ខេត្តកោះកុង ៖ ប្រភពពីប្រជាពលរដ្ឋបានឱ្យដឹងថា នៅក្នុងឃុំថ្មស ស្រុកបុទុមសាគរ ខេត្តកោះកុង អាជ្ញាធរឃុំថ្មស ធ្វើសំបុត្រកំណើតយកលុយពីប្រជាពលរដ្ឋក្នុងម្នាក់ ១៤ម៉ឺនរៀល ទៅ ១៥ម៉ឺនរៀល ហើយថ្លៃអ្នកសរសេរ ១ម៉ឺនរៀលទៀត ក្នុងមួយ នាក់ៗ អាជ្ញាធរឃុំថ្មស យកលុយពីការធ្វើសំបុត្រកំណើត ជាយូរមកហើយគ្មានដឹងទេ គឺយកលុយស្ងាត់ៗ ។
តាមប្រភពច្បាស់ការ ពីប្រជាពលរដ្ឋបានឱ្យដឹងថា នៅសាលាឃុំថ្មសនេះ ពីមុនមកមានស្មៀនឃុំត្រឹមត្រូវទេ តែឥឡូវមិនមានស្មៀនឃុំទេ ដោយសារតែមានវិវាទមិនត្រូវគ្នាក្នុងឃុំថ្មស ពីរឿងលុយកាក់ ទើបស្មៀនចាកចេញទៅបាត់យូរឆ្នាំហើយ សព្វថ្ងៃនេះនៅតែក្រុមប្រឹក្សាឃុំជំនួសស្មៀនឃុំទៅវិញ ។
ក្រុមប្រឹក្សាឃុំមួយរូបឈ្មោះ គឹម ជឿង និងអ្នកជំនួយការម្នាក់ទៀត ឈ្មោះ ស្មាន់ ហាន់ ជាអ្នកសរសេរតាមបញ្ជាឈ្មោះ គឹម ជឿង ជាក្រុមប្រឹក្សាឃុំ និងតាមបញ្ជាលោកមេឃុំ អិក គួន ផងដែរ ។
តាមសំដីរបស់ក្រុមប្រឹក្សាឃុំឈ្មោះ គឹម ជឿង បាននិយាយថា គាត់ពិតជាបានយកលុយមែន គឺយកលុយត្រឹមតែ ១៤ម៉ឺនរៀលទេ ក្នុងមួយនាក់ និងថ្លៃសរសេរ ១ម៉ឺនរៀលទៀត គឺ ១៥ម៉ឺនរៀល គាត់យកលុយនោះ ថ្នាក់លើជាអ្នកឱ្យយកលុយ តើចង់យ៉ាងម៉េច ! នេះជាសំដីរបស់ក្រុមប្រឹក្សាឃុំថ្មស ពេល អ្នកសារព័ត៌មានខលទៅសួរឈ្មោះ គឹម ជឿង ថា ពិតជាយកលុយមែន ។
តាមសំដីរបស់ប្រជាពលរដ្ឋក្រីក្រពីរគ្រួសារនៅក្នុងឃុំថ្មស ស្រុកបុទុមសាគរ ខេត្តកោះកុង គឺអ្នកមីងឈ្មោះ សុខ រឿន ពីរនាក់ ប្តី-ប្រពន្ធ រកស៊ីរុញរទេះលក់សាច់គោអាំងយ៉ាងវេទនាក្រីក្រណាស់ រកមួយថ្ងៃស៊ីមួយថ្ងៃ ខំដើម្បីរកប្រាក់ចិញ្ចឹមកូនក្រុមគ្រួសារ អ្នកមីង សុខ រឿន រស់នៅក្នុងឃុំថ្មស ចាប់តាំងពីឆ្នាំ ១៩៩៣ មកម៉្លេះ ដោយសារជីវភាពខ្វះខាតពេក មិនបានធ្វើ សំបុត្រកំណើតទេ ហើយក៏មិនមានអត្តសញ្ញាណប័ណ្ណថែមទៀត ។ ដោយសារឮថា គេធ្វើសំបុត្រកំណើតមួយនាក់ យកលុយ ១៥ម៉ឺនរៀល ថ្មីៗនេះពីរនាក់ ប្តី-ប្រពន្ធ ខំសន្សំប្រាក់យកលុយមកធ្វើសំបុត្រកំណើត នៅថ្ងៃទី ២៨ ខែតុលា ឆ្នាំ២០១៥ នោះ គាត់ថា មេភូមិយកលុយ ៤០០០០រៀល និងក្រុមប្រឹក្សាឃុំថ្មស ឈ្មោះ គឹម ជឿង យកលុយគាត់ ១៥ម៉ឺនរៀល ពីរនាក់ ប្តី-ប្រពន្ធ អស់ ៣០ម៉ឹនរៀលថ្មីៗ ។
ចំណែកក្រុមគ្រួសារម្នាក់ទៀត រស់នៅក្នុងឃុំថ្មស ដូចគ្នាក៏មានជីវភាពខ្វះខាតក្រីក្រដែរ ប្តីឈ្មោះ ចាន់ ភារិទ្ធ ប្រពន្ធឈ្មោះ អ៊ូច ចាន់ថា ដោយសារមានជីវភាពខ្វះខាតខ្លាំងពេក មិនបានធ្វើសំបុត្រកំណើតតាំងពីមុនមកដែរ ដោយសារគេយកលុយថ្លៃ ពីរនាក់ ប្តី-ប្រពន្ធអស់ ៣០ម៉ឺនរៀល ក្រុមគ្រួសារមួយនេះ មានកូនពីរនាក់ ស្រី១ ប្រុស១ ធ្វើសំបុត្រកំណើតទាំងសៀវភៅ ស្នាក់នៅអស់លុយសរុប ៨៦ម៉ឺនរៀល ក្នុងមួយគ្រួសារ ។ ក្រុមគ្រួសារឈ្មោះ អ៊ូច ចាន់ថា នេះធ្វើសំបុត្រកំណើត នៅថ្ងៃទី ២៨ ខែតុលា ឆ្នាំ២០១៥ ថ្មីៗនេះ ។
អ្នកសារព័ត៌មានបានតេទូរស័ព្ទ ទៅសួរលោកមេឃុំថ្មស ឈ្មោះ អិក គួន ពីរឿងធ្វើសំបុត្រកំណើត គាត់ថា គាត់មិនបានដឹងទេ រឿងយកលុយសំបុត្រកំណើតមួយ ១៥ម៉ឺនរៀលនេះ បើអ្នកណាគេយកលុយច្រើន គឺអ្នកនោះទទួលខ្លួនឯងទៅ គាត់ថា បើយ៉ាងខ្លាំងអស់តែ ៤០០០០រៀលទេ សំបុត្រកំណើតនោះ នេះជាសំដីរបស់មេឃុំថ្មស លោក អិក គួន ។
ការឃុបឃិតគ្នាយកលុយពីសំបុត្រកំណើត ពិតជាអំពើពុករលួយខ្លាំងណាស់ នៅក្នុងឃុំថ្មសមួយនេះ ដែលមានប្រជាពលរដ្ឋរស់នៅក្នុងឃុំនេះ ជាងមួយពាន់គ្រួសារ ។ ក្រុមប្រឹក្សាឃុំថ្មស ឃុបឃិតគ្នា យកលុយពីប្រជាពលរដ្ឋរាប់សិបឆ្នាំមកហើយ មិនដែលថ្នាក់លើចុះមកត្រួតពិនិត្យទេ ។ សូមលោកអភិបាលស្រុកបូទុមសាគរ លោក អន ភារៈ និងលោកអភិបាលខេត្ត កោះកុង ប៊ុន លើត ចុះមកមើលប្រជាពលរដ្ឋនៅឃុំថ្មសនេះផង ធ្វើសំបុត្រកំណើត និងសៀវភៅស្នាក់នៅថ្លៃណាស់ ។
សូមឱ្យក្រសួងមហាផ្ទៃ ចុះមកត្រួតពិនិត្យឃុំថ្មសម្តង បើមិនអញ្ចឹងទេ មុខជាខូចមុខថ្នាក់ដឹកនាំអស់ហើយ ដែលលោកខំធ្វើល្អ ដូចជា សម្តេច ហ៊ុន សែន លោកខំប្រឹងប្រែងណាស់ បើសិនទុកឱ្យជនខិលខូច ឃុបឃិតធ្វើបាបប្រជាពលរដ្ឋ អាណត្តិក្រោយមុខ
ជាខូចមុខមាត់ ក្នុងជួរគណបក្សប្រជាជនកម្ពុជាអស់ ហើយដោយសារជនខិលខូចឆ្លៀតឱកាសយកផលចំណេញ និងជញ្ជក់ ឈាមពីប្រជាពលរដ្ឋដូចហុតឈាមខ្ចងយ៉ាងអញ្ចឹង ៕
