អឺរ៉ុបត្រូវផ្អាក់ទទួលជនភៀសខ្លួន ក្រោយការវាយប្រហារភេរវកម្ម នៅបារាំង

ការវាយប្រហារនៅប្រទេសបារាំងនាពេលកន្លងមក បានធ្វើឲ្យប្រទេសទាំងអស់នៅតំបន់អឺរ៉ុប រឹតបន្តឹងព្រំដែនរបស់ខ្លួន មិនឲ្យមានការចេញចូលនោះឡើយ។
សកម្មភាពទាំងនោះហើយ អាចធ្វើឲ្យអឺរ៉ុបត្រូវបញ្ចប់ការទទួលជនភៀសខ្លួន ដែលបង្ករវិវាទនាពេលកន្លងមក។

កន្លងមកថ្មីៗនាយករដ្ឋមន្រ្តីបារាំង លោកManuel Valls បានវាយតម្លៃថា អឺរ៉ុបមិនអាចទទួលជនភៀសខ្លួនច្រើន តទៅទៀតបានទេ។សម្រាប់ប្រមុខរដ្ឋាភិបាលបារាំង អឺរ៉ុបត្រូវរឹតបន្តឹងការត្រួតពិនិត្យនៅតាមព្រំដែន ដើម្បីថែរក្សាការពារអនាគតអឺរ៉ុប។

នាយករដ្ឋមន្រ្តីបារាំងបង្ហាញជំហរ មិនស្វាគមជនភៀសខ្លួននៅមួយថ្ងៃមុន ស្សនកិច្ចនៅទីក្រុងប៉ារីសរបស់លោកស្រី
នាយករដ្ឋមន្រ្តីអាល្លឺម៉ង់ ដែលជាមាតាអឺរ៉ុបចិត្តល្អបើកដៃ ទទួលជនភៀសខ្លួនមកពីមជ្ឈឹមបូព៌ា។

អធិការបតីអាល្លឺម៉ង់លោកស្រី អង់ហ្គែឡាម៉ែរគែលមានវត្តមាននៅទីក្រុងប៉ារីស ទៅតាមការអញ្ជើញរបស់លោកប្រធានាធិបតី បារាំង ដែលកំពុងបើកយុទ្ធនាការគៀងគរប្រទេសមហា អំណាច ឲ្យចូលរួមនៅក្នុងសម្ព័ន្ធអន្តរជាតិជាធ្លុងមួយ ប្រយុទ្ធប្រឆាំងនឹងក្រុមជីហាតនៃអង្គការរដ្ឋអ៊ីស្លាម នៅប្រទេសស៊ីរី។ នៅក្នុងជំនួបនៅថ្ងៃពុធ ប្រមុខដឹកនាំបារាំង អាល្លឺម៉ង់ នឹងលើកនិយាយផងដែរ ពីសំណុំរឿងជនភៀសខ្លួន ដែលត្រូវគេផ្អឹបទុក មួយអន្លើដោយសារអំពើភេរវកម្មក្នុងទីក្រុងប៉ារីស។

អំពើភេរវកម្មមានជាប់ប្រទាក់ក្រឡាគ្នា នឹងបញ្ហាជនភៀសខ្លួន។កាលពីថ្ងៃអង្គារ នៅក្នុងបទ សម្ភាសន៍ ទៅកាន់អ្នកកាសែតបរទេស លោកនាយករដ្ឋមន្រ្តីបារាំង បានថ្លែងថា ដើម្បី ការពារអនាគតអឺរ៉ុប និងក្នុងមូលហេតុគំរាមកំហែងរបស់ក្រុមជីហាតអឺរ៉ុប ត្រូវឈប់ទទួលជនភៀសខ្លួន។
“អឺរ៉ុបត្រូវតែហ៊ាននិយាយថាខ្លួនមិនអាចទទួលជនភៀសខ្លួន ច្រើន តទៅទៀតទេ។ គឺវាមិនអាចទៅរួចទេ។អឺរ៉ុបត្រូវរកដំណោះស្រាយ ដើម្បីឲ្យជនភៀសខ្លួនស៊ីរី ត្រូវទទួលបន្ទុកដោយប្រទេសនៅជិតខាងស៊ីរី។” នេះជាការថ្លែងរបស់លោកនាយករដ្ឋមន្រ្តីបារាំង Manuel Valls៕