រាជរដ្ឋាភិបាល ចេញអនុក្រឹត្យ សម្រេចដកចេញគម្រោងវិនិយោគ នូវក្រុមហ៊ុនវិនិយោគ សម្បទានដីសេដ្ឋកិច្ចចំនួន០៣ក្រុមហ៊ុន នៅខេត្តសៀមរាប និង១ក្រុមហ៊ុនទៀតកំពុងចុះអង្កេត !

ខេត្តសៀមរាប៖ នាព្រឹកថ្ងៃទី ១៩ ខែ វិច្ឆិកា ឆ្នាំ២០១៥នេះ នៅរដ្ឋបាលសាលាខេត្តសៀមរាប មានបើកកិច្ចប្រជុំស្តីពី ស្ថានភាពក្រុមហ៊ុនសម្បទានដីសេដ្ឋកិច្ច ក្នុងខេត្តសៀមរាប ក្រោមវត្តមានរបស់ ឯកឧត្តមឧបនាយករដ្ឋមន្ត្រី ប៊ិន ឈិន ប្រធានអាជ្ញាធរជាតិដោះស្រាយទំនាស់ដីធ្លី និង ជាប្រធានគណៈកម្មការអន្តរក្រសួង ដើមី្បត្រួតពិនិត្យ វាស់វែង និង វាយតម្លៃដីសម្បទានសេដ្ឋកិច្ច និងថ្នាក់ដឹកនាំមន្ទីរ អង្គភាព និង អាជ្ញាធរស្រុកពាក់ព័ន្ធផងដែរ ។

នៅក្នុងរបាយការណ៍ដែលបង្ហាញដោយឯកឧត្តម ឃឹម ប៊ុនសុង អភិបាលខេត្តសៀមរាប បានបញ្ជាក់ថា ខេត្តសៀមរាបមានផ្ទៃដីសរុប ១ ៥៤០ ៤៤២ ហិចតា ដែលមានក្រុមហ៊ុនសម្បទានដីសេដ្ឋកិច្ច មកវិនិយោគ ចំនួន ១៤ក្រុមហ៊ុន ស្ថិតនៅក្នុងភូមិសាស្ត្រ០៤ស្រុក គឺស្រុកវ៉ារិន បន្ទាយស្រី ស្វាយលើ និង ស្រុកជីក្រែង ហើយដីទាំងនោះស្ថិតក្រោមការគ្រប់គ្រងរបស់ក្រសួងបរិស្ថាន និង ក្រសួងកសិកម្មរុក្ខាប្រមាញ់ និង នេសាទ ។

របាយការណ៍ បានបន្តឲ្យដឹងថា ៖ យោងតាមកិច្ចប្រជុំ ពិនិត្យស្ថានភាពក្រុមហ៊ុនសម្បទានដីសេដ្ឋកិច្ច កាលពីលើកមុន និងក្រោមការណែនាំរបស់ឯកឧត្តមឧបនាយករដ្ឋមន្ត្រី ប៊ិន ឈិន ដោយឈរលើចំណុចសំខាន់មួយចំនួន ខេត្តបានចុះពិនិត្យ និងបានបើកកិច្ចប្រជុំវាយតម្លៃជាបន្តបន្ទាប់ ។

របាយការណ៍នោះ បានបញ្ជាក់ថា ដោយយោងតាមលទ្ធផលអង្កេតរបស់គណៈកម្មការអន្តរក្រសួង រាជរដ្ឋាភិបាលបានចេញ
អនុក្រឹត្យសម្រេចលុបចោលគម្រោងវិនិយោគ របស់ក្រុមហ៊ុនមួយចំនួន ដែលមិនបានអនុវត្តទៅតាមកិច្ចសន្យានៃការធ្វើវិនិយោគ ចំនួនចំនួន៣ ក្រុមហ៊ុន រួមមាន ក្រុមហ៊ុន ប៊ីវីប៊ី , ក្រុមហ៊ុន លីយ៉េរ៉ាប់ប៊ើ , ក្រុមហ៊ុនបានយ៉ាគ្រុប និង មួយក្រុមហ៊ុនទៀត កំពុងប្រឈមជាមួយនឹងការចុះធ្វើអង្កេត របស់គណកម្មការអន្តរក្រសួង ។

ក្នុងនោះដែរអនុគណៈកម្មការថ្នាក់ខេត្ត បានបន្តផែនការមួយជំហានទៀត គឺចុះពិនិត្យទៅលើក្រុមហ៊ុនចំនួន៤ទៀតបន្តទៀត រួមមាន ក្រុមហ៊ុន បៀនហៀកអ៊ិនវេសមេន ,ក្រុមហ៊ុន ស៊ី អរ ស៊ី ខេ ២ , ក្រុមហ៊ុនសំរោងរ៉ាប់ប៊ើ និង ក្រុមហ៊ុន អ៊ីចស៊ែល ខាសធើរ ដែលវិនិយោគលើដំណាំកៅស៊ូ ។

នៅក្នុងកិច្ចប្រជុំ នាព្រឹកថ្ងៃទី១៩ វិច្ឆិកានេះ ឯកឧត្តម ប៊ិន ឈិន លើកឡើងថា ចំពោះ បណ្តាក្រុមហ៊ុនសម្បទានដីសេដ្ឋកិច្ចណាមួយ ដែលមិនព្រមអនុញ្ញាត ឲ្យក្រុមការងារនៃគណៈកម្មការចូលទៅត្រួតពិនិត្យនោះ គឺត្រូវកំណត់ឲ្យបានច្បាស់ ដើមី្បគណៈកម្មការថ្នាក់ជាតិ មានវិធានការចំពោះក្រុមហ៊ុននោះ ។ ឯកឧត្តម ក៏បានលើកផងដែរថា ៖ រាល់ដីសម្បទានសេដ្ឋកិច្ចដែលរាជរដ្ឋាភិបាលបានលុប
ហើយនោះ គឺត្រូវគ្រប់គ្រងដោយក្រសួងបរិស្ថាន និង អាជ្ញាធរខេត្ត រួមទាំងរដ្ឋបាលព្រៃឈើផងដែរ ។

ឯកឧត្តម ក៏បានលើកឡើងនូវគោលការណ៍មួយចំនួន ដើមី្បជាទុនសម្រាប់អនុគណៈកម្មកាថ្នាក់ខេត្តកំណត់អំពីផលប៉ះពាល់មួយ
ចំនួនរបស់ក្រុមហ៊ុនសម្បទានដីសេដ្ឋកិច្ច ទៅលើផលប្រយោជន៍របស់ប្រជាពលរដ្ឋ និង សម្បត្តិធម្មជាតិនៅក្នុងតំបន់នោះ និង កំណត់ឲ្យបានត្រឹមត្រូវ អំពីទំហំផ្ទៃដីដាំដុះរបស់ក្រុមហ៊ុន ដែលទទួលបានផ្ទៃដីសម្បទានដីសេដ្ឋកិច្ចពីរដ្ឋ ឲ្យបានច្បាស់លាស់ ហើយនៅពេលខាងមុខនេះគណៈកម្មការ ថ្នាក់ជាតិ នឹងចុះទៅត្រួតពិនិត្យតាមក្រុមហ៊ុនទាំងនោះ ជាបន្តបន្ទាប់ ។

ឯកឧត្តមឧបនាយករដ្ឋមន្ត្រី ប៊ិន ឈិន បានសង្កត់ធ្ងន់បន្ថែម ទៅលើបណ្តាក្រុមហ៊ុនសិក្សារុករករ៉ែនៅក្នុងភូមិសាស្ត្រមួយចំនួន
ក្នុងខេត្តសៀមរាប ដែលបានធ្វើឲ្យមានផលប៉ះពាល់ ដល់ផលប្រយោជន៍របស់ប្រជាពលរដ្ឋក្នុងតំបន់ទាំងនោះ គឺត្រូវតែមានការ
ប៉ះប៉ូវជូនដល់ប្រជាពលរដ្ឋវិញ ។ ឯកឧត្តម ក្រើនរំលឹក ដល់់គ្រប់បណ្តាមន្ទីរ អង្គភាពពាក់ព័ន្ធទាំងអស់ ត្រូវរួមសហការគ្នា ក្នុងការចុះត្រួតពិនិត្យ និង គ្រប់គ្រង់ទីតាំងទាំងនោះឲ្យបាន ព្រមទាំងត្រូវកំណត់ពេលវេលាក្នុងការសិក្សា រុករករ៉ែដើមី្បកុំឲ្យបងប្អូន
ប្រជាពលរដ្ឋ មានការព្រួយបារម្ភ លើការបាត់បង់ដីអាស្រ័យផលរបស់ពួកគាត់ ឬក៏ធ្វើឲ្យមានការថ្នាំងថ្នាក់ដល់រាជរដ្ឋាភិបាល ៕

ប៊ុនធឿន (សៀមរាប)