បក្សប្រឆាំងប្រារព្ធទិវាសិទ្ធិមនុស្ស១០ធ្នូ នៅទីស្នាក់ការគណបក្សភ្នំពេញ ចំណែកមេបក្ស ឲ្យសមាជិកគណៈកម្មការជំនាញរដ្ឋសភា ចូលរួមប្រជុំសភា

រាជធានីភ្នំពេញ៖គណបក្សសង្គ្រោះជាតិ នៅព្រឹកថ្ងៃទី១០ ខែធ្នូ ឆ្នាំ២០១៥នេះ បានប្រារព្ធទិវាសិទ្ធិមនុស្ស១០ធ្នូ នៅទីស្នាក់ការបក្ស នាសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ក្រោមវត្តមានលោក កឹម សុខា ប្រធានស្តីទីគណបក្ស ។

លោក កឹម សុខា បានថ្លែងថា សិទ្ធិមនុស្សគឺជាស៊ីម៉ុងត៍សម្រាប់ផ្សារភ្ជាប់ការផ្សះផ្សារជាតិ ។

ចំណែក ប្រធានគណបក្សសង្គ្រោះជាតិ លោក សម រង្ស៊ី កាលពីថ្ងៃទី៩ ខែធ្នូ ឆ្នាំ២០១៥ បានថ្លែងណែនាំឲ្យ សមាជិកគណៈកម្មការជំនាញរបស់ខ្លួន ដែលមានតួនាទីក្នុងរដ្ឋសភាចូលរួមរាល់កិច្ចប្រជុំរដ្ឋសភា ដើម្បីពិនិត្យ និងឲ្យយោបល់លើសេចក្ដីព្រាងច្បាប់ផ្សេងៗ ដែលបានបញ្ជូនមករដ្ឋសភាអនុម័ត។

ការថ្លែងបែបនោះ ធ្វើឡើងនៅក្នុងកិច្ចប្រជុំគណៈកម្មាធិការអចិន្ត្រៃយ៍ គណបក្សសង្គ្រោះជាតិ នៅទីស្នាក់ការកណ្តាលគណបក្ស ស្ថិតនៅសង្កាត់ចាក់អង្រែលើ រាជធានីភ្នំពេញ តាមរយៈប្រព័ន្ធស្កែប (Skype)។

លោក សម រង្ស៊ី បានបញ្ជាក់ថា រដ្ឋសភា ជាកន្លែងដែលត្រូវទៅទទួលព័ត៌មាន ជាពិសេស នៅក្នុងគណៈកម្មការជំនាញ ដែលគណបក្សសង្គ្រោះជាតិ មានប្រធាន៥រូប និងអនុប្រធាន៥រូប ដូច្នេះលោក និងលោក កឹមសុខា អនុប្រធានស្ដីទីគណបក្ស បានឯកភាពគ្នាឲ្យសមាជិកគណៈកម្មការជំនាញ របស់CNRP ត្រូវតែទៅទទួលព័ត៌មាន ដែលទាក់ទងនឹងសេចក្ដីព្រាងច្បាប់ សេចក្ដីស្នើច្បាប់ផ្សេងៗ ដែលបញ្ជូនមករដ្ឋសភា ដើម្បីដឹងពីសកម្មភាពមន្ត្រីរដ្ឋាភិបាល លើកយកមតិ យោបល់ប្រជាពលរដ្ឋ និងសង្គមស៊ីវិលទៅជជែកក្នុងរដ្ឋសភា។លោកបានបន្តថា យើងទៅចូលរួម ចូលរួមហ្នឹងគឺយើងចង់ដឹងថាខាងរដ្ឋាភិបាល ធ្វើអីកិច្ចការប្រទេសជាតិ យើងមិនគាំទ្រ យើងត្រូវដឹង យើងត្រូវដឹង យើងចង់បានព័ត៌មាន ដើម្បីយើងមានយោបល់ដោយខ្លួនយើង។ អញ្ចឹងក្នុងគណៈកម្មការហ្នឹង យើងចូលរួម ទៅស្តាប់ ប៉ុន្តែយើងអត់មានទៅគាំទ្រទេ អាស្រ័យលើប្រធានបទ អាស្រ័យលើខ្លឹមសារ ហើយចំពោះពេញអង្គ (កិច្ចប្រជុំពេញអង្គ) យើងអត់ចូលរួមទេ។

មួយវិញទៀត សម្តេចក្រឡាហោម ស ខេង និងលោក កឹម សុខា នឹងជួបប្រជុំនៅវិមានរដ្ឋសភានាល្ងាចនេះ៕