ខេត្តបន្ទាយមានជ័យ ៖ លោកវវរ:សេនីយ៍ត្រី អ៉ុំ សុផល អធិការនគរបាលក្រុងប៉ោយប៉ែត នៅព្រឹកថ្ងៃទី៣១ ខែធ្នូ ឆ្នាំ២០១៥នេះ បានដឹកនាំមន្រ្តីក្រោមឱវាទ ប្រារព្ធពិធីបួងសួង ដល់បុណ្យបារមី លោកយាយម៉ៅ លោកតាក្រហម-ក កុមារពេជ្រ ដើម្បីសុំសេចក្តីសុខ ដល់អ្នកដំណើរ ឆ្លងកាត់ទៅមក តាមដងផ្លូវជាតិលេខ៥ ក៏ដូចជាបួងសួងសុំសេចក្តីសុខ សេចក្តីចម្រើន ជូនប្រជាពលរដ្ឋ ដែលរស់នៅ ទូទាំងក្រុងប៉ោយប៉ែត ដោយក្នុងពិធីនោះ មានការនិមន្តអញ្ជើញ ចូលរួមពីព្រះសង្ឃ ចំនួន២៣អង្គ មកពី២៣វត្ត ក្នុងក្រុងប៉ោយប៉ែត រួមទាំងអាជ្ញាធរ សមត្ថកិច្ច មន្រ្តីរាជការ អ្នកមុខអ្នកការ គ្រប់លំដាប់ថ្នាក់ និងប្រជាពលរដ្ឋ ជាច្រើននាក់ ផងដែរ ។
ពិធីនេះត្រូវបានប្រារព្ធធ្វើឡើង នៅតាមបណ្តោយផ្លូវជាតិលេខ៥ ចំណុចដើមពោធិ៍យាយម៉ៅ ស្ថិតក្នុងភូមិអណ្តូងថ្មមាស សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ។ ក្នុងពិធីបួងសួងសុំសេចក្តីសុខ ដល់អ្នកដំណើរនៅព្រឹកនេះ គេសង្គេតឃើញមាន ការប្រគុំបទភ្លេងពិណពាទ្យ យ៉ាងពិរោះរណ្តំ ដែលធ្វើឲ្យកម្មពិធីនេះ កាន់តែអធិកអធម និងមានភាពសប្បាយរីករាយ ក្រៃលែង ។
គួរបញ្ជាក់ថា ការប្រារព្ធពិធីនេះ គឺធ្វើឡើងដើម្បីបួងសួង ដល់បុណ្យបារមី លោកយាយម៉ៅ លោកតាក្រហម-ក កុមារពេជ្រ សូមឲ្យលោក ជួយថែរក្សា ដល់អ្នកដំណើរ ក្នុងក្រុងប៉ោយប៉ែត ខេត្តបន្ទាយមានជ័យ និងខេត្តដទៃទៀត រួមទាំងអ្នកទេសចរណ៍ជាតិ និងអន្តរជាតិ ដែលធ្វើដំណើរចេញចូល ឆ្លងកាត់ទៅមក តាមផ្លូវជាតិលេខ៥ទាំងអស់ ឲ្យជួបតែសុខសុវត្ថិភាព គ្រប់ពេលវេលា គ្រប់ទីកន្លែង ។
ប្រភពបានឲ្យដឹងថា ការប្រារព្ធពិធីនេះ គឺតែងតែធ្វើឡើង ជារៀងរាល់ដំណាច់ឆ្នាំ មិនដែលអាក់ខានឆ្នាំណាឡើយ ។ នៅចុងបញ្ចប់នៃពិធីបួងសួង សុំសេចក្តីដល់អ្នកដំណើរនៅព្រឹកនេះ លោកវវរ:សេនីយ៍ត្រី អ៉ុំ សុផល អធិការនគរបាល ក្រុងប៉ោយប៉ែត រួមទាំង សមត្ថកិច្ច មន្រ្តីរាជការ អ្នកមុខអ្នកការ គ្រប់លំដាប់ថ្នាក់ និងប្រជារដ្ឋពលរដ្ឋទាំងអស់ នឹងរៀបចំធ្វើពិធីរាប់បាត្រ រួមគ្នា ដើម្បីជាកិច្ចបង្ហើយ នៃកម្មវិធី ៕
