ខេត្តកំពង់ធំ ៖ លោកវរៈសេនីយ៏ត្រី ឃុន ប៊ុនហូរ មេបញ្ជាការមូលដ្ឋាន កងរាជអាវុធហត្ថស្រុកស្ទោង ខេត្តកំពង់ធំ បានឲ្យដឹងថា ដោយទទួលបានបទ បញ្ជាពីលោក ឧត្តមសេនីយ៏ត្រី ហង្ស ថុល មេបញ្ជាការកងរាជអាវុធហត្ថខេត្ត កំលាំងរបស់លោកចំនួន ៥ នាក់ ចុះធ្វើការ កាលពីរសៀលថ្ងៃទី០៦ខែមិថុនាឆ្នាំ២០១៤ ប្រទះ ឃើញរថយន្ត១គ្រឿងពាក់ផ្លាកលេខ ង៤៤០៥ ភ.ព២ នៅចំនុចភូមិស្លាក់ក្រាញ់ ឃុំសំព្រោច ស្រុកស្ទោង ខេត្តកំពង់ធំ សុំធ្វើការត្រួតពិនិត្យ សមត្ថកិច្ច ក៏ប្រទះឃើញមានឈើក្រញូងក៏នាំយកមកកាន់មូលដ្ឋានកងរាជអាវុធហត្ថស្រុកស្ទោង ទាំងរថយន្ត រួមជាមួយនិងអ្នកបើកបរម្នាក់ ឈ្មោះ ស្រៀង វណ្ណី ភេទប្រុស អាយុ៤៧ឆ្នាំ រស់នៅភូមិតាំងក្រង ឃុំស្វាយទាប ស្រុកចំការលើ ខេត្តកំពង់ចាម ។
នៅចំពោះមុខសមត្ថកិច្ចជនសង្ស័យបានសាភាពថា ៖ ខ្លួនទើបតែប្រព្រឹត្តជាលើកទី ១ ដោយសារខ្លួនមកលេងខេត្តសៀមរាប ក៏ទិញឈើបន្តិចបន្តួចនេះយកទៅធ្វើជា គ្រឿងសង្ហារឹមដាក់លំអផ្ទះនៅស្រុកកំណើត ក៏ត្រូវបានសមត្ថកិច្ចចាប់ខ្លួនតែម្តង ។
សមត្ថកិច្ចធ្វើការវាស់វែងមានឈើក្រញូងចំនួន ១៤ ដុំ ទម្ងន់១៧៥គីឡូក្រាម ស្មើនិង០,១៤៥ម៉ែត្រគូបប្រគល់ឲ្យ ផ្នែករដ្ឋបាលព្រៃឈើស្ទោងដើម្បីបញ្ជូនជនសង្ស័យបន្តរទៅកាន់សាលាតំបូងខេត្តចាត់ការតាមផ្លូវច្បាប់ ៕
ដោយ ៖ សុផាត
