ខេត្តបន្ទាយមានជ័យ៖ យោធាថៃ ចាប់ពលករខ្មែររាប់ពាន់នាក់ ដែលកំពុងស្នាក់និងធ្វើការនៅតាមរោងចក្រ កម្មករសំណងផ្សេងៗតាមចាប់គ្រប់ទីកន្លែងក្នុងប្រទេសថៃ ចាប់បញ្ជូនតាមច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ ខណះប្រទេសថៃ ជួបវិប្បត្តិនយោបាយ ហេតុការនេះវេលាម៉ោង២រសៀល ថ្ងៃទី០៩ ខែមិថុនា ឆ្នាំ២០១៤នេះ។
បើតាមការសង្កេតឃើញថា ពលករស្របច្បាប់ និង មិនស្របច្បាប់ ត្រូវ របបយោធា ក្រោមការដឹកនាំ របស់លោក ប្រាយុទ្ធ ចាន់អូរចា មេទ័ពថៃចាប់បញ្ជូនត្រូវបានគេចាត់ទុកថា ជាអំពើររំលោភសិទ្ធិមនុស្ស ពេលសកម្មភាពពេលចាប់ពលរដ្ឋខ្មែរ បើរត់គឺត្រូវយោធាចាប់វាយធ្វើបាប និងបាញ់សម្លាប់ផងដែរ។
ប្រភពពីពលករបានប្រាប់ថា ពួកគាត់ត្រូវបានសមត្ថកិច្ចចាប់បញ្ជូនមកវិញ បានអះអាងថា យោធាថៃ គឺទាហានឈុតខ្មៅ ទាហានប៉ារ៉ា បើទោះបីជាពួកគាត់ ទៅធ្វើការស្របច្បាប់ មានលិខិតឆ្លងដែនត្រឹមត្រូវ ក៏ត្រូវពួកទាហានទាំងនោះ យកហែកចោល និងបាន យកកាំភ្លើង ភ្ជង់ក្បាល ពួកគាត់ឲ្យឡើងឡាន មានដូចជារថយន្ត ដឹកបន្លែ រថយន្តបែនដឹកដី រថយន្តទ្រុងដឹកអ្នកទោស បញ្ជូនមកតាមច្រកខ្លងលឹក ឈមនិងច្រកទ្វារអន្តរចាតិប៉ោយប៉ែត មួយថ្ងៃមិនតិចជាង២០រថយន្តទេ ក្នុងមួយឡានប្រមាណជាង៥០នាក់ឯណោះ។
ប្រភពដដែកបានបន្តថា រយះពេលបីថ្ងៃនេះ ទាហានថៃ បានដេញចាប់ ពលករខ្មែរ គ្រប់ទីកន្លែង ទាំងបង្ខំ បើរត់បាញ់ចោល ពេលចាប់បានវាយធ្វើបាបដូចសត្វធាតុ។ តាមប្រភពព័ត៌មានមួយ ដែលកំពុងតែស្រាវជ្រាវ បានឲ្យដឹងថា ពលរដ្ឋខ្មែរ ប្រុសស្រីប្រមាណជា០៦នាក់ ត្រូវទាហានថៃបាញ់សម្លាប់ នៅខេត្តឈុនបុរី ពេលដែលគេដេញចាប់ អ្នកខ្លះបានរត់ទៅពួនតាមដុប តាមព្រៃ តាមលូទឹកស្អុយ ដាច់បាយ ក្រហាយទឹកជាច្រើនម៉ោងនិងតាមកន្លែងផ្សេងៗ។
បើតាមប្រភពដោយឡែកបានបង្ហើបថា ក្រោយពីគេបានឃើញទិដ្ឋភាពដូចខាងលើ បានទូរសព្ទ័មកប្រាប់សាច់ញាតិគ្រួសារ និងមិត្តភក្តិរបស់ខ្លួន ដែលគេចាប់បញ្ជូនមកមុន សុំជួយទំនាក់ទំនង អាជ្ញារមានសមត្ថកិច្ច និងអង្គការជាតិ អន្តរជាតិ និងមន្ត្រីអង្គទូត ដែលប្រចាំ ប្រទេសថៃ ជួយពួកគាត់ផង។
អ៊ុំប្រុសម្នាក់ជាពលករលួចឆ្លងដែនខុសច្បាប់ ឈ្មោះសុំ គយ ភេទប្រុស អាយុ៥៥ឆ្នាំចំណាកស្រុកទៅធ្វើការជាកម្មករសំណង់ នៅខេត្តឈុនបូរី ប្រទេសថៃនិងមានលំនៅភូមិជុំបូរី ឃុំព្រះនេត្រព្រះ ស្រុកព្រះនេត្រព្រះ ខេត្តបន្ទាយមានជ័យបានប្រាប់ឲ្យដឹងថា កាលពីម្សិលមិញនេះ រូបគាត់ត្រូវបានថៅកែថៃឲ្យមកកាន់ប្រទេសកម្ពុជាវិញ ពីព្រោះប្រទេសគេកំពុងមានវិបត្តិនយោបាយ ព្រមទាំងមានរដ្ឋប្រហាយោធាផងដែរ ជាពិសេសរាជរដ្ឋាភិបាលគេ បានប្រកាសថា បើប្រជាជនថៃណាហ៊ានលួចឲ្យពលករខ្មែរនៅធ្វើការងារ នឹងលំនៅឋាន គឺប្រឆាំងនិងរាជរដ្ឋភិបាល ដូច្នេះថៅកែគាត់សម្រេចចិត្តឲ្យរូបគាត់មកកាន់ប្រទេសបណ្តុះអាសន្នសិន ចាំសភាពការណ៍ស្ងាត់រូបគាត់និងទៅកាន់ប្រទេសថៃវិញធ្វើដូចដើម។
លោក ស៊ុម ចាន់គា ប្រធានអង្គការសិទ្ធិមនុស្ស អាដហុក ប្រចាំខេត្តបន្ទាយមានជ័យបានប្រាប់ឲ្យដឹងតាមទូរស័ព្ទថាករណីខាងលើនេះគឺ ចាត់ទុកថា បើថៃធ្វើដូច្នេះ មានន័ថា ថៃកំពុងប្រព្រឹត្តបទឧក្រិដ្ឋកម្មប្រឆាំងមនុស្សជាតិ បើទោះពលករ ស្របច្បាប់ក្តី មិនស្របច្បាប់ក្តី ត្រូវអនុវត្តន៍តាមច្បាប់។ បើគាត់មានលិខិតឆ្លងដែនត្រឹមត្រូវ យោធាថៃ មិនត្រូវហែកចោលទេ និងរហូតមានអ្នករត់បាញ់ចោល និងវាយតំទាត់ធាក់ប្រើអំពើរហិង្សា ជាអំពើររំលោភសិទ្ធិមនុស្សយ៉ាងធ្ងន់ធ្ងរ ៕
