ចាប់តាំងពីព្រឹកព្រលឹមថ្ងៃអាទិត្យ ទី៨វិច្ឆិកា ប្រទេសមីយ៉ាន់មារ ដែលជាសមាជិកអាស៊ាន បានចាប់ផ្តើមដំណើរការ នៃការបោះឆ្នោតជាសកល ដោយមានអ្នកសង្កេតការណ៍បោះឆ្នោតអន្តរជាតិជាង ១ម៉ឺននាក់ ចូលរួម។ អ្នកបោះឆ្នោត ជាប្រជាជនភូមា សរុបមានប្រមាណជាង ៣៣ លាននាក់ ក្នុងចំណោមប្រជាជនភូមាសរុបជាង ៥០ លាននាក់។
ទីភ្នាក់ងារព័ត៌មានអន្តរជាតិ បានរាយការណ៍ពីការបោះឆ្នោតជាសកល នៅទូទាំងប្រទេសភូមា ខណៈដែលពិភពលោក បានចាប់អារម្មណ៍យ៉ាងខ្លាំង។ ការិយាល័យបោះឆ្នោត នៅទូទាំងប្រទេស បានដំណើរការ បើកទ្វារទទួលអ្នកបោះឆ្នោតជាធម្មតា។
យោធាភូមា បានផ្ទេរអំណាចទៅឲ្យរដ្ឋាភិបាលស៊ីវិល ដឹកនាំប្រទេស ដោយមានលោក ធេន សេន ជាប្រធានាធិបតី កាលពីឆ្នាំ២០១១ ក្រោយការបោះឆ្នោតសកល លើកទី១ កាលពីឆ្នាំ២០១០។
សម្រាប់ការបោះឆ្នោត នៅថ្ងៃអាទិត្យ ទី៨វិច្ឆិកានេះ មានគណបក្សនយោបាយចូលរួម ជាង ៩០ បានចូលរួមប្រជែងយកអាសនៈរដ្ឋសភា សរុបចំនួន ៦៦៤ អាសនៈ។ ក៏ប៉ុន្តែក្នុងរដ្ឋធម្មនុញ្ញភូមា បានកំណត់ផ្តល់អាសនៈចំនួន ២៥% ស្មើនឹង ១៦៦ អាសនៈ ក្នុងចំណោមអាសនៈសរុប ៦៦៤ ទៅឲ្យក្រុមយោធា។
ក្នុងការបោះឆ្នោតនៅថ្ងៃអាទិត្យនេះ លោកស្រី អ៊ុង សានស៊ូជី ប្រមុខដឹកនាំគណបក្សប្រឆាំង NLD បានចេញទៅបោះឆ្នោត ខណៈដែលលោក ធេនសេន ប្រមុខដឹកនាំគណបក្សកាន់អំណាច USDP ដែលមានយោធានៅពីក្រោយ ក៏បានទៅបោះឆ្នោតផងដែរ។
នៅមុនការបោះឆ្នោតនេះមួយថ្ងៃ លោកប្រធានាធិបតី ធេនសេន បានប្រកាសពីការទទួលយកលទ្ធផលនៃការបោះឆ្នោត ហើយក្រុមយោធា ក៏បានត្រៀមខ្លួន រៀបចំរដ្ឋាភិបាលថ្មី ទោះបីជាគណបក្សណាឈ្នះការបោះឆ្នោតក៏ដោយ៕
