រាជធានីភ្នំពេញ៖នៅក្នុងពិធីផ្សព្វផ្សាយពីការបញ្ជ្រាបទស្សនទាន សីលធម៌ សាសនា ដើម្បីសុដុមនីយកម្មនៅកម្ពុជា នៅកោះពេជ្រ កាលពីថ្ងៃទី១៤ ខែធ្នូ ឆ្នាំ២០១៥ សម្តេចនាយករដ្ឋមន្ត្រី ហ៊ុន សែន បានបញ្ជាឱ្យសមត្ថកិច្ចទូទាំងប្រទេស បង្កើនការវាយបង្ក្រាប ក្រុមចោរប្លន់ប្រដាប់អាវុធបន្ថែមទៀត បន្ទាប់ពីមានករណីប្លន់ប្រដាប់អាវុធ ចំនួន៣លើកក្នុងថ្ងៃតែមួយ នៅខេត្តបាត់ដំបង ពោធិ៍សាត់ និងខេត្តកណ្តាល កាលពីថ្ងៃសៅរ៍សប្តាហ៍មុន។
ទន្ទឹមនឹងនេះសម្តេចតេជោ ក៏បានក្រើនរំលឹកដល់ក្រសួងយុត្តិធម៌ កុំឱ្យដាក់សំណើរសុំការលើកលែងទោសដល់ ទណ្ឌិតក្នុងបទល្មើសប្លន់ប្រដាប់អាវុធ បន្ទាប់ពីសម្តេច ទទួលបានរបាយការណ៍ថា អតីតទណ្ឌិតដែលធ្លាប់ជាប់ពន្ធនាគារ បានប្រព្រឹត្តអំពើប្លន់ឡើងវិញ នាថ្មីៗកន្លងទៅនេះ។
បន្ទាប់ពីមានបទបញ្ជារបស់សម្តេចតេជោ លោក អង្គ វង្ស វឌ្ឍានា រដ្ឋមន្ត្រីក្រសួងយុត្តិធម៌ បានបង្គាប់ឱ្យព្រះអាជ្ញាទូទាំងប្រទេស ដាក់វិធានការឱ្យបានម៉ឺងម៉ាត់បំផុតចំពោះជនល្មើសលួច ឆក់ ប្លន់ នៅក្នុងប្រទេសកម្ពុជា មានដូចជាស្នើឱ្យតុលាការផ្តន្ទាទោសព្រហ្មទណ្ឌ ក្នុងកម្រិតអតិបរមាជាដើម ទៅដល់ជនពាក់ព័ន្ធ ក្នុងករណីនេះជាដើម។
លោក កើត រិទ្ធរដ្ឋលេខាធិការក្រសួងយុត្តិធ៍ម បានប្រាប់ក្រុមអ្នកសារព័ត៌មាន បន្ទាប់ពីក្រសួងយុត្តិធម៌បើកកិច្ចប្រជុំជាមួយព្រះរាជអាជ្ញាទូទាំងប្រទេស នៅព្រឹកថ្ងៃទី១៨ ខែធ្នូ ឆ្នាំ២០១៥ថា «ក្រៅពីធ្វើការណែនាំដល់ ព្រះរាជអាជ្ញាទូទាំងប្រទេស ឱ្យបង្កើនកិច្ចសហការស្អិតរមួតជាមួយនឹង មន្ត្រីនគរបាលយុត្តិធម៌ ខាងនគរបាលជាតិ ក៏ដូចជាកងរាជអាវុធហត្ថ លោករដ្ឋមន្ត្រី បានណែនាំឱ្យពិនិត្យឡើងវិញ នៅរាល់សំណុំរឿងទាំងឡាយ ដែលកំពុងតែចាត់ការ ដោយតំណាងអយ្យការតុលាការ ដោយធ្វើយ៉ាងម៉េចជំរុញកិច្ចការនេះ ឱ្យបានឆាប់រហ័ស ហើយអនុវត្តប្រកបដោយស្មារតី ទទួលខុសត្រូវខ្ពស់ គឺអនុវត្តដោយម៉ឺងម៉ាត់ និងម៉ត់ចត់»។
នៅក្នុងច្បាប់មានចែង ទោស អប្បបរមាមាន អតិបរមា មាន អ្វីៗ អញ្ចឹងយើងចង់បានជាពិសេសផ្អែកលើស្ថានភាពនេះ យើងចង់ស្នើសុំឱ្យអយ្យកាពង្រឹងការ អនុវត្តម៉ឺងម៉ាត់ មានន័យថាសុំយកអតិបរមាតែម្តង គឺយើងចង់បានអញ្ចឹង នេះគឺជាអ្វីដែលពួកគាត់ ត្រូវយកចិត្តទុកដាក់។
ទណ្ឌិតមិនមានសិទ្ធិ នៅក្នុងការស្នើលើកលែងទោសនោះទេ។ ការលើកលែងទោសអាស្រ័យលើ ឥរិយាបទរបស់ទណ្ឌិត បើទោះបីជាពួកគេអនុវត្តទោស១ភាគ៣ ឬ២ភាគ៣ក៏ដោយ។ នៅពេលអនុវត្តទោស១ភាគ៣ ឬ២ភាគ៣ មិនមែនជាសិទ្ធិរបស់គាត់ ដែលទាមទារឱ្យលើកលែងទោស នោះទេ គឺអាស្រ័យលើឥរិយាបទ ។ បទល្មើសមួយចំនួន មិនមែនជាកម្មវត្ថុ ក្នុងការដាក់ស្នើឱ្យព្រះមហាក្សត្រ លើកលែងទោសនោះទេ ដូចជាករណីប្លន់ប្រដាប់អាវុធ»។
ទោះជាយ៉ាងណា ករណីលើកលែងទោសនេះ ក្រសួងយុត្តិធម៌នឹងពិភាក្សា បន្ថែមទៀតជាមួយ នាយកដ្ឋានពន្ធាគារ នៅពេលខាងមុខ។ករណីប្លន់ប្រដាប់អាវុធនាពេលថ្មីនេះបណ្តាលឲ្យប្រជាពលរដ្ឋនិងនាយករដ្ឋមន្រ្តីមានការព្រួយបារម្មណ៏៕
