ខេត្តកោះកុង ៖ ប្រជាពលរដ្ឋ បានធ្វើការរិះគន់យ៉ាងខ្លាំងចំពោះតំណាងរាស្ត្រមួយរូប មកពីគណបក្សប្រជាជន ប្រចាំខេត្តកោះកុង ដែលធ្វើមិនដឹងឲ្យមន្ត្រីការិយាល័យតំណាងរាស្ត្រខេត្តបើកបនល្បែងខុសច្បាប់ក្នុងសួនសត្វខេត្តកោះកុងបំពុលបរិយាកាស បណ្តាលឲ្យកើតមានសកម្មភាពចោរលួចចោរប្លន់កើតមានជាបន្តបន្ទាប់ ជាន់ឈ្លីគោលការណ៍ភូមិឃុំមានសុវត្តិភាពរបស់ក្រសួងមហាផ្ទៃ។
ប្រភពបានឲ្យដឹងថា មានមន្ត្រីការិយាល័យតំណាងរាស្ត្រខេត្តកោះកុងមួយរូប ឈ្មោះ ជា លាងហេង បានទៅជួលដីក្នុងបរិវេណសួនសត្វកោះកុង ស្ថិតក្នុងភូមិចាំយាម ឃុំប៉ាក់ខ្លង់ ស្រុកមណ្ឌលសីមា តំលៃមួយខែប្រមាណ៣០លានរៀល ដើម្បីបើកបនល្បែងគ្រប់ប្រភេទ ដោយជ្រកក្រោមច្បាប់អនុញ្ញាតិ ឲ្យបើកកាស៊ីណូរបស់ក្រុមហ៊ុន ឧកញ៉ា លី យ៉ុងផាត់ ។
រហូតមកដល់ពេលនេះ បនល្បែងក្នុងសួនសត្វកោះកុង កាន់តែមានឈ្មោះល្បី និងពង្រីកធំឡើង ដោយមានប្រជាជនខ្មែរ ចូលលេងយ៉ាងអាណាធិបតេយ្យ ពុំមានសមត្ថកិច្ចណាចុះបង្ក្រាបឡើយ ព្រោះតែ ខ្លាចអំណាចមន្ត្រីការិយាល័យតំណាងរាស្ត្រ ដែលយកស្បែកខ្លាមកពាក់។
ប្រជាពលរដ្ឋស្លូតត្រង់បានអះអាងថា តាំងពីពេលមាន បនល្បែងខុសច្បាប់កាលណាមក ស្រុកភូមិកើតមានចោរលួចចោរប្លន់ ពេញបន្ទុកក្នុងខេត្តកោះកុង ដោយសារបនល្បែង ដែលជារបស់មន្ត្រីការិយាល័យតំណាងរាស្ត្របង្កើត ព្រោះថា ទាំងមន្ត្រីរាជការ រួមទាំងកងកម្លាំង និងប្រជាពលរដ្ឋមួយភាគធំក្នុងខេត្តនេះលែងខ្វល់រឿងការងារ ហើយចូលលេងល្បែងយ៉ាងងុបងល់ ។
ប្រជាពលរដ្ឋបានលើកឡើងថា តំណាងរាស្ត្រខេត្តកោះកុង ជាតំណាងរាស្ត្ររបស់គណបក្សប្រជាជនកម្ពុជា ដូច្នេះពេលដែល មន្ត្រីការិយាល័យតំណាងរាស្ត្រ ប្រព្រឹត្តិអំពើអសកម្មខុសច្បាប់នាំ ឲ្យប្រជាពលរដ្ឋ ក្តៅក្រហាយនោះ វាប្រាកដណាស់ នឹងត្រូវជះឥទ្ធិពលអាក្រក់ធ្លាក់លើ ថ្នាក់ដឹកនាំរបស់គណបក្សដែលកាន់ អំណាចជាមិនខាន។
ប្រជាពលរដ្ឋទាមទារឲ្យតំណាងរាស្ត្រខេត្តកោះកុង ចាត់វិធានការលើមន្ត្រីការិយាល័យខាងលើនេះជាបន្ទាន់ ប្រសិនបើចង់រក្សាសន្លឹកឆ្នោតសម្រាប់អាណត្តក្រោយ ព្រោះថាសមត្ថកិច្ចនិងអាជ្ញាធរគ្រប់ថ្នាក់ មានចិត្តស្ទាក់ស្ទើមិនហ៊ានបង្ក្រាបបនល្បែងមួយនេះទេ ព្រោះបនល្បែងនេះ អាងស្បែកតំណាងរាស្ត្រក្រាស់ណាស់ ។
យើងព្យាយាមសុំការបំភ្លឺ ពីឯកឧត្តម អាយ ខន តំណាងរាស្ត្រកោះកុងមកពីគណបក្សប្រជាជនកម្ពុជា ប៉ុន្តែមិនអាចទំនាក់ទំនងបាននៅឡើយ តែនឹងព្យាយាមនៅពេលក្រោយ ៕
