មេល្បែងខ្លាឃ្លោក ព្រមានដាក់ខ្នោះអ្នកយកព័តមាន

សៀមរាប៖ អ្នកយកព័ត៌មាន៣(បី)នាក់ ត្រូវបានមេល្បែងស៊ីសងធ្វើការគម្រាមកំហែងដាក់ខ្នោះ និងប្រតាយប្រតប់ ដណ្តើមយកម៉ាស៊ីនថតវីដេអូ ខណៈពេលដែលអ្នកយកព័ត៌មានទាំងនោះ ចុះទៅទៅថតយកព័តមាន ករណី លេងល្បែងខ្លាឃ្លោក មួយកន្លែងនៅផ្សារដើមក្រឡាញ់ សង្កាត់គោកចក ក្រុងសៀមរាប ។
អ្នកយកព័ត៌មានម្នាក់ក្នុងចំណោម៣នាក់នោះបាននិយាយឲ្យដឹងថា ការចុះទៅថតករណីលេងល្បែង ខ្លាឃ្លោក នោះ គឺធ្វើតាមការបង្ហាញទីតាំង និងសំណូមពរពីប្រជាពលរដ្ឋ ដែលកើតក្តីក្តៅក្រហាយ ព្រោះតែ សមាជិក គ្រួសាររបស់ខ្លួន លង់ខ្លួនដោយសារតែបានប្រព្រឹត្តិល្បែងនៅទីនោះ ហើយអ្នករងគ្រោះគឺអ្នកនៅផ្ទះ ។

អ្នកយកព័ត៌មានរូបនោះបញ្ជាក់ថា ហេតុការណ៍ប្រតាយប្រតប់អ្នកព័ត៌មានដណ្តើមយកម៉ាស៊ីនថតវីដេអូ ក្នុងខណៈពេលចុះថតបនល្បែងនោះ គឺកើតឡើងកាលពីវេលាម៉ោង ៣ និង៥០នាទី រសៀលថ្ងៃទី ១១ ខែធ្នូ ឆ្នាំ២០១៥ បណ្តាលឲ្យខូច កាមេរ៉ាថត វីដេអូ១គ្រឿង ។ អ្នកយកព័តមាន ! ដែលក្លាយជាជនរងគ្រោះ បាន បញ្ចាក់ថា មុននឹងចុះទៅថតបនល្បែងនោះ ពួកគាត់បានស្នើសុំសហការជាមួយប៉ុស្ដិនគរបាលសង្កាត់ គោកចកផងដែរ តែលោកមេប៉ុស្ថិជាប់រវល់ ។
ក្រោយពីហេតុការណ៍នោះកើតឡើង អ្នកយកព័ត៌មានរូបនោះ បានសុំការធ្វើអន្តរាគមន៍ រកខុសត្រូវ ពីសំណាក់ឧត្តមសេនីយ៍ ស្នងការនគរបាលខេត្តសៀមរាបដោយផ្ទាល់ ។ ប្រហែលជា២០នាទីក្រោយពីការសុំ អន្តរាគមន៍ ទើបឃើញលោកមេប៉ុស្ថិសង្កាត់គោកចក បានមកដល់កន្លែងកើតហេតុ ។ អ្នកយកព័ត៌មាន រងគ្រោះ រូបនោះបាននិយាយថា មេល្បែងបានគំរាមគាត់ ឲ្យលុបរូបភាពដែលបានថតចោលឲ្យអស់ បើមិនដូច្នោះទេ គេ នឹងដាក់ខ្នោះ ហើយបើហ៊ានយករឿងនេះទៅផ្សាយ នឹងមានបញ្ហាធំមិនខាន ។ មេល្បែងរូបនោះ គេបានឧទ្ទេស នាមខ្លួនគេថា រូបគេជាប៉ូលីសព្រហ្មទណ្ឌ ។

ប្រជាពលរដ្ឋនៅជិតៗនោះ ក៏បាននិយាយឲ្យដឹង ដែរថា បនល្បែង នេះឈរជើងយូរហើយ មេល្បែងប្រុសឈ្មោះ ម៉ៅ ហៅ ខ្មៅ និង មានមេល្បែងស្រីម្នាក់ទៀត ឈ្មោះ ចែម៉ាប់ និងជាមេតុងទីនផងដែរ ។

លោក ឈុំ សំបាន មេប៉ុស្ថិនគរបាលរដ្ឋបាលសង្កាត់គោកចក បាននិយាយថា ឈ្មោះ ម៉ៅ មេល្បែងខ្លា ឃ្លោកនោះ មិនមែនជាមេប៉ូលីសព្រហ្មទណ្ឌអីនោះទេ ។ គួរបញ្ជាក់ដែរថា នៅពេលដែលកម្លាំងប៉ូលីសសង្កាត់ ចុះទៅអន្តរាគមនោះ មេល្បែងបានគេចខ្លួនបាត់ទៅហើយ ។

លោក មេប៉ុស្ថិបានឲ្យដឹងទៀតថា ករណីខាងលើនេះ លោកបានទទួលពាក្យបណ្តឹង ដែលបានធ្វើឡើង ដោយភាគីរងគ្រោះ គឺអ្នកយកព័ត៌មានទូរទស្សន៍ប៉ុស្ថិលេខ៣ ប្រចាំខេត្តសៀមរាប លើ ករណីទាមទារសំណង ដែលជនសង្ស័យឈ្មោះ ម៉ៅ ហៅខ្មៅ មានចេតនាបង្ករធ្វើឲ្យខូចកាម៉េរ៉ាថត វីដេអូ១គ្រឿង និងទូរស័ព្ទដៃផងដែរ ចំពោះករណី ប៉ះពាល់ រាងកាយ និង ការជេរប្រមាថផ្សេងៗទៀត សូមឲ្យសមត្ថកិច្ចអនុវត្តតាមច្បាប់តុលាការ ជាធរមាន ៕