ប៉ោយប៉ែត ៖ តាមប្រភពព័ត៌មានពីបណ្តាញព័ត៌មានក្នុងស្រុកមួយឱ្យដឹងថា ក្រុមកម្មករអូសរទេះនៅប៉ោយប៉ែត ត្អូញត្អែថាគយបង្ករការលំបាកដល់ពួកគាត់ ហើយពួកគាត់ មានគំរោងនឹងធ្វើបាតុកម្មជាថ្មីនៅឯច្រកទ្វារអន្តរជាតិប៉ោយប៉ែត និងនៅខាងមុខស្នាក់ការគយនិងរដ្ឋាករ ក្នុងពេលដ៏ខ្លីខាងមុខនេះ ដើម្បីតវ៉ាពីការគាបសង្កត់ពីសំណាក់មន្ត្រីគយ មកលើពួកគាត់ ទាក់ទងនឹងការដឹកជញ្ជូនទំនិញនិងការបង់ពន្ធជូនរដ្ឋ ។
ក្រុមអាជីវករ និងអ្នកអូសរទេះបានឱ្យដឹងថា គយដែលឈរជើងនៅចំណុចត្រួតពិនិត្យយកពន្ធចំណុចផ្សាររ៉ា បាននិងកំពុង គាបសង្កត់ទារយកលុយពីពួកគាត់ជាប្រចាំ ហើយពួកគាត់ មិនដែលតវ៉ាអ្វីនោះទេ តែលោកគយ ខាងលើគាត់ឱ្យរើទំនិញ ដែលដឹកលើទ្រុង ចេញឱ្យនៅត្រឹមស្មើទ្រុងរទេះ ទើបអាចឱ្យទៅមុខបាន ។
លោកគយតម្រូវឱ្យទំនិញដែលរើចេញ ពីរទេះនោះទៅដាក់លើរទេះកង់បី ហើយ គេឱ្យម្ចាស់ទំនិញចេញលុយជូនទៅម្ចាស់រទេះកង់បីម្តងទៀតដោយគេយក ក្នុងមួយរទេះចំនួន១៥០បាតឯណោះ ហើយរើ ម្តងៗគឺមានចំនួន៣ទៅ៦រទេះឯណោះ សួរថា តើឱ្យពួកគាត់ដែលជាកម្មករអូសរទេះក្រីក្រ គ្មានសល់លុយកម្លាំងពលកម្មដើម្បី ដោះស្រាយ ចិញ្ចឹមគ្រួសាររបស់គាត់នោះទេ បើលោកគយធ្វើបាបយ៉ាងដូច្នេះ ។
ក្រុមអូសរទេះ និងក្រុម អាជីវករនាំគ្នាបំរុងធ្វើបាតុកម្មនោះគឺជា ក្រុមដែលធ្លាប់បានតវ៉ា ជាច្រើនលើករួចមក ហើយ តាំងពីលោក ជួប អេន និងលោកឈួន ហៃ នៅធ្វើជាមេគយច្រកប៉ោយប៉ែតមកម៉្លេះ ឥឡូវនេះលោក ហ៊ុយ សុជាតិផ្លាស់ មកកាន់កន្លែងនេះដែលជាកន្លែងខ្លាញ់ ត្រូវបានមតិសាធារណៈ ថា កំពុងតែដើរតាមគន្លងរបស់មេគយមុនដដែល ដោយគាបយកលុយធ្វើឱ្យកម្មករអូសរទេះរងទុក្ខលំបាក លើផ្នែកជីវភាពក្នុងគ្រួសារជាដដែល ។
លោកហ៊ុយ សុជាតិ ប្រធានស្នាក់ការគយ រដ្ឋាករច្រកទ្វារអន្តរជាតិប៉ោយប៉ែត ដែលទើបឡើងថ្មីបានឱ្យបណ្តាញ ព័ត៌មានក្នុងស្រុកមួយដឹងថា សព្វថ្ងៃនេះគឺគេអនុវត្តតាម គោលការណ៍ពង្រឹងយកពន្ធដោយខានមិនបាន ឯបញ្ជារើ ទំនិញចេញពីរទេះ នោះគឺខាងលោកមិនដឹងទេ តែការធ្វើនោះវាក៏គ្មានអ្វីធ្ងន់នោះដែរ តែលោកនឹងឱ្យកូនចៅជួយបន្ធូរ បន្ថយលើការគាបសង្កត់លើម្ចាស់ទំនិញ និងអ្នកអូសរទេះ ។
គួរបញ្ជាក់ថា ករណីកម្មករអូសរទេះ ធ្វើបាតុកម្មនៅច្រកព្រំដែនប៉ោយប៉ែតនាពេលកន្លងមក បានបង្កឱ្យមានភាពរំជើបរំជួល មួយចំហៀងនគរម្តងរួចមកហើយ រហូតបណ្តាល ឱ្យមានអំពើហិង្សានិងបាត់បង់ចំណូលពន្ធចូលរដ្ឋយ៉ាងច្រើន មកដល់ពេល នេះ សំណុំរឿងនៃការធ្វើបាតុកម្មហិង្សាដុត បំផ្លាញ ស្នាក់ការគយ មិនទាន់ត្រូវបានដោះស្រាយនៅឡើយទេ ហើយជន សង្ស័យមួយចំនួនត្រូវបានរត់គេចខ្លួនដែរ។ ឥឡូវនេះក្រុមកម្មករអូសរទេះព្រមាន ធ្វើបាតុកម្មម្តងទៀត ក្នុងសំណុំរឿងដដែល គឺការដែលគយគាបសង្កត់មកលើក្រុមកម្មករអូសរទេះនោះ ។ ប៉ុន្តែ សម្រាប់មន្ត្រីគយនិយាយថា គេគ្រាន់តែ អនុវត្តទៅតាម ច្បាប់តែប៉ុណ្ណោះ ។ ឈ្មួញ មួយចំនួនដែលនាំទំនិញចូលពីថៃ ក៏បានខ្ចីដៃកម្មករអូសរទេះមក ធ្វើជាឈ្នាន់ដើម្បីផល ប្រយោជន៍របស់ខ្លួនផងដែរ ។ បញ្ហានេះសុំឱ្យសមត្ថកិច្ចជំនាញយកចិត្តទុកដាក់ដោះស្រាយផង កុំទុកឱ្យទឹកដល់ច្រមុះទើបស្រវេស្រវានោះ ជាពិសេសសុំជួយមើលជីវភាពកម្មករអូសរទេះផង៕
