អ៊ីវែង និងបក្ខពួក កំពុងប្រមូលទិញឈើសុក្រំទាំងស្របច្បាប់ និងមិនស្របច្បាប់ ឱ្យក្រុមហ៊ុនទ្រីភាព នៅស្រុកអណ្តូងមាស

ខេត្តរតនគីរី ៖ លោកឧកញ៉ា ទ្រី ភាពដែលរងភាពអាស្រូវកាប់បំផ្លាញព្រៃឈើបានអះអាងថា ឈប់ដឹកនិងធ្វើអាជីវកម្មរកស៊ីឈើទៀតហើយ កាលពីពេលកន្លងទៅ
តែសាធារណៈជនមិនរំពឹងថាជាការពិតឡើយ ក្នុងពេលដែលគេសង្កេតឃើញនៅតែ មានក្រុមមេការខ្លះរបស់ឧកញ៉ានៅតែលេចមុខយ៉ាងសកម្មប្រមូល
ទិញឈើប្រណិតដដែល។

ជាមួយគ្នានេះដែរ លោកឧកញ៉ា ទ្រី ភាព ក៏បានប្រកាសថានឹង ចាប់ខ្លួនចំពោះអ្នកដែលយកឈ្មោះក្រុមហ៊ុន ទ្រី ភាព ទៅរកស៊ីឈើទៀតផងតែមកទល់ពេលនេះ
ក្រុមហ៊ុនមិនបានអនុវត្តន៏តាមការប្រកាសរបស់ខ្លួនឡើយ។

តាមប្រភពព័ត៌មានបានឱ្យដឹងថា នៅភូមិលោម ឃុំម៉ាលិច ស្រុកអណ្តូងមាស ខេត្តរតនគីរី មានឃ្លាំងស្តុកឈើដ៏ធំមួយកន្លែង របស់ក្រុមហ៊ុនទ្រី ភាព ដែលកំពុងប្រមូលឈើប្រណីតពីគ្រប់ទិសទី យកមកស្តុកទុកនៅឃ្លាំងនោះ សម្រាប់ដឹកចេញទៅក្រៅ ។

ការប្រមូលទិញឈើប្រណីត និងឈើប្រភេទលេខ ១ របស់ក្រុមហ៊ុន ទ្រី ភាព នៅខេត្តរតនគីរី បញ្ជាក់ឱ្យឃើញយ៉ាងច្បាស់ថា ការប្រកាសរបស់ឧកញ៉ា ទ្រី ភាព ថា ឈប់ប៉ះពាល់ឈើ គឺជាការប្រកាសខ្យល់គ្មានការពិតទាល់តែសោះ ជាក់ស្តែងក្រុមហ៊ុន មួយនេះ នៅតែជម្រុញឱ្យមានការកាប់បំផ្លាញព្រៃឈើយ៉ាងរង្គាលនៅកម្ពុជា ។

ប្រភពព័ត៌មានខាងលើ បានឱ្យដឹងទៀតថា មេការក្រុមហ៊ុន ទ្រី ភាព មើលការខុសត្រូវឃ្លាំងនៅភូមិលោមមានឈ្មោះអ៊ីវែងដែលកំពុងប្រមូលទិញឈើយ៉ាង
អនាធិបតេយ្យ បញ្ចូលឃ្លាំងទាំងយប់ទាំងថ្ងៃ ដែលអាចឱ្យព្រៃឈើនៅតំបន់នោះត្រូវរលាយ ក្នុងរយៈពេលដ៏ខ្លីខាងមុខនេះ ។
ឈ្មោះ អ៊ីវែង បានប្រកាសជាចំហរ ទិញឈើសុក្រំដែលជាឈើប្រភេទលេខ ១ មានមុខកាត់ ២៥សង្ទីម៉ែត្រឡើងទៅ ដោយ សារឈើប្រណីតដូចជា គ្រញូង ធ្នង់ បេង នាងនួន អស់រលីង ទើបក្រុមហ៊ុន ទ្រី ភាព បែរជាមកស៊ីឈើសុក្រំម្តងវិញ បណ្តាល ឱ្យឈើប្រភេទនេះ ត្រូវបានកាប់បំផ្លាញយ៉ាងគំហុកនៅក្នុងព្រៃសហគមន៍
របស់ជនជាតិភាគតិចរឺច្រើន ជាពិសេសនៅតំបន់ ឧទ្យានជាតិវិរៈជ័យជាដើម ។

ទន្ទឹមនឹងនោះដែរ ឈ្មោះ អ៊ីវែង បានចាត់តាំងឱ្យឈ្មោះ បូ ដើរប្រមូលទិញឈើសុក្រំ ពីប្រជាពលរដ្ឋយកមកបញ្ចូលឃ្លាំង ហើយការទិញឈើនេះពួកគេមិនខ្វល់
ឈើចេញមកពីប្រភពណាទេ គឺគេទិញទាំងអស់ ទង្វើនេះផ្ទុយពីបំរាមរបស់រាជរដ្ឋាភិ បាលដែលអនុញ្ញាតឱ្យប្រមូលទិញឈើតែក្នុងព្រៃសម្បទានសេដ្ឋកិច្ចតែប៉ុណ្ណោះ ជៀសវាងការបំផ្លាញព្រៃឈើជាទូទៅ ។

មេការទ្រីភាពឈ្មោះ អ៊ីវែង បានឱ្យដឹងតាមទូរស័ព្ទថា ការប្រមូលទីញឈើយកមកស្តុកទុកនៅឃ្លាំងខាងលើ គឺក្រុមហ៊ុនទ្រី ភាព មានអាជ្ញាប័ណ្ណត្រឹមត្រូវទើបគេហ៊ានទិញ បើចង់ដឹងច្បាស់ទៅសួរក្រុមហ៊ុនទៅ ចំណែកខ្លួនលោកគ្រាន់តែជាអ្នកមើល ឃ្លាំងតែប៉ុណ្ណោះ ។ មួយវិញទៀតឈើដែលប្រមូលទិញគឺទិញចេញពីតំបន់ក្រុមហ៊ុន
សម្បទានសេដ្ឋកិច្ចមួយចំនួនដូចជា ក្រុមហ៊ុនហ៊ង អាញ់ វៀតណាម, ក្រុមហ៊ុន ហេងប្រាឌ័រ ហើយបើចង់ច្បាស់ទៅសួរអ្នកកាប់ផ្ទាល់តែម្តងទៅ ។

ប្រភពព័ត៌មានបានឱ្យដឹងថា ឈើប្រណីត និងឈើប្រភេទលេខ ១ នៅក្នុងព្រៃសម្បទានសេដ្ឋកិច្ចរបស់ក្រុមហ៊ុនខាងលើ ពុំមាននៅសេសសល់ឡើយ ចំណែកក្រុមហ៊ុនទ្រី ភាពដែលមានមេការឈ្មោះ អ៊ីវែង កំពុងប្រមូលទិញឈើអនាធិបតេយ្យ មិនមានប្រភពច្បាស់លាស់ដូចជា ឈើនៅក្នុងព្រៃសហគមន៍ជនជាតិភាគតិចនិងនៅឧទ្យាន
ជាតិវិរៈជ័យជាដើម ដោយយក អាជ្ញាប័ណ្ណក្រុមហ៊ុនមកបិទបាំង អំពើឧក្រិដ្ឋបំផ្លាញព្រៃឈើរបស់ខ្លួនយ៉ាងធ្ងន់ធ្ងរតែប៉ុណ្ណោះ ។

តាមការអះអាងពីប្រជាពលរដ្ឋឱ្យដឹងថា មានថៅកែចិន កំពុងដេកចាំទិញឈើសុក្រំចំនួន ៥ពាន់ម៉ែត្រគូប ទើបឈ្មោះ អ៊ីវែង តាមបញ្ជារបស់ក្រុមហ៊ុន ទ្រី ភាព សម្រុកប្រមូលទិញឈើសុក្រំយ៉ាងគគ្រឹកគគ្រេងដូចព្យុះកំបុតត្បូង ដោយមេការខាងលើ ទិញទាំងអស់ និងមិនខ្វល់ពីឈើកាប់ចេញមកពីប្រភពណាឡើយ ព្រោះមិនដែលទៅមើលត្រង់ស៊ីន័រកាប់នោះទេ ។

បញ្ហាឧក្រិដ្ឋកម្មព្រៃឈើដ៏ធ្ងន់ធ្ងរនេះ ត្រូវតែលោកអភិបាលខេត្តរតនគីរី និងលោក វង្ស សុខសេរី នាយខណ្ឌរដ្ឋបាលព្រៃឈើ ខេត្ត ពិនិត្យមើលសកម្មភាពទិញឈើប្រណីត និងប្រភេទលេខ ១ យ៉ាងអនាធិបតេយ្យរបស់ឈ្មោះ អ៊ីវែង និងបក្ខពួកដែល ជម្រុញឱ្យឈ្មួញកាប់បំផ្លាញព្រៃឈើយ៉ាងគំហុករឺមួយអស់លោកខ្លាចឥទ្ធិពលរបស់
ក្រុមហ៊ុនទ្រីភាព ទើបសម្ងំស្ងៀមមិនហ៊ាន ក្អក ទុកឱ្យព្រៃឈើរលាយហិនហោចអស់ ទើបធ្វើជាស្រែកថា ទប់ស្កាត់នោះ ។

យើងពុំអាចធ្វើការទំនាក់ទំនងជាមួយក្រុមហ៊ុន ទ្រីភាព សុំការបំភ្លឺបានឡើយ ព្រោះពុំមានលេខទូរស័ព្ទ ចំពោះ ការប្រមូលទិញឈើយ៉ាងអនាធិបតេយ្យ របស់ក្រុមហ៊ុននៅខេត្តរតនគីរី ខុសពីការប្រកាសថា ឈប់ពាក់ព័ន្ធជំនួញឈើ ទៀតហើយ របស់លោកឧកញ៉ា ទ្រី ភាព ៕