ខេត្តសៀមរាប៖ យ៉ាងហោចណាស់មានសិស្សប្រុសស្រី ថ្នាក់ទី៩ និងថ្នាក់ទី១១ នៅវិទ្យាល័យគោកដូង ប្រមាណជាង៣៥នាក់ បានឈឺក្បាលហើយអង្គុយទ្រហ៊ោយំតៗគ្នាពីមួយទៅមួយ ខណៈពេលដែលពួកគេចេញលេង ចេះតែនាំគ្នាយកដៃ ខ្ទប់មុខហើយស្រែកយំ ដោយមិនដឹងមូលហេតុ ។
ក្នុងព្រឹត្តការណ៍ចម្លែកមិនធ្លាប់មាននេះ កើតឡើងតាំងពីថ្ងៃទី ១១ និងថ្ងៃទី១៥ ធ្នូ ២០១៥ នៅវិទ្យាល័យ គោកដូង ស្ថិតក្នុងភូមិគោកត្របែក ឃុំគោកដូង ស្រុកអង្គរជុំ ខេត្តសៀមរាប ។
លោក សុខ ស៊ីផា នាយកសាលាគោកដូង បានរៀបរាប់ប្រាប់ថា ការដែលសិស្សរបស់គាត់មានសភាពបែបនេះ លោកពិបាកចិត្តណាស់ តាំងពីលោកមកធ្វើជានាយកសាលានៅទីនេះ មានរយៈពេលជាង៦ឆ្នាំមកហើយ មិនដែលមានរឿងយ៉ាងដូច្នេះទេ ។ លោកបន្តថា ចាប់ផ្តើមតាំងពីថ្ងៃទី១១ ខែធ្នូនេះមានសិស្សដែលចេញលេង នាំគ្នាអង្គុយយំ ហើយប្រាប់ថា ចេះតែឈឺក្បាល និងណែនដើមទ្រូងមិនឈប់សោះ ពួកគេយំតៗគ្នាជាបន្តបន្ទាប់ ជាង១០នាក់ លោកក៏បានឱ្យគ្រូប្រចាំថ្នាក់ ជួយដឹកយកទៅផ្ទះប្រគល់ឱ្យឪពុកម្តាយសិស្សរៀងៗខ្លួន ។
លោកនាយកបញ្ជាក់ថា នៅព្រឹកថ្ងៃទី១៥ខែធ្នូនេះក៏ឃើញសិស្សប្រុសស្រី យំ ទៀត រហូតដល់២ថ្នាក់ គឺថ្នាក់ទី៩ និងទី១១ សរុប ៣៥នាក់ ទើបលោកសម្រេចចិត្តឱ្យពួកគេឈប់សម្រាករៀនមួយរយៈសិន ដើម្បីទៅ ព្យាបាលនៅមន្ទីរពេទ្យ ។
ចំណែកលោក ចាន់ រិទ្ធ កសិករ រស់នៅភូមិគោកត្របែក ឃុំគោកដូង ស្រុកអង្គរជុំនេះបានរៀបរាប់ថា លោកជាអ្នករស់នៅជិតសាលានេះ តាំងពីមុនមក លោកមិនដែលឃើញថា មានខ្មោចចូលនោះទេ ! លោកមិនជឿថាមានខ្មោចព្រាយបីសាចស្អីនោះឡើយ ! ប្រហែលសិស្សទាំងនោះ ចង់ សាកល្បងលេងសើចជាមួយលោកនាយកហើយ មើលទៅ ។
រីឯលោក អាចារ្យ និងលោកយាយ ដែលជាចាស់ទុំរស់នៅក្នុងភូមិគោកដូងនេះ ! បាននិយាយប្រហាក់ប្រហែល គ្នាយ៉ាងដូច្នេះដែរ ។
លោកនាយកបានបញ្ជាក់ទៀតថា សិស្សពូកែម្នាក់ក្នុងចំណោមសិស្ស ដែលអង្គុយយំទាំង៣៥នាក់ ត្រូវបាន ឪពុកម្តាយទៅពិនិត្យ!ព្យាបាលនៅមន្ទីរពេទ្យបង្អែក ត្រូវលោកគ្រូពេទ្យប្រាប់ថា គ្មានរោគ៌ាអ្វីនោះទេ ។ (ប្រហែលជាមានខ្មោចព្រាយ មែនហើយមើលទៅ! )
ដោយសារមានជំនឿបែបនេះ ទើបឪពុកម្តាយ ឫអាណាព្យាបាលសិស្ស បាននាំគ្នាធ្វើពិធី សែនព្រេន យកបាយសម្លរ សែនអារុកអារក្សអ្នកតា ខ្មោចបីសាចទាំងនេះ បានស៊ី កុំឱ្យធ្វើបាចក្មេងៗ សិស្សសាលាតទៅទៀត ។ បន្ទាប់មកនិមន្តព្រះសង្ឃចំនួន៨អង្គព័ទ្ធសីមា ជុំវិញសាលារៀនគោកដូងនេះតែម្តង ៕
ប៊ុនធឿន (សៀមរាប)
