនដែលពាក់ព័ន្ធដល់វិស័យសេវានគរបាលកិច្ច ដូចជា ការងារបង្ការ-បង្ក្រាបបទល្មើស ការងារគ្រប់គ្រងជនអន្តោប្រវេសន៍ ការងារគ្រប់គ្រងប្រជាពលរដ្ឋតាមមូលដ្ឋាន ការងារផ្តល់អត្តសញ្ញាណប័ណ្ណសញ្ជាតិខ្មែរជូនប្រជាពលរដ្ឋ ការងារកាត់បន្ថយប្រឈមគ្រោះថ្នាក់ ចរាចរណ៍ ផ្លូវគោក ការងាររក្សាសន្តិសុខ និងសហការតាមបន្ទាត់ព្រំដែនជាដើម ។ ឯកឧត្តមបន្តថា ៖ ដើម្បីអនុវត្តការងារ ទាំងនេះបានសម្រេច និងល្អប្រសើរ កម្លាំងនគរបាល ត្រូវតែជាកម្លាំងនគរបាលរៀបរយពិតប្រាកដ ដោយផ្អែក លើកត្តា៣ជាសំខាន់ គឺទី១-ការគោរពវិន័យ , ទី២-សមត្ថភាពការងារមានវិជ្ជាជីវៈច្បាស់លាស់ និង ទី៣ – ចេះច្បាប់ព្រមជាមួយការអនុវត្តច្បាប់បានត្រឹមត្រូវ ៕
ប៊ុនធឿន (សៀមរាប)