ខេត្តសៀមរាប៖ ដោយសារតែរដូវវស្សាកន្លងមកនេះ ការផ្តល់របបទឹកភ្លៀងមិនគ្រប់គ្រាន់ បណ្តាលទិន្នផលស្រូវ មានការ ធ្លាក់ចុះ ! ស្ថានភាពបែបនេះ គឺជាមូលហេតុជម្រុញឲ្យ ប្រជាកសិករចំនួន៤ឃុំ នៃស្រុកពួក ខេត្តសៀមរាបដល់ បង្ករបង្កើនផលស្រូវរដូវប្រាំង
បន្តទៀត របស់ប្រជាកសិករទាំង៤ឃុំនេះ គឺអាស្រ័យលើប្រភពទឹក ដែលនាំចេញ ពីអាងបារាយណ៍ទឹកថ្លា ឬបារាយណ៍ខាងលិច ដែលអាចផ្ទុកទឹកក្នុងកម្រឹតអតិបរមាបានប្រមាណជា ៦០លានម៉ែត្រត្រីគុណ ។
ព្រឹកថ្ងៃទី០៩ ខែធ្នូនេះ ប្រជាកសិករប្រមាណជា៨០០នាក់ មកពីឃុំទាំង៤ (ឃុំខ្នាត ឃុំពួក ឃុំសំរោងយា និងឃុំកែវពណ៌) នៃស្រុកពួក បានរួមគ្នាកាប់ឆ្ការ សម្អាតព្រៃតាមដងប្រឡាយមេ១ខ្សែ ក្នុងចំណោមប្រឡាយមេ ទាំង១០ខ្សែ ដែលជាបណ្តាញធារាសាស្រ្ត នាំទឹកចេញពីប្រភពអាងបារាយណ៍ ឆ្លងកាត់ភូមិនានា ទៅកាន់តំបន់ ស្រែប្រាំង ។
បើតាមបញ្ជាក់របស់លោក ហួត ហាយ ប្រធានសហគមន៍កសិករប្រើប្រាស់ទឹកបារាយណ៍ខាង លិច បានឲ្យដឹងថា ការកាប់ឆ្ការព្រៃសំអាត
តាមដង ប្រឡាយនេះ គឺវាស្ថិតក្នុងស្ថានភាពនៃតម្រូវការ ទឹកជា ចាំបាច់នៃប្រជាកសិករសហគមន៍ ដែលមានតម្រូវការធ្វើស្រែប្រាំង ព្រោះតំបន់ខាងក្រោមមានកង្វះខាត ទឹកប្រើប្រាស់ ដោយសារតែលំហូរទឹកខ្សោយ ហើយការកាប់ឆ្ការព្រៃតាមដងប្រឡាយមេនេះ ដើម្បីជម្រុញល្បឿនទឹកហូរ ស្របតាមតម្រូវការ ។
លោក ជូរ រ៉ាលីណា អនុប្រធាននាយកដ្ឋានគ្រប់គ្រងទឹក នៃអាជ្ញាធរអប្សរាបានប្រាប់ឲ្យដឹងថា ៖ បន្ទាប់ ពីរាជរដ្ឋាភិបាល បានផ្ទេរអាងបារាយណ៍ខាងលិច ពីការគ្រប់គ្រងដោយមន្ទីរធនធានទឹកខេត្ត មកជាការគ្រប់ គ្រងដោយអាជ្ញាធរអប្សរា កាលពីថ្ងៃទី០១
ខែកកដ្កា ឆ្នំា២០១៤មក ! ជាង១ឆ្នាំកន្លងមកនេះ អាជ្ញាធរអប្សរា បានទទួលខុសត្រូវទំាងស្រុង លើការផ្គត់ផ្គង់ ចែកចាយប្រើប្រាស់ទឹក
អាងបារាយណ៍ ក្នុងនោះរួមមាន សម្រាប់ប្រជាកសិកបង្កបង្កើនផល ចែកចាយសម្រាប់រដ្ឋាករទឹក ផលិតទឹកស្អាតប្រើប្រាស់ក្នុងក្រុង
សៀមរាប និងសម្រាប់ទ្រទ្រង់បរិស្ថានក្នុងតំបន់អង្គរផងដែរ ។
លោកបញ្ជាក់បន្ថែមថា អាងបារាយណ៍ខាងលិច ត្រូវបានចែកចាយប្រើប្រាស់ក្នុងចលនាបង្ក បង្កើនផល ស្រូវលើផ្ទៃដីសារុប ១២ ០០០ហិចតា ក្នុងនេះផ្ទៃដីស្រែប្រាំង ៤ ០០០ ហិចតា ។ ប្រព័ន្ធធារាសាស្ត្រ នាំទឹក ចេញពីអាងបារាយណ៍ រួមមានប្រឡាយមេ ១០ខ្សែ ប្រឡាយរង ៥៨ខ្សែ និងប្រឡាយតូចៗជាច្រើនទៀត ។ ប្រជាពលរដ្ឋដែលអាស្រ័យផលកសិកម្ម ដោយការផ្គត់ផ្គង់ទឹកចេញពីអាងបារាយណ៍ រួមមាន ៥សង្កាត់
នៃក្រុង សៀមរាប និង ៤ឃុំ នៃស្រុកពួក ។ លោកបានបញ្ជាក់បបន្ថែមទៀតថា ៖ អាងបារាយណ៍ខាងលិចគឺជាផ្នែកមួយនៃការដាក់បញ្ចូល
ឧទ្យានអង្គរ ជាបេតិកភ័ណ្ឌពិភពលោក ៕
ប៊ុនធឿន (សៀមរាប)
