ខេត្តសៀមរាប៖ថ្ងៃអាទិត្យ ១០កើត ខែមិគសិរ ឆ្នាំមមែ សប្តស័ក ពស ២៥៥៩ ត្រូវនឹងថ្ងៃទី២០ ខែធ្នូ គស ២០១៥ នៅក្នុងតំបន់លានជល់ដំរី ខាងជើងប្រាសាទបាយ័ន្ត (សៀមរាប) នៃ ព្រះរាជាណាចក្រកម្ពុជា បានប្រារព្ធឡើង នូវព្រឹត្តិការណ៍សាសនាដ៏ធំមិនធ្លាប់មាន នោះគឺពិធីបុណ្យមហាសង្ឃទាន រាប់បាត្រប្រគេនព្រះសង្ឃ ៤៥០០ អង្គ និងបូជាប្រទីបថ្វាយព្រះរតនត្រៃយ៏ ។ កម្មវិធីបុណ្យនេះ ផ្តើមរៀបចំឡើងដោយ មជ្ឈមណ្ឌលវប្បធម៌ ព្រះពុទ្ធ សាសនាកម្ពុជា សហការជាមួយស្ថាប័នពាក់ព័ន្ធជាច្រើនទៀត ។
ពិធីនេះគឺមានវត្តមានលោកជំទាវបណ្ឌិត ម៉ែន សំអន ឧបនាយករដ្ឋមន្រ្តី រដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច ជាតំណាងខ្ពង់ ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុនរ៉ានី-ហ៊ុនសែន ។
គោលបំណង នៃការប្រារព្ធពិធីបុណ្យដ៏ធំនេះ គឺដើម្បីឧទ្ទឹសមហាកុសលដល់បុព្វមហាបុរសខ្មែរក្នុងអតីតកាល ជាពិសេស គឺឧទ្ទឹសព្រះរាជមហាកុសលថ្វាយនិងជូន បុព្វមហាបុរសខ្មែរនាសម័យមហានគរ ឧទ្ទឹសថ្វាយទេវតា និងវត្ថុស័ក្តិសិទ្ធិ ដែលថែរក្សាព្រះរាជាណាចក្រកម្ពុជា ព្រមជាមួយនិងការឧទ្ទឹសមហាកុសល ជូនមាតាបិតា និង ញាតិក្នុងសង្សារវដ្ត ផ្សព្វផ្សាយនិងលើកតម្កើងព្រះពុទ្ធសាសនាពង្រឹងសាមគ្គីភាព និងសាបព្រោះនូវវប្បធម៌ សន្តិភាព ក្នុងរង្វង់នៃមហាគ្រួសារខ្មែរ បណ្តុះនិងពង្រឹងស្មារតីនៃការដឹងគុណ ការគោរពគុណ និងការស្រឡាញ់គុណធម៌ ។
ខ្លឹមសារនៃបុណ្យនេះ គឺបានប្រារព្ធឡើង ជាលក្ខណៈបុណ្យកតញ្ញូ កតវេទី ជាបុណ្យទំនៀមទម្លាប់ ជា ប្រពៃណីតាំងពីបូរាណកាលតរៀងមក ដែលប្រជាជនខ្មែរតែងតែប្រារព្ធធ្វើ នៅពេលទំនេរពីការងារកសិកម្ម ក្នុង គោលដៅ និងមានអត្ថប្រយោជន៍ ដូចជា ៖ បានសម្តែងនូវភាវៈជាកុលបុត្រ កុលធីតា ដែលដើរតាមគន្លងធម៌ ដ៏ល្អរបស់ឪពុកម្តាយ ជាការសណ្តោសអនុគ្រោះដល់ញាតិមិត្ត បងប្អូនភូមិផងរបងជាមួយគ្នា និង ដើម្បីបាន បូជាចំពោះព្រះរតនត្រៃ ប្រគេនចង្ហាន់ចំពោះព្រះសង្ឃ ! ដែលរាប់បញ្ចូលថា ជាការឧបត្ថម្ភដល់ព្រះពុទ្ធសាសនា និងជាការសន្សំបុណ្យកុសលផងដែរ ។
នៅក្នុងអត្ថន័យជាសារវ័ន្ត ដែលមានខ្លឹមសារជាប្រវត្តិសាស្រ្ត តាមរយៈនៃពិធីបុណ្យនេះ គឺបានកោះ អញ្ជើញប្រកាសអំពាវនាវ និងបួងសួងដល់ព្រលឹងបុព្វការីជនខ្មែរក្នុងប្រវត្តិសាស្រ្តទាំងអស់គ្រប់ជំនាន់ ។ តាមអត្ថន័យនេះព្រលឹងបុព្វមហាបុរសខ្មែរ ដែលពោរពេញដោយឧត្តមគតិ និងមនសិការស្នេហាជាតិ កំពូល មានប្រាជ្ញា និងការច្នៃប្រឌិតខ្ពស់ក្នុងនិម្មាបនកម្មអរិយធម៌អង្គរដ៏រុងរឿង នឹងត្រូវបានគោរព អារតនានិមន្ត យាង និងអញ្ជើញ មកប្រតិស្ថានក្នុងព្រលឹងស្មារតី សាច់ឈាមកុលបុត្រ-កុលធីតាខ្មែរជំនាន់ក្រោយនេះ ដោយបុព្វ ហេតុជួយជ្រោមជ្រែង កសាងប្រទេសជាតិ បានរុងរឿង សុខដុមរមនា និងស្ថិតស្ថិរចិរកាល តរៀងទៅ ។
ពិធីនេះមានមហាកិត្តិយស ដ៏ឧត្តុងឧត្តមប្រសើរខ្លាំងណាស់ ដោយមានព្រះវត្តមាន សម្តេចព្រះមហា សង្ឃរាជាធិបតី ទេព វង្ស សម្តេចមហាសង្ឃរាជ គណមហានិកាយនៃព្រះរាជាណាចក្រ សម្តេចព្រះព្រហ្ម វជីរញ្ញាណ ប្រាក់ស៊ីត ស៊ុតធីផាន់ ព្រះសង្ឃនាយករងទី៣ ព្រះរាជតំណាងដ៏ខ្ពង់ខ្ពស់ សម្តេចព្រះមហាសង្ឃរាជ នៃព្រះរាជាណាចក្រថៃ បានយាងចូលរួម ។
លោកជំទាវ ឧបនាយករដ្ឋមន្រី្ត ម៉ែន សំអន មានប្រសាសន៍ថា ៖ ព្រឹត្តិការណ៍នេះ ពិតជាបានផ្តល់ឱកាស ដល់ពុទ្ធសាសនិកជន និងពុទ្ធសាសនូបត្ថម្ភក៍ ជិតឆ្ងាយ បានចូលរួមធ្វើបុណ្យមហាសង្ឃទានដ៏ធំ ដែលនេះ គឺ ជាការឆ្លុះបញ្ចាំងឲ្យឃើញកម្លាំងមហាសាមគ្គីភាពក្នុងសង្គមកម្ពុជាទាំងមូល ! ហើយពិធីនេះក៏ជាឱកាសបង្កើន សេចក្តីគោរពស្រឡាញ់គ្នាទៅវិញទៅមក រួមចំណែកកាត់បន្ថយ និងលុបបំបាត់អំពើជាអកុសល និងអំពើហឹង្សា ផងទាំងពួងក្នុងសង្គម និងឈោងចាប់យកសុខសន្តិភាព រួមជាមួយសុខុមាលភាពទាំងផ្លូវកាយនិងផ្លូវចិត្ត ដែលធ្វើឲ្យសង្គមជាតិកាន់តែមានការអភិវឌ្ឍន៍ ប្រកបដោយសេចក្តីសុខក្សេមក្សាន្ត ។ ពិធីបុណ្យសាសនាដ៏សំខាន់មួយនេះ នឹងបានចូលរួមលើកស្ទួយវិស័យព្រះពុទ្ធសាសនា ឲ្យកាន់តែរីកចម្រើន ទូលំទូលាយឡើង ដើម្បីបុព្វហេតុសន្តិភាព ស្ថិរភាពសុខដុមរមនា និងការអភិវឌ្ឍន៍សង្គម សេដ្ឋកិច្ច ប្រកបដោយចិរភាព ៕
