ខេត្តស្ទឹងត្រែង៖ ក្រុមឈ្មួញកំពុងសំរុកដឹកឈើប្រណិតប្រភេទឈើឆ្នង់ ជាច្រើនដុំនិងជាច្រើនម៉ែត្រគីប យក មកស្តុបទុកនៅត្រង់ចំណុចភូមិអន្លង់ស្អំ ឃុំអន្លង់ជ្រៃ ស្រុកថាឡាបរិវ៉ាត់ខេត្តស្ទឹងត្រែង ហើយឈើទាំងនោះត្រូវបានប្រជាពលរដ្ឋរាយការណ៍ថា ពួកឈ្មួញបានកាប់ និងដឹកចេញពីតំបន់ព្រៃឡង់ ដែលជាព្រៃការពារដោយរាជរដ្ឋាភិបាល។
ឈើទាំងនោះ ត្រូវបានពួកឈ្មួញរកស៊ីឈើល្មើសច្បាប់ ប្រើកម្មករទៅកាប់ផងនិងទិញពីប្រជាពលរដ្ឋដែលនាំគ្នាចូលកាប់ឈើប្រណិត ក្នុងតំបន់ព្រៃឡង់ផងជាប្រភេទឈើធ្នង់ ហើយត្រូវបានគេដឹកចេញជារៀងរាល់ថ្ងៃពីទីតាំងខាងលើឆ្ពោះទៅប្រទេសវៀតណាម ដោយរលូនមិន ទើសភ្នែកសមត្ថកិច្ចរាប់ទាំងមេព្រៃផង។
ប្រភពបានឲ្យដឹងថា ទីតាំងខាងលើនេះគ្រាន់តែជាកន្លែងស្ដុកឈើប៉ុណ្ណោះ មុននឹងគេដាក់រថយន្តចេញទៅលក់នៅ
ប្រទេសវៀតណាម ។
ការដឹកជញ្ជូនឈើប្រណិតជារៀងរាល់ថ្ងៃ របស់ក្រុមឈ្មួញបានរលូនគឺដោយសារ មានអ្នករត់ការដ៏មហិមារ ម្នាក់ដែលគេស្គាល់ឈ្មោះ ប៉ូលី ដែលចេះសំរបសំរួលជាមួយសមត្ថកិច្ច។
តាមព័ត៌មានដែលទទួលបានឈើប្រណិតរាប់រយម៉ែត្រគីប ដែលកំពុងស្ដុកនៅចំណុចភូមិអន្លង់ស្អំនេះ ជារបស់លោក ឧកញ៉ាម្នាក់ឈ្មោះ អ៊ុក គឹមសាន ដែលល្បីខាងរកស៊ីបំផ្លាញឈើនៅខេត្តស្ទឹងត្រែងច្រើនឆ្នាំមកហើយ រហូតឡើងងារ
ជាឧកញ៉ា។ ព្រៃនៅខេត្តស្ទឹងត្រែងដោយសារតែមានការបំផ្លាញព្រៃឈើមានសភាពធ្ងន់ធ្ងរ ទើបពុំមានឈើប្រណិត
នៅសេសសល់នោះទេ គឺមានតែតំបន់ព្រៃឡង់ប៉ុណ្ណោះដែលអាចនៅសេសសល់ឈើប្រណិតខ្លះ ។
ប៉ុន្តែមកដល់ពេលនេះក្រុមឈ្មួញ បាននឹងកំពុងសម្រុកកាប់បំផ្លាញឈើប្រណិតនៅតំបន់ព្រៃឡង់បន្តទៀត ដែលអាច
នាំដល់ការអន្តរាយធ្ងន់ធ្ងរ សម្រាប់តំបន់ព្រៃឡង់នៅស្រុកថាឡាបរិវ៉ាត់ ខេត្តស្ទឹងត្រែង ។
រហូតមកដល់ពេលនេះ គេពុំទាន់ឃើញមានកម្លាំងសមត្ថកិច្ច ឬមន្ត្រីជំនាញណាចុះទៅពិនិត្យ និងចាត់វិធានការនោះឡើយ ចំណែកមេព្រៃខេត្តរឹតតែសម្ងំឈឹងថែមទៀត។ចំណែកប្រជាពលរដ្ឋបាន ប្រាប់ថា ឈើប្រណឹតទាំងនោះមិនអាចបង្ក្រាបបាននោះទេព្រោះឧកញ៉ាដែលជាម្ចាស់ឈើនោះបានរត់ការយក
អាស្រមូមបិទមាត់គ្រប់កន្លុកកន្លៀតអស់ហើយ ។
ប្រជាពលរដ្ឋសម្ដែងការព្រួយបារម្ភ ចំពោះសកម្មភាពបន្តកាប់បំផ្លាញព្រៃឈើតំបន់ព្រៃឡង់ ក្នុងស្រុកថាឡាបរិវ៉ាត់ គ្រាដែលមេព្រៃហាក់មិនអើពើក្នុងការបង្ក្រាប ដែលអាចនឹងឲ្យឈើតំបន់ព្រៃឡង់រងការបំផ្លាញអស់គ្មានសល់មិនខាន ។
ពាក់ព័ន្ធករណីខាងលើនេះ យើង ព្យាយាមទំនាក់ទំនងសុំការបំភ្លឺពីលោកឧកញ៉ា អ៊ុក គឹមសាន និងលោក ឈាង តុលាមេព្រៃខេត្តស្ទឹងត្រែង ប៉ុន្តែពុំអាចទំនាក់ទំនងបាននៅឡើយ ៕
