បន្ទាយមានជ័យ៖ថ្មីៗនេះគេសង្កេតឃើញមានផ្ទុះឡើង នូវអំពើឆក់ប្លន់ប្រជាពលរដ្ឋ តាមបណ្តាខេត្តក្រុងមួយចំនួននៃប្រទេសកម្ពុជាជាក់ស្តែងកាលពីថ្ងៃទី១២ខែធ្នូឆ្នាំ២០១៥កន្លងទៅនេះក្រុមចោរប្រដាប់អាវុធមួយក្រុមបានធើ្វសកម្មភាពប្លន់នៅកណ្តាលក្រុងបាត់ដំបងតែម្តង បង្កឲ្យប្រជាពលរដ្ឋមាន ការភ័យខ្លាចនិងបារម្ភអំពីអសន្តិសុខសុវត្ថិភាពផ្ទាល់ខ្លួន។
កង្វល់នេះទទួលបានការចាប់អារម្មណ៍ពីសម្តេចតេជោនាយករដ្ឋមន្ត្រី ហើយកាលពីថ្ងៃទី១៤ធ្នូឆ្នាំ២០១៥ សម្តេចបានបញ្ជារឲ្យសមត្តកិច្ចអាជ្ញាធរគ្រប់លំដាប់ថ្នាក់ មានចំណាត់ការបង្ក្រាបនិងទប់ស្កាត់ករណីនេះ ដើម្បីធានាសវត្ថិភាពជូនប្រជាពលរដ្ឋ ។
ដោយឡែកសង្វៀនជល់មាន់ មួយកន្លែង កំពុងតែបើកលេង យ៉ាងរលូន ដោយជ្រកក្រោមកាស៊ីណូបើកថ្មី ក្នុងទឹកដីកម្ពុជា ដែលមានទីតាំងទល់មុខ ស្នាក់ការគយនិងរដ្ឋាករប៉ោយប៉ែត ស្ថិតក្នុងភូមិប៉ោយប៉ែត សង្កាត់ប៉ោយប៉ែត បើកប្រជល់យ៉ាងគគ្រឹកគគ្រេង ទាំងថ្ងៃទាំងយប់ដោយគ្មានកោតក្រែង រអែងច្បាប់ ទំលាប់អ្វីឡើយ ។
យោងតាមប្រភពព័ត៍មានបានឱ្យដឹងថាម្ចាស់កាស៊ីណូដែលបង្កប់ល្បែងប្រជល់មាន់នៅខាងក្នុង មានឈ្មោះភួន ផេង ចំណែកឈ្មោះ កែវ រតនាជាមេការមើលការខុសត្រូវ នៅទីនោះ ដោយពួកគេអនុញ្ញាតិ អោយជនជាតិ ខ្មែរចូលលេងកំសាន្ត ភ្នាល់លុយ យ៉ាងសប្បាយ រីករាយ ចំណែកជនបរទេសមិនចេះលេងទេ។
ប្រភពបន្តទៀតថា ចាប់ពីព្រលឹមប្រមាណ ម៉ោង១០ រហូតដល់ ម៉ោង ជិតដប់យប់ ជារៀងរាល់ថ្ងៃ ក្រុមមេបនល្បែងនិងអ្នកញៀនល្បែង ជាជនជាតិខ្មែរ បាននាំគ្នា សំរុកចូលភ្នាល់ល្បែង ប្រជល់ មាន់ លេងសុទ្ឋតែដៃធំៗមានដើមផាន់ធំចាប់ ពី២ម៉ឺនបាតឡើងទៅ ដល់១០ម៉ឺនបាត (ប្រាក់ថៃ) ឬលើសនេះទៀត ក៏មាន។
ប្រជាពលរដ្ឋនាំគ្នាឆ្ងល់ថាល្បែងប្រជល់មាន់នៅក្នុងកាស៊ីណូបើកថ្មីមានតែខ្មែរចូលលេងដែលជាប្រភពនៃអំពើឧក្រិដ្ឋហេត្ុដូចម្តេចក៏អាជ្ញាធរឲ្យច្បាប់។
មិនអាចសុំការបំភ្លឺពី សមត្ថកិច្ចដែលពាក់ជុំវិញក្រុងប៉ោយប៉ែតនិងខេត្តបន្ទាយមានជ័យបានទេតែនឹងព្យាយាមសុំការបំភ្លឺនៅពេលក្រោយ៕
