កងកម្លាំងប្រដាប់អាវុធទិសយោធភូមិភាគទី១ ទទួលបាននូវសេចក្តីនឹករលឹក និងការយកចិត្តទុកដាក់ដ៏ខ្ពង់ខ្ពស់ នៃសម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន !

យោធភូមិភាគទី១៖ រសៀលថ្ងៃទី១០ ខែវិច្ឆិកានេះ ឯកឧត្តម ហ៊ុន ម៉ាណែត តំណាងដ៏ខ្ពង់ខ្ពស់ នៃសម្តេចអគ្គមហាសេនាបេតីតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន អមដំណើរដោយឯកឧត្តម ខេង សុមេធ អគ្គស្នងការរងនគរបាលជាតិ បានអញ្ជើញជួបសំណេះសំណាល នាំយកសេចក្តីនឹករលឹកនៃសម្តេចទាំងពីរ ផ្ញើជូនកងកម្លាំងប្រដាប់អាវុធទិសយោធភូមិភាគទី១ ក្នុងនោះរួមមានកងទ័ព កងនគរបាលជាតិ កងរាជអាវុធហត្ថ មកពីបណ្តាខេត្តចំណុះទាំង៣ ( ស្ទឹងត្រែង មណ្ឌលគីរី និង រតនគីរី ) ។

ជាមួយនឹងការចុះសួរសុខទុក្ខសំណេះសំណាលនេះ ក៏បាននាំយកទៅជាមួយនូវអាវរងារមួយចំនួនធំ ដែលជាអំណោយដ៏ថ្លៃថ្លា នៃសម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ឧបត្ថម្ភជូន កងកម្លាំងប្រដាបអាវុធនៃបណ្តាខេត្ត ចំណុះទិសយោធភូមិភាគទី១នោះផងដែរ ដែលពីធីជួបជុំសំណេះសំណាលនេះ បានធ្វើឡើងនៅខេត្តស្ទឹងត្រែង ។

ឯកឧត្តម ហ៊ុន ម៉ាណែត មានប្រសាសន៍ថា សម្រាប់ការជួបគ្នាជាមួយកងកម្លាំងប្រដាប់អាវុធ គ្រប់បណ្តាទិសយោធភូមិភាគទូទាំងប្រទេស ដែលជាកម្មវិធីពិសេសនោះ គឺ១ឆ្នាំ មាន២ដង ( រដូវវស្សា និង រដូវរងារ ) ។ ឯកឧត្តម បានបញ្ជាក់ថា ការជួបគ្នាក្នុងរដូវវស្សា គឺដើម្បីនាំយកអាវភ្លៀង អង្រឹង ផ្ញើជូនកងទ័ព កងនគរបាលជាតិ និងកងរាជអាវុធហត្ថ ហើយសម្រាប់ការជួបគ្នាក្នុងរដូវរងារ គឺដើម្បីបានផ្ញើជូនអាវរងារ ដែលរដូវទាំងពីរនេះ វាមានបញ្ហាប្រឈមចំពោះសុខភាព ។ ជាមួយគ្នានោះ ដោយឡែកសម្រាប់អង្គភាព តំបន់ប្រតិបត្តិការសឹករងមណ្ឌលគីរី សម្តេចតេជោ និង សម្តេចកិត្តិព្រឹទ្ធបណ្ឌិត បានផ្តល់អំណោយរថយន្ត១គ្រឿង ។

ឯកឧត្តម លើកឡើងថា សម្តេចតេជោ នាយករដ្ឋមន្រ្តីនៃព្រះរាជាណាចក្រកម្ពុជា ស្គាល់ច្បាស់ណាស់អំពី សុខទុក្ខរបស់កងទ័ព និងតម្រូវការរបស់កងទ័ព ក្រៅពីការបំពេញកាតព្វកិច្ចដ៏ឧត្តុងឧត្តម ការពារបូរណភាព ដែនដីនៃមាតុភូមិ គឺនៅបន្តសហប្រតិបត្តិការ ជាមួយកម្លាំងនគរបាលជាតិ កងរាជអាវុធហត្ថ ដើម្បីសេចក្តីសុខសាន្តជូនប្រជាពលរដ្ឋ ដើម្បីសុខសុវត្ថិភាព សណ្តាប់សង្គមផងដែរ ៕
ប៊ុនធឿន ( សៀមរាប)