ខេត្តរតនគិរី ៖ ប្រជាពលរដ្ឋរាយការណ៏ថាឈើប្រណីត ប្រភេទធ្នង់ ត្រូវបានសមត្ថកិច្ច គ្រប់លំដាប់ថ្នាក់ ក្នុងស្រុកអណ្តូងមាស ខេត្តរតនគីរី ជាពិសេសនគរបាលសេដ្ឋកិច្ច ក្រសួងមហាផ្ទៃ បានសំរបសំឬួលឱ្យឈ្មួញ សំរុកដឹកជញ្ជូន យកទៅលក់នៅ ប្រទេសវៀតណាមបានយ៉ាងរលូនតាមច្រករបៀងមួយចំនួន ដូចជាច្រក ផាសតាម ហៅច្រកអូរសាថី ច្រកតាង៉ា និងច្រកភូមិចង ស្ថិតក្នុងឃុំញ៉ាង ស្រុកអណ្តូងមាស ខេត្តរតនគិរី។
សេចក្តីរាយការណ៏ឲ្យដឹងទៀតថា ជារៀងរាល់ថ្ងៃ មានម៉ូតូដឹកឈើ និងរថយន្តកែច្នៃ គ្រប់ប្រភេទ ដែលធ្វើសកម្មភាព សំរុកដឹកឡើងលើភ្នំញ៉ាង មានទាំងមនុស្សស្រី និងមនុស្សប្រុស ជាអ្នកបើកបរម៉ូតូ ដឹកឈើប្រណីត ចេញពីបណ្តាស្រុកដូច ជាស្រុកវ៉ើនសៃ ស្រុកអូរជុំ និងស្រុកតា វែង ហើយត្រូវដឹកជញ្ជូន ឆ្លងកាត់ដីសម្បទានសេដ្ឋកិច្ច ចំការកៅស៊ូ ក្រុមហ៊ុន ហេងប្រាឌ័រ និងក្រុមហ៊ុន ហ៊ងអាញ ម៉ាងយ៉ាងខេ អណ្តូងមាស ហើយចូលមក ទីរួមស្រុកអណ្តូងមាស កាត់តាមមុខ អធិការដ្ឋាន នគរបាលស្រុក សឹករងស្រុក និងសាលាស្រុកអណ្តូងមាស ផងដែរ ដើម្បីឆ្លងតាមសាឡាង បន្តទៅទៀតឆ្ពោះទៅភ្នំញ៉ាង មិនដែលឃើញ សមត្ថកិច្ចពាក់ព័ន្ធ បង្ក្រាបនោះឡើយ។
ប្រភពពីអ្នករកស៊ីដឹកឈើ តាមម៉ូតូនោះបានប្រាប់ថា ពេលដឹកជញ្ជូនឈើ ឆ្លងកាត់ក្រុមហ៊ុនដីសម្បទាន ខាងលើនោះ មានសមត្ថកិច្ចជាច្រើនស្ថាប័ន រួមមាននគរបាល ប្រឆាំងបទល្មើសសេដ្ឋកិច្ច ខេត្ត ក្រសួងមហាផ្ទៃ ចាំទារលុយពីអ្នកដឹកឈើ និងរថយន្តដឹកឈើប្រណិត ទាំងអស់នោះ ហើយមានអង្គការ ដាក់កុងត្រូលជជុះ ជាច្រើនកន្លែងទៀតផងដែរ។
ការដឹកជញ្ជូនឈើប្រណឹត តាមម៉ូតូយ៉ាងច្រើន កកកុញនៅជើងភ្នំញ៉ាង នាកន្លងទៅនេះ មិនមានការបង្ក្រាប ពីសមត្ថកិច្ចនោះឡើយ ដោយសារតែមានការ បង់លុយឱ្យគ្រប់ចំនួនអស់ហើយ ទើបដំណើរការ បានយ៉ាងរលូនចេញទៅព្រំប្រទល់ ប្រទេសវៀតណាម ហើយជាតំបន់ដាច់ស្រយាល ពីទីរួមខេត្ត ហើយផ្លូវពិបាកក្នុងការធ្វើដំណើរទៀតផង ចំងាយជាង ៤០គីឡូម៉ែត្រ ពីទីរួមខេត្ត ទើបក្រុមឈ្មួញ រកស៊ីឈើ មានឱកាសដឹកជញ្ជូន យ៉ាងអនាធិបតេយ្យ។
លោកនាយខណ្ឌរដ្ឋបាលព្រៃឈើខេត្តរតនគីរីដែលទើបផ្លាស់មកថ្មីក៏មិនទាន់ឃើញបញ្ចេញស្នារដៃបង្រ្កាបបទល្មើសព្រៃឈើខាងលើនេះដែរ ប្រហែលជាមិនទាន់ភ្ញាក់ពីដេកទេដឹង៕
