ខេត្តសៀមរាប៖ ហេតុការណ៍មួយបានធ្វើឲ្យភ្ញាក់ផ្អើលដល់ប្រជាពលរដ្ឋក្នុងក្រុងសៀមរាប ! នៅវេលាម៉ោង ១៩និង ៣០នាទី នាយប់ថ្ងៃទី ៣០ ខែ វិច្ឆិកា ឆ្នាំ២០១៥ មានអគ្គីភ័យមួយបានឆាបឆេះនៅបន្ទប់ ផ្ទះជួលឈើលើថ្មក្រោមមួយ ស្ថិតនៅក្នុងភូមិបន្ទាយចាស់ សង្កាត់ស្លក្រាម ក្រុងខេត្តសៀមរាប ។ ក៏ប៉ុន្តែត្រូវបានកងកម្លាំង រថយន្តពន្លត់អគ្គីភ័យ កងរាជអាវុធហត្ថខេត្ត និងស្នងការនគរបាលខេត្ត ចុះជួយអន្តរាគមន៍បានទាន់ពេលវេលា មិនបណ្តាលឲ្យឆាបឆេះរាលដាលបន្តដល់ផ្ទះផ្សេងៗទៀតនោះឡើយ ។
តាមការបញ្ជាក់ពីប្រជាពលរដ្ឋ រស់នៅជាប់លំនៅដ្ឋានកើតហេតុបានឲ្យដឹងថា នៅវេលា ម៉ោងដូចបាន ជម្រាប់ជូនខាងលើ ពួកគាត់បានឃើញផ្សែងហុយនៅនឹងជញ្ជាំងផ្ទះ ព្រមទាំងឃើញមានអណ្តាតភ្លើងទៀតផង ! ភ្លាមនោះ ក៏បានស្រែកប្រាប់ម្ចាស់ផ្ទះជួល រួចហើយពួកគាត់ក៏បាននាំគ្នាឡើងទៅពន្លត់ ដោយយកបំពង់ពន្លត់អគ្គីភ័យ ទៅបាញ់អស់ជាច្រើនធុង នៅតែមិនរលត់ ! មួយសន្ទុះក្រោយមក ទើបកម្លាំងរថយន្តពន្លត់ អគ្គីភ័យ មកដល់ហើយប្រតិបត្តិការពន្លត់បានទាន់ពេលវេលា ទាំងស្រុង ។ ក្នុងនោះមានរថយន្តពន្លត់អគ្គីភ័យរបស់កង រាជអាវុធហត្ថខេត្ត ០២ គ្រឿង រថយន្តពន្លត់អគ្គីភ័យស្នងការនគរបាលខេត្ត ០២គ្រឿង ផងដែរ ។
តាមការពិនិត្យរបស់សមត្ថកិច្ចជំនាញបានឲ្យដឹងថា ការឆាបឆេះនេះបណ្តាមកពីការឆ្លងចរន្តអគ្គិសនី ដោយកំហុសបច្ចេកទេស តភ្ជាប់ខ្សែរភ្លើងមិនត្រឹមត្រូវតាមស្តង់ដា ។
តាមការបញ្ជាក់របស់កម្លាំងសមត្ថកិច្ចបានឲ្យដឹងថា ការចុះមកជួយអន្តរាគម ពន្លត់គ្រោះអគ្គីភ័យលើក នេះ មានការលំបាក ដោយសាទីតាំងកើតហេតុនេះវាចូលទៅឆ្ងាយ ហើយផ្លូវតូចចង្អៀតទៀតផង មិនអាចចូលទៅពន្លត់ដល់ទីតាំងកើតហេតុ ! ត្រូវបានសហការគ្នាបញ្ចូលទឹកបន្តពីរថយន្តទៅរថយន្តមួយទៀត ដើមី្បបាញ់ទឹកពន្លត់ ដោយទ្រទ្រង់សភាពការណ៍នេះបានទាំងស្រុងនៅវេលាម៉ោង ២១ ។
សមត្ថកិច្ចបញ្ជាក់ថា អគ្គីភ័យឆាបឆេះនេះ មិនបណ្តាលឲ្យឆេះខូចខាតទ្រព្យសម្បត្តិបងប្អូនជូលផ្ទះនោះឡើយ ក៍ប៉ុន្តែរងគ្រោះ ដោយសាពុលផ្សែងភ្លើងចំនួន១នាក់ ដោយសាគាត់កង្វះនូវបច្ចេកទេសប្រើប្រាស់បំពង់ពន្លត់ ដែលបានធ្វើឲ្យគ្រោះថ្នាក់ដល់ខ្លួន ។
ក្នុងឱកាសនោះដែរ ក៏មានវត្តមានអញ្ជើញចុះពិនិត្យ និងជំរុញដល់ការពន្លត់ របស់ឯ.ឧ នូ ផល្លា ប្រធានក្រុមប្រឹក្សាខេត្តផងដែរ ៕
ប៊ុនធឿន (សៀមរាប)
