បាត់ដំបង ៖ នាព្រឹកព្រឹកថ្ងៃទី១៥ ខែមិថុនា ឆ្នាំ២០១៤ អាវុធហត្ថបាត់ដំបងបញ្ជូន ក្រុមចោរប្រដាប់អាវុធប្លន់សម្លាប់ ៣ នាក់ចំណោម ៦ នាក់និងកាំភ្លើង ២ ដើម និងវត្ថុតាងមួយចំនួនទៀត បញ្ជូនទៅតុលាការ ដើម្បីចាត់ការតាមនិតិវិធីច្បាប់ ។
តាមពូ័ត៌មានឲ្យដឹងថា កម្លាំងអាវុធហត្ថខេត្តបាត់ដំបងស្រាវជ្រាវស៊ើបអង្កេត ជាច្រើនថ្ងៃនៅសប្តាហ៍ទី ២ ខែមិថុនា ឆ្នាំ២០១៤ ឈានដល់ការឃាត់ខ្លួនជនសង្ស័យក្រុមចោរប្លន់ប្រដាប់អាវុធធ្វើសកម្មភាពប្លន់យ៉ាងសកម្ម ក្នុងខេត្តបន្ទាយមានជ័យ ខេត្តប៉ៃលិន ខេត្តពោធិ៍សាត់ ហើយគេចខ្លួនដល់ខេត្តត្បូងឃ្មុំ ។
ក្រុមចោរខាងលើមានគ្នា ៦ នាក់បានធ្វើសកម្មភាពប្លន់បាញ់ប្លន់សម្លាប់បុរស ២ នាក់ និងស្ត្រីម្នាក់រងរបួសធ្ងន់ នៅផ្ទះលក់សាច់ឆ្កែ ប្លន់យកមាសប្រាក់ កាលពីខែឧសភា នៅភូមិចកឃុំកកោះ ស្រុកមោងឬស្សី ខេត្តបាត់ដំបង ។ អាវុធហត្ថខេត្តបាត់ដំបងបានស្រាវជ្រាវឃាត់ខ្លួនបុរស ៣ នាក់សង្ស័យចំណោម ៦ នាក់ ទី ១ ឈ្មោះ ភិន ភន អាយុ ៥១ ឆ្នាំ ជាមេខ្លោងមុខរបរធ្វើស្រែរស់នៅភូមិព្រែកអាំ ឃុំរបស់មង្គល ស្រុកមោងឬស្សី ខេត្តបាត់ដំបង រកឃើញកាំភ្លើងអាការមួយដើម កាំភ្លើងខ្លីមួយដើម ដែលលាក់ទុកក្នុងផ្ទះ ។ ទី ២ ឈ្មោះ នាង ស៊ីណា ហៅ ខ្នា អាយុ ៣០ ឆ្នាំជាអ្នកបាញ់សម្លាប់មនុស្ស មុខរបរ កម្មករ រស់នៅភូមិថ្មីឃុំត្រពាំងជង ស្រុកបាកាន ខេត្តពោធិសាត់ ។ ទី ៣ ឈ្មោះ នឹម ចិត្ត អាយុ ៣១ ឆ្នាំជាអ្នកភ្ជង់គំរាម និងបាញ់ការពារ ក្រោយធ្វើសកម្មភាព មុខរបរកម្មកររស់នៅភូមិព្រែកកន្លង់ ឃុំផ្ទះរ៉ុង ស្រុកក្រវាញ ខេត្តពោធិសាត់ ។ វត្ថុតាងដកហូតម៉ូតូហុងដា ៥ គ្រឿង ឆ្នាំ២០១០ ចំនួន ៣ គ្រឿង និង ឆ្នាំ២០១៣ ចំនួន ២ គ្រឿង ។ កាំភ្លើងអាកា ៥៤ មួយដើមគ្រាប់ ១៤ គ្រាប់បង់មួយ កាំភ្លើងខ្លីអាកា ៤៧ មួយដើម គ្រាប់ ៧ គ្រាប់បង់មួយ ប្រដាប់កាច់សោករម៉ូតូមួយ ទួរស័ព្ទ៣គ្រឿង និងកាបូបស្ពាយ សម្រាប់ដាក់លាក់អាវុធខ្លីចំនួន ២ ។
ក្រុមជនសង្ស័យទាំង ៣នាក់បានសារភាពប្រាប់អាវុធហត្ថខេត្តបាត់ដំបងថា ពួកគេធ្វើសកម្មភាពប្លន់លួចមានគ្នា ៦ នាក់ចាប់ពី២០១១ ដល់ខែឧសភា ឆ្នាំ២០១៤ ហើយពួកគេធ្វើសកម្មភាពប្លន់ ១១ លើក បាញ់សម្លាប់មនុស្ស ៣ នាក់របួសធ្ងន់ស្រាល ៩ នាក់ និងយកបានសម្ភារៈមាសប្រាប់មួយចំនួន ។ ការធ្វើសកម្មភាពប្លន់លួចនេះ គឺនៅក្នុងខេត្តបាត់ដំបង ៦ លើកនៅខេត្តបន្ទាយមានជ័យ ១ លើកនៅខេត្តពោធិសាត់ ៤ លើក ដោយប្រើប្រាស់កាំភ្លើងអាកាមួយដើម កាំភ្លើងខ្លីមួយដើម ប្លន់បានម៉ូតូ ៦ គ្រឿងមាស ៣ តម្លឹង ៣ ជីប្លាទីន ២ តម្លឹង ៦ ជី ប្រាក់ដុល្លារ៨០០ដុល្លារ ប្រាក់បាត៧០០០បាត និងប្រាក់រៀល៥០លាន៨០ម៉ឺនរៀល ទួរស័ព្ទដៃចំនួន ១២ គ្រឿង ។
សមត្ថកិច្ចបានបញ្ជាក់ថា ម៉ូតូចំនួន ៥ គ្រឿងប្រគល់ជូនម្ចាស់ដើមវិញ ។ ចំណែកជនសង្ស័យទាំង ៣ នាក់និងវត្ថុតាងកាំភ្លើង ២ ដើម បានកសាងសំណុំរឿងបញ្ជួនខ្លួន ទៅតុលាការ ដើម្បីចាត់ការទៅតាមផ្លូវច្បាប់ នៅរសៀលថ្ងៃទី ១៥ ខែមិថុនា ឆ្នាំ២០១៤ ចំណែកបក្ខពួកជន សង្ស័យចំនួន ៣ នាក់ទៀត កំពុងស្រាវជ្រាវតាមចាប់ខ្លួន យកមកផ្តន្ទាទោសតាមផ្លូវច្បាប់ ៕
