រតនគិរីៈឈើសុក្រំកំពុងរងនូវការកាប់បំផ្លាញយ៉ាងរង្គាល ពីក្រុមហ៊ុនទ្រីភាព ដែលមានឈ្មោះវែងជាមេការដេប៉ូឈើរបស់ក្រុមហ៊ុន
ឈរជើងនៅស្រុកអណ្តូងមាស ខេត្តរតនគិរី ប្រមូលទិញពីគ្រប់ទិសទីយកមកស្តុបទុកក្នុងដេប៉ូ ដើម្បីដឹកចេញទៅប្រទេសក្រៅ។
ការប្រមូលទិញឈើសុក្រំយ៉ាងអាណាធិបតេយ្យរបស់ឈ្មោះវែង ដោយពាក់ស្លាកក្រុមហ៊ុនទ្រីភាព ជំរុញឲ្យប្រជាពលរដ្ឋកាប់ឈើសុក្រំពេញព្រៃ
ចំណែកមេព្រៃនិងសមត្ថកិច្ច មិនហ៊ានក្អកព្រោះខ្លាចអំណាច រឺទទួលបានលាភសក្ការៈពីក្រុមហ៊ុនទ្រីភាពដ៏មហិមារ។
ក្រុមហ៊ុនទ្រីភាពស្រុកអណ្តូងមាស កំពុងមានឥទ្ធិពលក្នុងការប្រមូលទិញឈើសុក្រំ ពីក្រុមឈ្មួញកាងនឹងកាប់បំផ្លាញព្រៃ
ការពាររាប់ពាន់ម៉ែត្រគូប នាំចូលដេប៉ូទាំងយប់ ទាំងថ្ងៃ។ តាមប្រភពពីប្រជាពលរដ្ឋ ដែលរស់នៅស្រុកអណ្តូងមាសបាននិយាយថា សព្វថ្ងៃនេះមេដេប៉ូលឈ្មោះវែង និងប្អូនឈ្មោះបូ កំពុងបំផុសបំផុលប្រជាពលរដ្ឋអោយចូលព្រៃ អារឈើសុក្រំយកមកលក់ ខ្លួនជាអ្នកទិញ ដែលមានតម្លៃ៦០ម៉ឺនរៀលក្នុង១ម៉ែត្រគូប មេដេប៉ូរូបនោះបាននិយាយទៀតថា បើសិនជាមានសមត្ថកិច្ចណា
ចាប់ចងឃាត់ ខ្ញុំជាអ្នកទទួលខុសត្រូវ ព្រោះក្រុមហ៊ុនមានច្បាប់គ្រប់គ្រាន់ និងមានអាជ្ញាប័ណ្ណត្រឹមត្រូវក្នុងការនាំចូល
នឹងប្រមូលទិញ មិនខ្លាចញញើតឡើយ។
គួរបញ្ជាក់ផងដែរថា លោកវែងនិងបក្សពួក កំពុងក្លាយខ្លួនជា មេក្លោងឧក្រឹដ្ឋកម្មបំផ្លាញព្រៃឈើ ធ្វើការអោយលោកឧកញ៉ាទ្រី ភាពដែលបានអះអាងថា ឈប់រកស៊ីឈើ បំផ្លាញឈើទៀតហើយ តែបែរជាឲ្យឈ្មោះវែងប្រមូលទិញឈើសុក្រំយ់ាងអាណាធិបតេយ្យ បណ្តាលឲ្យមានការកាប់បំផ្លាញព្រៃឈើយ៉ាងធ្ងន់ធ្ងរ។
ពុំអាចទមនាក់ទំនង ឧកញ៉ា ទ្រី ភាពសុំការបំភ្លឺបានទេ ព្រោះពុំមានលេខទូរសព្ទ័៕
