សៀមរាប៖ ព្រឹត្តិការណ៍រត់ប្រណាំងពាក់កណ្តាលម៉ារ៉ាតុងលើកទី២០ ដែលមានកីឡាករ កីឡាការិនីដែលជាភ្ញៀវជាតិ – អន្តរជាតិ ចូលរួមចំនួន ៨៥០៨នាក់ ក្នុងនោះមានជនបរទេសជាង ៤ពាន់នាក់ មកពី ៧៥ ប្រទេស ។ ការរត់ប្រណាំងអន្តរជាតិ ពាក់កណ្ដាលម៉ារ៉ាតុងអង្គរវត្តលើកទី២០នេះ រួមមាន ប្រណាំង រទេះជនពិការបុរស ស្ត្រី ២១ គីឡូម៉ែត្រ ! រត់ប្រណាំងចម្ងាយបុរស ស្រ្តី ២១ គីឡូម៉ែត្រ ! រត់ចម្ងាយ ១០គីឡូម៉ែត្រ និងជនពិការបុរស ស្រ្តី និង ការរត់កំសាន្ដ ក្នុង លក្ខណៈគ្រួសារ និងមិត្តភក្តិ ៣គីឡូម៉ែត្រ ផងដែរ ពិធីនេះបានធ្វើឡើងនៅព្រឹកថ្ងៃទី០៦ ខែ ធ្នូ ឆ្នាំ២០១៥ នាចុងសប្តាហ៍នេះ ។
នេះជាលើកទី២០ហើយ ដែលបានប្រារព្ធធ្វើទិវារត់ប្រណាំងអន្តរជាតិ ពាក់កណ្ដាលម៉ារ៉ាតុងនៅអង្គរវត្ត ក្រោមការ ឧបត្ថម្ភ រៀបចំដោយសមាគមបេះដូងមាសជប៉ុន ក្រសួងទេសចរណ៍ អាជ្ញាធរខេត្តសៀមរាប និងមានការជួយគាំទ្រឧបត្ថម្ភ ពីបណ្ដា ស្ថាប័នរដ្ឋាភិបាលកម្ពុជា អង្គការជាតិ!អន្តរជាតិ វិស័យឯកជន ភោជនីយដ្ឋាន សណ្ឋាគារជាច្រើនទៀតផងដែរ ។
បើតាមរបាយការណ៍ កីឡាករកីឡាការី ដែលបានចុះឈ្មោះជាផ្លូវការចូលរួមរត់ប្រណាំងទាំងកម្ពុជា និង បរទេស ក្នុងចម្ងាយ ២១គីឡូម៉ែត្រ ចំនួន ៣២០៨នាក់ ចម្ងាយ ១០គីឡូម៉ែត្រ ចំនួន២៩៩១នាក់ និង ចម្ងាយ ៣គីឡូម៉ែត្រ ជាលក្ខណៈ ក្រុមគ្រួសារ ចំនួន ២ ២៩៤នាក់ រួមទាំងជនពិការផងដែរ ។
គួរបញ្ជាក់ផងដែរថា៖ កីឡាករ កីឡាការិនីទាំងអស់បន្ដការគាំទ្រ និង ចូលរួមរត់ប្រណាំងពាក់កណ្ដាលម៉ារ៉ាតុងអន្តរជាតិអង្គរ ជារៀងរាល់ឆ្នាំ ពិសេសឆ្នាំ២០១៥នេះ ជាខួបគម្រប់ ២០ឆ្នាំ ក្នុងការ រត់ប្រណាំងអន្តរជាតិ ពាក់កណ្ដាលម៉ារ៉ាតុងអង្គរ បានបញ្ជាក់ឲ្យឃើញនូវសក្ខីភាព នៃប្រជាជនជុំវិញពិភពលោកបានគាំ ទ្រយល់ដឹងច្បាស់ពីស្ថានភាពសន្ដិសុខ សុវត្ថិភាពនិងសណ្ដាប់ធ្នាប់ក៏ដូចជា ស្ថេរភាពនយោបាយ និង សេដ្ឋកិច្ចសង្គមនៅកម្ពុជាបានយ៉ាងល្អប្រសើរ ។
ការរត់ប្រណាំងនាពេលនេះគឺ ដើម្បី ទីក្រុងបៃតង មនុស្សធម៌ ! សុខភាព ! មិត្តភាព ! សាមគ្គីភាព និងដើម្បីការពារ បរិស្ថានភពផែនដីផងដែរ ៕
ប៊ុនធឿន (សៀមរាប)
