រាជធានីភ្នំពេញ៖លោកសួនសេរីរដ្ឋាប្រធានគណបក្សអំណាចខ្មែរបានអះអាងថាលោកនឹងដាក់ពាក្យប្តឹងឧបនាយករដ្ឋមន្ត្រីហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នៅថ្ងៃចន្ទ សប្តាហ៍ក្រោយនេះ ដោយទាមទារសំណងជំងឺចិត្ត ៥០០លានរៀល ជុំវិញការបរិហារកេរ្តិ៍លើគណបក្សអំណាចខ្មែរ នៅក្នុងសន្និសិទកាសែតនៅថ្ងៃទី១៨ធ្នូ២០១៥។
លោក សួន សេរីរដ្ឋា បានអះអាងបន្ថែមថា សំណងជំងឺចិត្តនេះ លោកនឹងយកទៅធ្វើកិច្ចការមនុស្សធម៌ ដោយឧបត្ថម្ភថវិកាទាំង អស់ទៅដល់មន្ទីរពេទ្យគន្ធបុប្ផាតែម្តង។
គម្រោងប្តឹងលោកឧបនាយករដ្ឋមន្ត្រី ហោ ណាំហុង ពីសំណាក់លោក សួន សេរីរដ្ឋា បានធ្វើឡើងក្រោយពេលលោកឧបនាយករដ្ឋមន្ត្រី បានហៅលោក សួន សេរីរដ្ឋា និងបក្ខពួកថាជា «ក្រុមភេរវកម្ម» កាលពីថ្ងៃទី៧ ខែធ្នូ ឆ្នាំ២០១៥ ក្នុងជំនួបជាមួយឯកអគ្គរដ្ឋទូតអាមេរិក។
ចំណែក មេធាវីរបស់លោកឧបនាយករដ្ឋមន្ត្រី ហោ ណាំហុង គឺលោក កា សាវុត្ថ បានឲ្យបណ្តាញព័តមានដឹងថាលោកសម្តែងការស្វាគមន៍ បើសិនជា លោក សួន សេរីរដ្ឋា សម្រេចប្តឹងអំពីរឿងនេះមែន។ បើពិនិត្យមើលផ្លូវច្បាប់ លោក ហោ ណាំហុង នឹងមិនមានទោសនោះទេ ដោយសារតែលោកនិយាយទៅតាមសាលក្រម និងសាលដីការរបស់តុលាការ ដែលសម្រេចឱ្យលោកសួន សេរីរដ្ឋា និង បក្ខពួក ៣នាក់ ជាទណ្ឌិតក្នុងទោសក្បត់ជាតិ មុនពេលព្រះមហាក្សត្រលើកលែងទោស។
មុននេះបន្តិច លោកឧបនាយករដ្ឋមន្រ្តី ហោ ណាំហុងបានសើរើបណ្តឹងចំពោះលោក សម រង្សី បណ្តាលឲ្យមេបក្សប្រឆាំងរបូតអភ័យឯកសិទ្ធតំណាងរាស្ត្រនិងត្រូវនិរទេសខ្លួន អីលូវឯកឧត្តម ហោ ណាំហុងត្រូវលោកសួន សេរីរដ្ឋាប្តឹងវិញ តែអ្នកវិភាគរំពឹងថាធ្វើមិនបែកទេ នេះហើយរឿងនយោបាយស្រុកខ្មែរ៕
