ខេត្តសៀមរាប៖ដំណើរទស្សនៈកិច្ចជាផ្លូវការរយៈពេលពីរថ្ងៃ របស់គណៈប្រតិភូបក្សកុម្មុយនីសចិន នៅលើទឹកដីប្រវត្តិសាស្ត្រ ខេត្ត សៀមរាប ដែលដឹកនាំដោយឯកឧត្តម សិន ជុងយ៉ាវ អគ្គលេខាធិការរងនៃគណៈកម្មាធិការអចិន្ត្រៃយ៍រដ្ឋសភា ប្រជាជនចិន រួមនឹងសហការី ដើមី្បធ្វើបទឧទេ្ទសនាម អំពីលទ្ធផល នៃសន្និបាតគណៈកម្មាធិការមជ្ឈឹមបក្សលើកទី៥ អាណត្តិទី១៨ និង ផែនការ៥ឆ្នាំ លើកទី១៣ សម្រាប់អភិវឌ្ឍន៍សេដ្ឋកិច្ច និងសង្គម របស់គណៈកម្មាធិការមជ្ឈឹមបក្សកុម្មុយនីសចិន ជូនដល់មន្ត្រីថ្នាក់ដឹកនាំគណបក្សប្រជាជនកម្ពុជា ខេត្តសៀមរាប កាលពីរសៀលថ្ងៃទី១៥ ខែធ្នូ ឆ្នាំ២០១៥ នៅស្នាក់ការគណបក្សប្រជាជនខេត្ត ។
តាមរយៈការធ្វើឧទ្ទេសនាម របស់ឯ.ឧ សិន ជុងយ៉ាវ អគ្គលេខាធិការរងនៃគណៈកម្មាធិការអចិន្ត្រៃយ៍រដ្ឋសភា ប្រជាជនចិន បានគូសបញ្ជាក់យ៉ាងច្បាស់ អំពីគោលដៅនៃកិច្ចអភិវឌ្ឍន៍រយៈពេល៥ឆ្នាំរបស់ខ្លួន ពីឆ្នាំ ២០១៦ដល់ ២០២០ របស់បក្សកុម្មុយនីស្តចិន ក្នុងទិសដៅកាត់បន្ថយនូវភាពក្រីក្ររបស់ប្រជាជនចិន ចំនួន៧០លាន នាក់ ដែលជាបញ្ហា ដ៏ធ្ងន់ធ្ងរ និង ត្រូវលុបបំបាត់ទាំងស្រុង នូវបញ្ហាភាពក្រីក្រនៅឆ្នាំ២០២០ទៀតផង និងបញ្ជាក់អំពីគោលបំណងក្នុង ការពង្រឹងពង្រីក នូវការទំនាក់ទំនងជាមិត្តភាពរវាង កម្ពុជា – ចិន ឲ្យកាន់តែស្អិតរមួតបន្ថែមទៀតផងដែរ ។
ឯកឧត្តម កៅ សោភណ្ឌ សមា ជិកគណៈកម្មាធិការនៃគណៈបក្សប្រជាជនខេត្ត ថ្លែងនូវអំណរគុណចំពោះគណៈប្រតិភូ ដែលបានធ្វើការ ឧទ្ទេសនាមនិង ផ្តល់នូវបទពិសោធន៍ល្អៗ ដែលជាប្រធានបទមួយ សម្រាប់មន្ត្រីថ្នាក់ដឹកនាំ គណបក្សប្រជាជនខេត្ត យកទៅអនុវត្ត និង សិក្សារៀនសូត្រ ក្នុងកិច្ចអភិវឌ្ឍន៍នៅក្នុងមូលដ្ឋានផងដែរ ។
ក្នុងពិធីលៀងសាយភោជន៍ នៅសណ្ឋាគារបុរីអង្គរ នាថ្ងៃនោះដែរ ឯ.ឧ កៅ សោភណ្ឌ ក៏បានលើកឡើងពីស្ថានភាព ភូមិសាស្ត្រ នយោបាយ សន្តិសុខ សេដ្ឋកិច្ច និង ជីវភាពរស់នៅរបស់ប្រជាជនខេត្តសៀមរាប ក្រោមកិច្ចដឹកនាំដ៏ឈ្លាសវៃ ប្រកបដោយគតិបណ្ឌិតដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី បានធ្វើឲ្យមានការអភិវឌ្ឍន៍រីកចម្រើនលើគ្រប់វិស័យ និងបាន លើស្ទួយនូវជីវភាពរស់នៅរបស់ប្រជាជន កាន់តែមានភាព ប្រសើរ និងបានអភិវឌ្ឍន៍លើវិស័យទេសចរណ៍ ទាំងរចនាសម្ព័ន្ធ និងសេវាកម្មទេសចរណ៍ ព្រមទាំងអភិវឌ្ឍន៍ក្រុងឲ្យកាន់ តែមានសោភ័ណ្ឌស្រស់ត្រកាលឡើង ។
ឯ.ឧ កៅ សោភណ្ឌ ក៏បានលើកឡើងថា ដំណើរទស្សនៈកិច្ចជាផ្លូវការ នៅលើទឹកដីប្រវត្តិសាស្រ្តខេត្តសៀមរាប បានធ្វើឲ្យចំណងមិត្តភាពរវាងគណបក្សនៃប្រទេសទាំងពីរ កម្ពុជា ចិន ឲ្យកាន់តែមានទំនាក់ទំនងល្អ និងកិច្ចសហប្រតិបត្តិការល្អ ជាមួយគណបក្សប្រជាជនកម្ពុជា និង បក្សកុម្មុយនីស្តចិន ក៏ដូចរាជរដ្ឋាភិបាលកម្ពុជា និង រដ្ឋាភិបាលចិន ព្រមទាំងបាន ធ្វើឲ្យប្រជាជននៃប្រទេសទាំងពីរ កាន់តែនៅជិតគ្នាជានិច្ចនិរន្ត ហើយកម្ពុជាគាំទ្រ នយោបាយចិនមានតែមួយផងដែរ ។
មានប្រសាសនោះដែរ ឯ.ឧ សិន ជុងយ៉ាវ ក៏បានថ្លែងអំណរគុណចំពោះ ថ្នាក់ដឹកនាំគណបក្សប្រជាជនខេត្ត ក៏ដូចអាជ្ញាធរខេត្តសៀមរាប ដែលបានយកចិត្តទុកដាក់ ពីដំណើរទស្សនកិច្ច ព្រមទាំងបានកោតសរសើរពីភាពដឹកនាំ របស់ គណបក្សប្រជាជនកម្ពុជា ក្នុងកិច្ចអភិវឌ្ឍន៍ប្រទេស ក៏ដូចកិច្ចអភិវឌ្ឍន៍ ខេត្តឲ្យកាន់តែមានភាពស្រស់ស្អាត ។
លុះនៅព្រឹកថ្ងៃទី ១៦ ខែឆ្នាំដដែល នៅវេលាម៉ោង ១១និង ៣០នាទី គណៈប្រតិភូក៏បានធ្វើមាតុភូមិនិវត្តន៍ ទៅកាន់ មាតុប្រទេសខ្លួន តាមច្រកទ្វារអាកាសយានដ្ឋានអន្តរជាតិសៀមរាប តាមជើងយន្តហោះ ឆ្ពោះទៅកាន់ទីក្រុង ក្វាងចូវ ប្រកបដោយសុវត្ថិភាពខ្ពស់ ៕ ប៊ុនធឿន (សៀមរាប)
