ឯកឧត្តម ថោង ខុន រដ្ឋមន្ត្រីក្រសួងទេសចរណ៏អញ្ជើញចូលរួមប្រកាសចូលកាន់មុខតំណែងប្រធាននិងសមាជិកក្រុមប្រឹក្សាខេត្តកំពង់ធំនាព្រឹកថ្ងៃទី០៩ខែមិថុនា ឆ្នាំ២០១៤ ដោយមានការចូលរួមពីមន្ត្រីរាជការ
សរុបចំនួន២២៨នាក់ស្រី៤៦នាក់!
ឯកឧត្តម អ៊ុត សំអន អភិបាលខេត្តកំពង់ធំ បានអានរបាយការណ៍ស្តីអំពីសមិទ្ធិផលនានាក្នុងខេត្តដែលក្រុមប្រឹក្សាខេត្ត រួមសហការគ្នាជាមួយនិងអាជ្ញាធរខេត្ត ព្រមជាមួយមន្ទីរអង្គភាពពាក់ព័ន្ធសម្រេចបានក្នុងរយៈពេល៥ឆ្នាំ នៃក្រុមប្រឹក្សាខេត្តកំពង់ធំអាណត្តិទី១រួចមក!
ឯកឧត្តម ឈឹម កាន អគ្គនាយករងនៃអគ្គនាយកដ្ឋានរដ្ឋបាលមូលដ្ឋានបានអាននូវព្រះរាជក្រឹត្យលេខនស/រកត/០៥១៤/៦៤៣ របស់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះចៅក្រុងកម្ពុជាធិបតី បានទ្រង់យល់សេចក្តីសម្រេចរបស់គណៈកម្មាធិការជាតិរៀបចំការបោះឆ្នោតលេខ២៤៨/១៤ គ.ជ.ប.ស.ស.រ ចុះថ្ងៃទី២៧ខែឧសភា ឆ្នាំ២០១៤ ស្តីពីការប្រកាសបេក្ខជនជាប់ឆ្នោតជាសមាសភាពសមាជិកក្រុមប្រឹក្សាអាណត្តិទី២ បានទ្រង់យល់សេចក្តីក្រាបបង្គំទូលថ្វាយរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា!
ត្រាសបង្គាប់ !មាត្រា១.ទទួលស្គាល់សមាសភាពក្រុមប្រឹក្សាខេត្តកំពង់ធំសរុបចំនួន១៧នាក់ក្នុងអាណត្តិទី២រួមមានទី១. ឯកឧត្តម ឈុន ឈន់ ជាប្រធានក្រុមប្រឹក្សាខេត្តកំពង់ធំ ចំណែក១៦នាក់ទៀតជាសមាជិករួមមានឯកឧត្តម ដៀប ពិរី ឯកឧត្តម លុក សម្បត្តិ ឯកឧត្តម អ៊ឹម ឃុន ឯកឧត្តម ជា ពា ឯកឧត្តម ហេង ហួត លោកជំទាវ ទូច ស៊ីថុល លោកជំទាវ សុខ ចន្ទធូ ឯកឧត្តម ឌិត ធន លោកជំទាវ យស់ ថានារី ឯកឧត្តម កឹម វិសុទ្ធ ឯកឧត្តម ប្រាក់ គឹមនាគ ឯកឧត្តម ស៊ុន ចន្ធី ឯកឧត្តម ជិន កេង ឯកឧត្តម សុក ប៉េងសេង ឯកឧត្តម ស៊ុន ធន់ និងឯកឧត្តម គឹម សុខហេង សាមីខ្លួនដូចមានចែកក្នុងមាត្រា១ខាងលើត្រូវអនុវត្តអនុក្រឹត្យនេះតាមភារកិច្ចរៀងៗខ្លួនចាប់ពីថ្ងៃចុះហត្ថលេខានេះតទៅ ។
ឯកឧត្តម ឈុន ឈន់ ប្រធានក្រុមប្រឹក្សាខេត្ត ដែលទើបតែប្រកាសទទួលស្គាល់ថ្មី តំណាងឲ្យក្រុមប្រឹក្សាទាំង១៧នាក់ បានឡើងធ្វើការប្តេជ្ញាចិត្តថា!១.ប្តេជ្ញាប្រតិបត្តិដោយស្មោះត្រង់ចំពោះរាជរដ្ឋាភិបាល និងប្រជាពលរដ្ឋ ទី២.ប្តេជ្ញាពង្រឹងសាមគ្គីភាពផ្ទៃក្នុងក្រុមប្រឹក្សា និងគណៈអភិបាលខេត្ត យកចិត្តទុកដាក់អភិវឌ្ឍ លើកកម្ពស់ជីវភាពប្រជាពលរដ្ឋ ទី៣.ស្មោះត្រង់ជានិច្ចដោយឥតមានងាករេចំពោះ ជាតិ សាសនា ព្រះមហាក្សត្រ ទី៤ ប្តេជ្ញាបំរើជាតិមាតុភូមិ និងបំរើប្រជាពលរដ្ឋឲ្យអស់ពីកំលាំងកាយ ចិត្ត និងទី៥.ខិតខំលុបបំបាត់អំពើពុករលួយគ្រប់រូបភាព!បន្ទាប់ពីពិធីប្រគល់ជូននូវព្រះរាជក្រិត្យទទួលស្គាល់ក្រុមប្រឹក្សាខេត្តទាំង១៧នាក់រួចមក!ក្នុងនោះមានបេក្ខភាពមកពីសមាជិករបស់គណៈបក្សប្រជាជនកម្ពុជាចំនួន១២នាក់ស្រី៣នាក់ និងមកពីបេក្ខភាពសមាជិកគណៈបក្សសង្គ្រោះជាតិចំនួន៥នាក់(ប្រុស) ។
ឯកឧត្តម ថោង ខុន មានប្រសាសន៏សំណេះសំណាលនិងផ្តាំផ្ញើរដល់ប្រធាននិងសមាជិកក្រុមប្រឹក្សាខេត្តទាំង១៧នាក់ ធ្វើយ៉ាងណាសហការគ្នា ពួតដៃគ្នា រួមសាមគ្គីគ្នា ធ្វើឲ្យខេត្តកំពង់ធំ មានសុខសន្តិភាពនិងការអភិវឌ្ឍន៏រីកចំរើនលើគ្រប់វិស័យចាប់ពីពេលនេះតទៅ ៕
