អគ្គីភ័យលេបត្របាក់ផ្ទះ០២ខ្នង សម្លាប់មនុស្សម្នាក់ និងទ្រព្យសម្បត្តិ នៅក្នុងផ្ទះនោះទាំងស្រុង

ខេត្តសៀមរាប៖នៅវេលាម៉ោង១២និង៣០នាទី រំលងអាធ្រាតថ្ងៃទី០១ ឈានចូលថ្ងៃទី០២ ខែមករា ឆ្នាំ២០១៦កន្លងមក នេះ អគ្គីភ័យមួយបានលេបត្របាក់យកផ្ទះ១ខ្នង ដែលមានបន្ទប់ជួល០៥បន្ទប់បណ្តាលឲ្យខូចខាតទាំងស្រុង និងបាន សម្លាប់មនុស្សម្នាក់ផងដែរ ហេតុការណ៍ខាងលើ បានកើតឡើងនៅចំណុចខាងក្រោយផ្សារ CTM ស្ថិតក្នុងភូមិមណ្ឌល០៣(បី) សង្កាត់ស្លក្រាម ក្រុងសៀមរាប ។

តាមការសន្និដ្ឋានជាបឋមរបស់សម្ថកិច្ចបានឲ្យដឹងថា អគ្គីភ័យនេះគឺកើតឡើងដោយសារការឆ្លងចរន្តអគ្គីសនី ដែលបណ្តាលមកពីអ្នកប្រើប្រាស់មិនមានការប្រុងប្រយ័ត្ន ហើយស្រ្តីជនរងគ្រោះបាត់បង់ជីវិតនោះមានឈ្មោះ ផង់ គឹមព្រម អាយុប្រមាណជា ជិត៤០ឆ្នាំ មានកូនម្នាក់ និង ប្តីធ្វើ ការជាសន្តិសុខ យាមនៅមន្ទីរពេទ្យនៅ ក្នុងក្រុងសៀមរាប តែមិនដឹងថាជាមន្ទីរពេទ្យណាមួយនោះទេ ។
ចំពោះសាក្សីនៅកន្លែងកើតហេតុ ក៏បាននិយាយស្រដៀងគ្នានេះដែរថា ការរាលដាលនៃអគ្គីភ័យនេះ គឺចេញពី ខ្ទមជនរងគ្រោះដែលអគ្គីភ័យបានលេបត្របាក់យកជីវិតនោះតែម្តង ។

សម្ថកិច្ចបានបញ្ជាក់ថា នៅក្នុងព្រឹត្តិហេតុអគ្គីភ័យលេបត្របាក់នេះ បើពិនិត្យជារួមចំពោះ លំនៅដ្ឋាននោះមាន ការខូចខាតស្ទើរទាំងស្រុង ក្នុងនោះ មានម៉ូតូ០៧គ្រឿង កង់(ទោចក្រយាន)០២គ្រឿង ទូរទស្សន៍០៥គ្រឿង សម្ភារប្រើ ប្រាស់ក្នុងផ្ទះ និងគ្រឿងសង្ហារឹម ព្រមទាំងលុយប្រមាណជា ៧ពាន់ដុល្លា ត្រូវឆេះកម្ទេចក្នុងព្រឹត្តិហេតុអគ្គីភ័យនោះ ។
ម្ចាស់ផ្ទះ ដែលអគ្គីភ័យលេបត្របាក់នោះមានឈ្មោះ អ៊ុំ យន្តវុទ្ធី អាយុ៤៨ឆ្នាំ ជាមន្រ្តីយោធា និងភរិយា ឈ្មោះ សំណាង វណ្ណៈ អាយុ៤០ឆ្នាំ មានកូន៧នាក់ ។

នៅក្នុងព្រឹត្តិហេតុនេះដែរ មានរថយន្តពន្លត់អគ្គីភ័យរបស់អង្គភាពកងរាជអាវុធហត្ថខេត្តចំនួន ០៣គ្រឿង និង រថយន្តរបស់អង្គភាពពន្លត់អគ្គីភ័យរបស់ស្នងការដ្ឋាននគរបាលខេត្ត០១គ្រឿង អន្តរាគមន៍ អស់រយៈពេល ជាង០២ម៉ោង ទើបអាចគ្រប់គ្រងស្ថានភាព និងបញ្ចប់ហេតុការណ៍នោះ បានទាំងស្រុង ។
គួរបញ្ជាក់ដែរថា នៅក្នុងភូមិសាស្ត្រដែលកើតគ្រោះអគ្គីភ័យនោះ គឺមានសំណង់ផ្ទះប្រជាជនជាប់ៗគ្នាជាច្រើន ពិសេសគឺសំណង់បន្ទប់ជួល ដែលជាហេតុអាចរីករាលដាលនៃគ្រោះថ្នាក់អគ្គីភ័យ ហើយផ្លូវចូលក៏តូចចង្អៀតទៀត ដែលជាប្រការធ្វើឲ្យមានការលំបាកដល់ក្រុមសមត្ថកិច្ច ចូលជួយធ្វើអន្តរាគមន៍ ពន្លត់អគ្គីភ័យនោះ ផងដែរ ៕ ប៊ុនធឿន (សៀមរាប)