ខេត្តព្រះវិហ៊ារ៖ ជនរងគ្រោះឈ្មោះ ឌុល ខុម អាយុ២៧ឆ្នាំ ត្រូវបានជនមិនស្គាល់មុខកាប់ជាច្រើនកាំបិតផ្គាក់ ស្លាប់ភ្លាមៗនៅក្នុងព្រៃ ខណៈពេលដែលជនរងគ្រោះ ស្នាក់នៅក្នុងព្រៃដើម្បីអារឈើ នៅចំណុចអូរដាច់កន្ទប ឋិតក្នុងតំបន់ព្រៃព្រះរកា ភូមិសាស្រ្តភូមិបុះធំ ឃុំប្រមេរ ស្រុកត្បែងមានជ័យ ខេត្តព្រះវិហារ កាលពីវេលាម៉ោង១១នឹង៣០នាទីយប់ ថ្ងៃទី៩ ខែវិច្ឆិកា ឆ្នាំ២០១៥នេះ ។
តាមការបញ្ជាក់ឲ្យដឹងពី មន្រ្តីនគរបាលបុស្តិ៍រដ្ឋបាល ឃុំប្រមេរ បានឲ្យដឹងនៅថ្ងៃទី១០ ខែវិច្ឆិកា ឆ្នាំ២០១៥ម្សិលមិញនេះថា ជនរងគ្រោះឈ្មោះ ឌុល ខុម អាយុ២៧ឆ្នាំ មានប្រពន្ធ មានកូនប្រុស២នាក់ នៅក្នុងបន្ទុក រស់នៅភូមិស្វាយប៉ាត ឃុំរំដោះ ស្រុករវៀង ខេត្តព្រះវិហារ មុខរបរជាកម្មករស៊ីឈ្នួលអារឈើ បានមកស្នាក់នៅឃុំប្រមេរ រយៈពេល៣ថ្ងៃមកហើយ មុនថ្ងៃកើតហេតុជនរងគ្រោះ មានគ្នា៤នាក់ បាននាំគ្នាចូលព្រៃព្រះរកា ដើម្បីអារជ្រៀកឈើយកមកលក់នៅក្នុងភូមិ លុះមកដល់ថ្ងៃកើតហេតុ វេលាម៉ោង១១នឹង៣០នាទីយប់ថ្ងៃទី៩ ខែវិច្ឆិកា នោះ ជនរងគ្រោះនឹងគ្នីគ្នា បានចងអង្រឹងដេក ក្នុងព្រៃ ក៏ស្រាប់តែមានជនមិនស្គាល់មុខ ទាញកាំបិតផ្គាក់ សម្តៅមករកតែជនរងគ្រោះខាងលើ កាប់ជាច្រើនកាំបិតទៅលើជនរងគ្រោះ ខណៈពេលដែលកំពុងដេកលង់លក់ក្នុងអង្រឹង ស្លាប់ភ្លាមតែម្តង រួចជនល្មើសក៏រត់គេចខ្លួនបាត់ស្រមោលទៅ ។ សមត្ថកិច្ចបន្តថា ក្រោយកើតហេតុ រហូតមកដល់វេលាម៉ោង៩ព្រឹកថ្ងៃទី១០ ខែវិច្ឆិកានេះ ទើបគ្នីគ្នាជនរងគ្រោះបានដឹកសាកសព ចេញពីក្នុងព្រៃ ហើយរាយការណ៍ទៅ សមត្ថកិច្ច ដើម្បីកំណត់មុខសញ្ញា ស្វែងរកចាប់ខ្លួនជនដៃដល់ មកផ្តន្ទាទោសតាមផ្លូវច្បាប់ ។
បើតាមការសន្និដ្ឋានរបស់សមត្ថកិច្ច ជុំវិញការស្លាប់របស់ជនរងគ្រោះខាងលើ អាចពាក់ព័ន្ធនឹងរឿងគំនុំរកស៊ីអាឈើតែម្តង ទើបឈានដល់ការសម្លាប់
យ៉ាងសាហាវឃោឃៅបែបនេះ ។
សូមបញ្ជាក់ថា តាមការបង្ហើបឲ្យដឹងពីសមត្ថកិច្ចថា មកដល់ពេលនេះ សមត្ថកិច្ចកំណត់បានមុខសញ្ញាជនសង្ស័យហើយ ប៉ុន្តែពេលនេះជនសង្ស័យ កំពុងលាក់ខ្លួននៅក្នុងព្រៃជ្រៅ តែទោះជាយ៉ាងណាសមត្ថកិច្ច កំពុងតែតាមស្ទាក់ចាប់ជនសង្ស័យយ៉ាងក្តៅគគុក ដើម្បីយកមកផ្តន្ទាទោសតាមនីតិវិធីច្បាប់ ។
