ប្រភពពត៌មានពីសមត្ថកិច្ចជំនាញផ្នែករដ្ឋបាលព្រៃឈើស្ទោងបានឲ្យដឹងថា បន្ទាប់ពីទទួលបានពត៌មានពីបណ្តាញសម្ងាត់ប្រាប់ថាមានរថយន្តលុចស៊ីស១គ្រឿងពណ៌ខ្មៅពាក់ផ្លាកលេខបាត់ដំបង 2A188កំពុងតែចរាចរណ៏ដឹកក្រញូងចេញមកពីខេត្តព្រះវិហារ ឆ្លងកាត់ខេត្តកំពង់ធំ ក៏រាយការណ៏សុំគោលការណ៍ពីលោកព្រះរាជអាជ្ញា លោកព្រះរាជអាជ្ញា អ៊ិត សុធា បានបញ្ជាឲ្យលោក សាយ ណូរ៉ា ព្រះរាជអាជ្ញារងដឹកនាំកំលាំងចំរុះមាន ផ្នែករដ្ឋបាលព្រៃឈើស្ទោង សង្កាត់រដ្ឋបាលព្រៃឈើកំពង់ស្វាយ កំលាំងនគរបាលសេដ្ឋកិច្ចខេត្តកំលាំងសឹករងកំពង់ធំ និងកំលាំងកងរាជអាវុធហត្ថខេត្តចុះស្ទាក់ចាប់បានរថយន្តខាងលើ ព្រមទាំងបុរស ២នាក់នៅចំនុចភូមិត្រពាំងចំបក់ ឃុំត្រពាំងឬស្សី ស្រុកកំពង់ស្វាយ នៅវេលា ម៉ោង ២:០០ នាទីរសៀល ថ្ងៃទី ០៩ ខែ មិថុនា ឆ្នាំ២០១៤ នាំយកមកកាន់ផ្នែករដ្ឋបាលព្រៃឈើស្ទោង ។
សមត្ថកិច្ចបានធ្វើការវាស់វែង ឃើញមានឈើប្រណិតប្រភេទក្រញូង នៅលើរថយន្តចំនួន១៥៣ដុំ ស្មើនិង០,៦៥៦ ម៉ែត្រគូប និងអ្នកបើកបរទី១ឈ្មោះ អ៊ឹម ធី ភេទប្រុសអាយុ៤៤ឆ្នាំ ជាមន្ត្រីយោធាបំរើការងារនៅកងពលតូចលេខ៧០ មានទីលំនៅផ្ទះលេខ៩៥C ផ្លូវលេខ៣ ភូមិ តំណាក់ត្រយឹង សង្កាត់ចោមចៅ ក្រុងភ្នំពេញជាម្ចាស់រថយន្ត ចំណែកបុរសម្នាក់ទៀតគឺជាជនជាតិយួន កាន់អត្តសញ្ញាណប័ណ្ណសញ្ជាតិខ្មែរលេខ ០៦១៦០៤៣៧៦ ឈ្មោះ សុខ សុធី ភេទប្រុស អាយុ៣៦ឆ្នាំរស់នៅភូមិព្រែកជីក សង្កាត់សំបូរមាស ក្រុងកំពង់ចាម ខេត្តកំពង់ចាម យកមកចងក្រងសំនុំរឿងបញ្ជូន ទៅកាន់សាលាតំបូងខេត្តកំពង់ធំដើម្បីចាត់ការតាមផ្លូវច្បាប់ ។
បើយោងតាមឯកសារទិញ និងលក់រថយន្ត សមត្ថកិច្ចជំនាញរកឃើញថា ចំពោះផ្លាកលេខដែលចាប់ជាប់និងរថយន្តនោះ គឺជាលេខក្លែងក្លាយ ដើម្បីបន្លំភ្នែកសមត្ថកិច្ច រីឯ ផ្លាកលេខរបស់រថយន្តលុចស៊ីសពិតប្រាកដគឺផ្លាកលេខ ភ្នំពេញ 2M 5943 ដែលត្រូវបានជនសង្ស័យដោះទុកក្នុងរថយន្ត ។ បើតាមការសន្និដ្ឋានរបស់សមត្ថកិច្ចចំពោះជនសង្ស័យឈ្មោះ អ៊ឹម ធី អាយុ៤៤ឆ្នាំ ជាមន្ត្រីយោធាបំរើការងារនៅកងពលតូចលេខ៧០រូបនេះ មិនមែនទើបតែរកស៊ីដឹកឈើក្រញូងជាលើកទី១នោះទេ បានជាមានជំនាញដោះដូរលេខរថយន្តរបៀបនេះ ដើម្បីបន្លំភ្នែកសមត្ថកិច្ច ៕
