ឈើចេញ តាមច្រកដាក់ដាំនិងកង់ឡង់ស្រុកអូរាំង យកទៅលក់នៅវៀតណាម ដូចព្យុះតែសមត្ថកិច្ចថាអត់មានទេ

ខេត្តមណ្ឌលគីរី ៖ កាលពីយប់ថ្ងៃទី២៣ ខែវិច្ឆិកា ឆ្នាំ២០១៥ ត្រង់ចំណុចផ្លូវបំបែក កង់ឡង់ មានករណីផ្ទុះអាវុធ ជាច្រើនគ្រាប់ ដែលគេសន្និដ្ឋានថាគឺជាទំនាស់គ្នារឿងយកលុយក្បាលឡានដឹកឈើឆ្លងដែនទៅប្រទេសវៀតណាម បន្ទាប់ពីគេដឹងថា ជំនួញឈើប្រណិត ចាប់កក្រើកឡើងវិញ នៅប៉ុស្តិ៍ដាក់ដាំ និងប៉ុស្តិ៍ កង់ឡង់ ក្នុងទឹកដីស្រុកអូររាំង ខេត្តមណ្ឌលគីរី។

ប្រជាពលរដ្ឋ បានរាយការណ៏ឲ្យដឹងថា ចាប់ពី ថ្ងៃទី២០ វិច្ឆិកា រហូតមកដល់ថ្ងៃទី២៣ គេឃើញ មានរថយន្ដដឹកឈើប្រណិត ចរាចរណ៍ទាំងយប់ទាំងថ្ងៃ ពី១០ ទៅ ២០គ្រឿង សុទ្ធតែរថយន្ដសេរីទំនើបម៉ាក លុចស៊ីស ឡង់គ្រីសរ័ ដាក់ឈើពេញៗប្រៀប សំរុកដឹកចេញទៅ ប្រទេសវៀណាម ។

សេចក្តីរាយការណ៏បានឲ្យដឹងទៀតថា ឈ្មោះ ជឿងជាជនជាតិវៀតណាមគឺជាមេឈ្មួញដុះស្លែដែលចូលមកទឹកដីខ្មែរ
ប្រមូលទិញឈើប្រណិតខុសច្បាប់ ដែលកន្លងមកធ្លាប់ប្រមូលទិញ នៅស្រុកអូររាំងហើយ ឈ្មោះ ជឿង ហ៊ានទិញឈើគ្រប់ប្រភេទ មានតម្លៃថ្លៃៗ ជាងឈ្មួញដ៏ទៃទៀត។

បច្ចុប្បន្នក្រុមឈ្មួញ កំពុងតែប្រមូលទិញឈើដឹក ចេញពីតំបន់ព្រៃ អភិរក្សជីវៈចម្រុះ WCS ចេញពីស្រុកអូររាំង នឹងចេញមកពីភូមិ
ពូតាំង និងពីទីរួមខេត្តមណ្ឌលគិរី យកទៅលក់ប្រទសវៀតណាម តាមច្រករបៀង កង់ឡង់ ដោយឆ្លងកាត់ពីក្រោយ បន្ទាយវរៈការពារព្រំដែនលេខ៦២១ តាមភូមិដាក់ដាំ ដោយរលូន និងគ្មានសមត្ថកិច្ចឬជំនាញណាទប់ស្កាត់នោះឡើយ
ដែលសង្ស័យថាជាឆ្នាំងស៊ុបទើបមិនបង្រ្កាប ។

លោក ខាត់ សាក មេបញ្ជាការសឹងរង ស្រុកអូររាំង ប្រាប់បណ្តាញព័តមានក្នុងស្រុកមួយអោយដឹងថា ពាក់ព័ន្ធករណីផ្ទុះអាវុធនោះ កម្លាំងទាហានរបស់លោក ពិតជាបានបាញ់កាំភ្លើងមួយគ្រាប់មែន។ ការបាញ់នោះ ព្រោះរឿងចោរលួចអង្រឹង និងសំភារះផ្សេងៗទៀត របស់ទាហានដែលឈរជើង ចាំបង្ក្រាបមិន ដូចការចោទប្រកាន់ ខាងលើនោះទេ។
ចំណែកលោក យ៉ូ សុធា មេប៉ុស្តិ៍ដាក់ដាំ បានបញ្ជាក់ប្រាប់ ថា បើសិនអ្នកព័ត៌មាន រកឃើញថា មានបទល្មើសចេញតាម ច្រកដែលលោកគ្រប់គ្រង សូមថតឲ្យបាន នឹងធ្វើការចុះផ្សាយ តាមវិជ្ជាជីវៈទៅ តែឲ្យត្រឹមត្រូវ បើព័ត៌មានមិនពិត ចេះតែផ្សាយ ប្រយ័ត្នមានរឿង ។

បញ្ហាការសំរុកនាំឈើប្រណិតខុសច្បាប់ទៅយួនតាមច្រករបៀងខាងលើ សូមឲ្យលោកស្នងការនគរបាលខេត្តនិងលោកនាយខណ្ឌ
រដ្ឋបាលព្រៃឈើខេត្តមណ្ឌលគិរីពិនិត្យមើលនិងចាត់វិធានការណ៏បង្រ្កាបផង កុំទុកចិត្តមន្រ្តីថ្នាក់ក្រោមពេក៕