សាលាឧទ្ធរណ៍ ច្រានចោលពាក្យបណ្តឹងឧទ្ធរណ៍ របស់មេធាវីលោកហុង សុខហួរ

ភ្នំពេញ ៖ចៅក្រមតុលាការសាលាឧទ្ធរណ៍ បានសម្រេចច្រានចោលនូវបណ្តឹងឧទ្ធរណ៍របស់មេធាវីការពារក្តីលោក ហុង សុខហួរ សមាជិកព្រឹទ្ធសភាគណបក្សសមរង្ស៊ី នាព្រឹកថ្ងៃទី៣០វិច្ឆិកានេះ។ លោកមេធាវី បានប្តឹងទាស់នឹងសាលក្រមចាត់របៀប របស់សាលាដំបូងរាជធានីភ្នំពេញ ដែលបានបង្គាប់ឱ្យមេធាវី និងលោក ហុង សុខហួរ ផ្តល់ភស្តុតាងបន្ថែម មុនបើកសវនាការលើអង្គសេចក្តី។

សភាស៊ើបសួរសាលាឧទ្ធរណ៍បង្គាប់ឲ្យមេធាវីផ្តល់ឯកសារពាក់ព័ន្ធទាំងឡាយជូនតុលាការ ដូចការសម្រេចរបស់សាលាដំបូងរាជធានីភ្នំពេញ ដើម្បីបន្តនីតិវិធីកាត់ទោស លោក ហុង សុខហួរ សមាជិកព្រឹទ្ធសភាគណបក្ស សម រង្ស៊ី ដែលត្រូវដកអភ័យឯកសិទ្ធិ។

ក្រោយការសម្រេចរបស់សាលាឧទ្ធរណ៍ លោកមេធាវី ជូង ជូងី បានឲ្យដឹងថា ការសម្រេចនេះជារឿងមិនត្រឹមត្រូវ។ លោក ជូង ជូងី បានបញ្ជាក់ថា លោកនឹងពិភាក្សាជាមួយកូនក្ដី ដើម្បីដាក់ពាក្យបណ្ដឹងទៅតុលាការកំពូលបន្តទៀត។

ទាក់ទងសំណុំរឿងលោក ហុង សុខហួរ នេះសាលាដំបូងរាជធានីភ្នំពេញ ក៏បានចេញដីកាបង្គាប់ឲ្យលោក សម រង្ស៊ី ប្រធានគណបក្សសង្គ្រោះជាតិ ចូលខ្លួនឆ្លើយបំភ្លឺ នៅថ្ងៃទី៤ ខែធ្នូ ឆ្នាំ២០១៥ ខាងមុខនេះផងដែរ ដើម្បីសាកសួរពីរឿងសមគំនិតក្នុងអំពើក្លែងបន្លំឯកសារសាធារណៈ ប្រើប្រាស់ឯកសារក្លែង និងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ប្រព្រឹត្តនៅថ្ងៃទី១២ និងថ្ងៃទី១៣ ខែសីហា ឆ្នាំ២០១៥។

ការចេញដីកាបង្គាប់ឲ្យចូលខ្លួននេះ គឺពាក់ព័ន្ធការបង្ហោះសន្ធិសញ្ញាបំពេញបន្ថែមព្រំដែនកម្ពុជា វៀតណាម ឆ្នាំ១៩៧៩ ក្លែងក្លាយ និងវីដេអូឃ្លីបនៅលើផេក Facebook របស់លោក សម រង្ស៊ី។ ការបង្ហោះនេះជាដើមចម ដែលសមត្ថកិច្ចបានធ្វើការចាប់ខ្លួនលោក ហុង សុខហួរ សមាជិកព្រឹទ្ធសភាគណបក្ស សម រង្ស៊ី កាលពីថ្ងៃទី១៥ ខែសីហា ឆ្នាំ២០១៥៕

មេធាវីការពារជនជាប់ចោទ លោក ជួង ជូងី បានប្រាប់អ្នកព័ត៌មាន ក្រោយពីសវនាការ នៅតុលាការសាលាឧទ្ធរណ៍ថា ការសម្រេចរបស់ឧទ្ធរណ៍ នាពេលនេះ លោកនឹងជួបកូនក្តី ដើម្បីសម្រេចថា ប្តឹងឧទ្ធរណ៍ទៅកាន់តុលាការកំពូល ឬយ៉ាងណា?។

សូមបញ្ជាក់ថា លោក ហុង សុខហួរ ត្រូវបានសមត្ថកិច្ចចាប់ខ្លួន កាលពីព្រឹកថ្ងៃទី១៥ ខែសីហា ឆ្នាំ២០១៥ បន្ទាប់ពីបានបង្ហោះ និងធ្វើការបកស្រាយពីសន្ធិសញ្ញា ព្រំដែនកម្ពុជា-វៀតណាម ក្លែងក្លាយ នៅលើទំព័រហ្វេសប៊ុក លោកសម រង្ស៊ី ។ លោក ហុងសុខហួរ ត្រូវតុលាការឃុំខ្លួន នៅក្នុងពន្ធនាគារព្រៃស ក្រោមបទចោទប្រកាន់ចំនួន ៣ រួមមាន៖ បទក្លែងឯកសារសាធារណៈ ប្រើប្រាស់ឯកសារសាធារណៈក្លែងក្លាយ និងញុះញង់ឲ្យប្រព្រឹត្តបទឧក្រិដ្ឋជាអាទិ៍។ បទចោទប្រកាន់ទាំងនោះ នឹងត្រូវផ្តន្ទាទោស ដាក់ពន្ធនាគារចាប់ពី ៥ ឆ្នាំ ទៅ ១០ ឆ្នាំ។

សំណុំរឿងក្តីនោះ ក៏បានរាលដាលដល់លោកសមរង្ស៊ី ប្រធានគណបក្សសង្គ្រោះជាតិ ដែលកំពុងនិរទេសសនៅក្រៅប្រទេស។ តុលាការសាលាដំបូង រាជធានីភ្នំពេញ បានតម្រូវឲ្យលោកសមរង្ស៊ី ចូលខ្លួនឆ្លើយបំភ្លឺនៅព្រឹកថ្ងៃទី៤ ខែធ្នូ ឆ្នាំ២០១៥។សវនាការនេះគ្មានវត្តមានលោក ហុង សុខហួរ នោះទេ។