កោះកុង ៖ តាមប្រភពព័តមានពីប្រជាពលរដ្ឋបានឲ្យដឹងថា ល្បែងស៊ីសងខុសច្បាប់ជាច្រើនមុខដូចជាបញ្ជល់មាន់និង
ល្បែងយូគីរួមទាំងប្រភេទល្បែងអាប៉ោងជាដើមផងដែរ កំពុងបើកលែងយ៉ាងចំហរពេញបន្ទុក ស្ថិតនៅក្នុងបរិវេណសួនសត្វ របស់ក្រុមហ៊ុន( L.Y.P ) ដែលមានទីតាំងក្នុងភូមិចាំយាម ឃុំប៉ាក់ខ្លង ស្រុកមណ្ឌលសីមា ខេត្តកោះកុង ។
តាមប្រភពពីប្រជាពលរដ្ឋនៅក្នុងខេត្តអោយដឹងថា បច្ចុប្បន្ននេះមានពលរដ្ឋនិងមន្ត្រីរាជការជាច្រើននាក់នៅក្នុងខេត្តកោះកុង កំពុងតែវក់ញៀននិងល្បែងអស់ទាំងនោះ ហើយម្ចាស់ទីតាំងជល់មាន់និងល្បែងយូគីរួមទាំងអាប៉ោងនេះក៏ជាមន្ត្រីរបស់
ការិយាល័យតំណាងរាស្រ្តមណ្ឌលកោះកុងនោះដែរ ។
ប្រភពដដែលបញ្ជាក់ឱ្យដឹងដែរថា ម្ចាស់បនល្បែងអស់ទាំងនោះ បានជួលដីទីតាំងដែលជ្រកក្រោមស្លាកសួនសត្វរបស់ក្រុមហ៊ុន( L.Y.P )បើកលេង ពុំសូវមានប្រជាពលរដ្ឋចូលទៅលេងទេ ប៉ុន្តែភាគច្រើនគឺសុទ្ធតែជាថា្នក់មន្ត្រីរាជការនិងអ្នកជំនួញ
ធំៗដែលចូលទៅលេងនៅទីក្នុងនោះ ។
លោកជា លាងហេង ដែលជាមន្ត្រីការិយាល័យតំណាងរាស្រ្ត និងជាម្ចាស់បនល្បែងស៊ីសងខាងលើបានប្រាប់បណ្តាញព័ត៌មានក្នុងស្រុក
មួយឱ្យដឹងថា បនល្បែងនេះ គឺមានច្បាប់អនុញ្ញាតិត្រឹមត្រូវ ថែមទាំងមានការចុះហត្ថលេខាអនុញ្ញាតិពីលោកអភិបាលខេត្ត
និងសម្តេចអគ្គមហាសេនាបតីតេជោហ៊ុន សែន ទៀតផងដែរ ។
ប្រភពព័តមានឲ្យដឹងទៀតថា ការបើកលេងល្បែងស៊ីសងខាងលើនេះ គឺពុំមានការចុះហត្ថលេខាពីលោកអភិបាលខេត្តនោះទេ ហើយលោកអភិបាលខេត្ត ក៏ពុំហ៊ានចុះហត្ថលេខា អោយបើកបនល្បែងបែបនេះដែរ ។
ទាក់ទិនទៅនិងការកើតមានប្រភេទល្បៃងស៊ីសងនៅសួនសត្វខាងលើនោះបណ្តាញអ្នកយកព័ត៌មានយើងពុំអាចទំនាក់ទំនងសុំការបំភ្លឺពីសំណាក់លោកអភិបាលខេត្តបានទេ ។
គួបញ្ជាក់ផងដែរថា កាលពីថ្ងៃទី១ខែវិច្ឆិកាឆ្នាំ២០១៥ សម្តេចអគ្គមហាសេនាបតីតេជោហ៊ុន សែននាយករដ្ឋមន្ត្រីនៃ
ព្រះរាជាណាចក្រកម្ពុជា បានចេញអនុសាស្រ្តនៅក្នុងពិធីសំណេះសំណាលជាមួយនិវត្តន៏ជននិងជនពិការនៅមណ្ឌលអភិវឌ្ឍន៏យោធិន
ពិការលេខ៣១៧ តាកែនកោះស្លានិងជាថ្ងៃបើកបវេសនកាលថ្មីសំរាប់ឆ្នាំសិក្សា២០១៥,២០១៦ដោយព្រមានថា
( មន្ត្រីរាជការទាំងអស់ដែលញៀននិងល្បែងស៊ីសង ត្រូវដកខ្លួនជាបន្ទាន់ ) ។ ហើយការកើតមានល្បែងបញ្ជល់មាន់ ល្បែងយូគី និងល្បែងអាប៉ោង ដែលបើកដំណើរការបើកលេងយ៉ាងរលូន នៅក្នុងទីបរិវេណសួនសត្វកោះកុងនោះ ត្រូវបានគេរិះគន់ថា ជាការប្រឆាំងទៅនិងច្បាប់និងអនុសាស្ត្ររបស់នាយករដ្ឋមន្ត្រី ៕
