ខេត្តត្បូងឃ្មុំ៖ កាលពីវេលាម៉ោង៧ព្រឹកថ្ងៃទី០៣ខែវិច្ឆិកាឆ្នាំ២០១៥កន្លងទៅនេះ មានរថយន្តប្រភទយីឌុបមួយគ្រឿងគ្មានស្លាកលេខ ដឹកឈើប្រណិតប្រភេទសុក្រំបង្កប់ឈើក្រញូងពីក្រោម ចេញពីក្រុមហ៊ុនខ្មែរអង្គរស្ថិតក្នុងស្រុកស្នួលខេត្តក្រចេះ បានក្រឡាប់នៅភូមិក្រវៀន ឃុំជ្រៃឡើង ស្រុកមេមត់ខេត្តត្បូងឃ្មុំ បណ្តាលឲ្យស្ទះចរាចរពេញមួយថ្ងៃ គ្មានឃើញមន្រ្តីជំនាញរដ្ឋបាលព្រៃឈើខេត្តត្បូងឃ្មុំណាម្នាក់ ចុះមកពិនិត្យសួនាំនោះឡើយ មិនត្រឹមតែប៉ុណ្ណោះសូម្បីតែសមត្ថកិច្ចដ៏ទៃទៀតក៏ស្ងាត់សូន្សឈឹងដែរ ដូចជាត្រូវថ្នាំសណ្តំអញ្ចឹង ។
សមត្តកិច្ចដែលមិនបានទទួលលាភសក្ការៈ បានបង្ហើបប្រាប់អ្នកកាសែតថា រថយន្តយីឌុបដឹកឈើប្រណិតខុសច្បាប់ខ្នាតយក្សក្រឡាប់នេះ គឺជារបស់ឧកញ៉ាខ្នារដែលជាឧកញ៉ាល្បីឈ្មោះ ដោយសារមុខរបរកាប់និងជួញព្រៃឈើនៅតំបន់ភូមិភាគឥសាន្ត ពិសេសខេត្តកំពង់ចាមនិងត្បូងឃ្មុំយ ទៅលក់នៅប្រទេសវៀតណាម ដោយមានមេការឈ្មោះភក្ត័ ជាអ្នករត់ការដុះស្លែសំរបសំរួលបង់លុយឲ្យសមត្ថកិច្ច និងមន្ត្រីជំនាញដែលប្រចាំការតាមដងផ្លូវជាហូរហែ ។
សកម្មភាពនៃការដឹកជញ្ជូនឈើខុសច្បាប់ តាមរថយន្តតូចនិងរថយន្តធំ នៅខេត្តភូមិភាគឥសាន្តចូលខេត្តក្រចេះឆ្លងកាត់ស្រុកមេមត់ខេត្តត្បូងឃ្មុំ ចេញទៅស្រុកយួននៅតែកើតមានយ៉ាងគគ្រឹកគគ្រេង បើទោះបីមានបទបញ្ជានាយករដ្ឋមន្ត្រី ឲ្យទប់ស្កាត់បង្ក្រាបក៏ដោយ។មូលហេតុគឺដោយសាក្រុមឈ្មួញ មានមុខរបរកាប់និងជួញឈើខុសច្បាប់ ដែលបានឡើងជាឧកញ៉ាអស់ទៅហើយនោះ និងសមត្តកិច្ចពិសេសមេព្រៃរបស់លោកឆេងគឹមសុន មានការឃុបឃឹតចែកផលប្រយោជន៏គ្នាតែម្តង។
ទន្ទឹមនោះដែរ ដោយគ្មានមន្ត្រីជំនាញឬសមត្ថកិច្ចពាក់ព័ន្ធនៃ ខេត្តត្បូងឃ្មុំរបស់លោកប្រាជ្ញចន្ទ័ ចុះទៅត្រួតពិនិត្យរថយន្តក្រឡាប់នោះ ទើបបានធ្វើឲ្យការដឹកជញ្ជូនឈើខុសច្បាប់របស់ឧកញ៉ាខ្នារ បានចេញទៅដល់គោលដៅដោយសុវត្ថិភាព។
តាមសេចក្តីរាយការណ៏បានឲ្យដឹថា រាល់ពេលដឹកជញ្ជូនឈើខុសច្បាប់ មេការបានផ្តល់ដំណឹងជាមុនទៅសមត្ថកិច្ចហើយ នៅពេលរថយន្តដឹកជញ្ជូនឈើឆ្លងកាត់ប៉ុស្តិ៍ត្រួតពិនិត្យទាំងនោះ បន្ទាប់មកទើបគេយកប្រាក់ទៅបង់តាមក្រោយយ៉ាងរលូន ទើបការដឹកជញ្ជូនឈើខុសច្បាប់ មិនដែលមានឧបសគ្គម្តងណាឡើយហើយ ឧកញ៉ាខ្នារក្លាយខ្លួនទៅជាអ្នករកស៊ីឈើនិងអ្នកបំផ្លាញព្រៃឈើដ៏មហិមារមួយរូបក្នុងចំណោមឈ្មួញរកស៊ីឈើខុសច្បាប់ធំ។
លោកឆេងគឹមសុនប្រតិភូរាជរដ្ឋភិបាលទទួលបន្ទុករដ្ឋបាលព្រៃឈើ និង លោកប្រាជ្ញចន្ទ័ចៅហ្វាយខេត្តត្បូងឃ្មុំ រងការរិះគន់ថាយកបទបញ្ជារតេជោ ស្តីពីការបង្ក្រាបបទល្មើសព្រៃឈើ ទុកចោលក្នុងថតតុដោយមិនអនុវត្តន៏ ព្រោះឡានដឹកឈើខុសច្បាប់របស់ឧកញ៉ាខ្នារ មិនមែនខូចឬក្រឡាប់តែម្តងហ្នឹងទេ គឺមានច្រើនដងហើយ តែងតែរលូនរហូត សមត្ថកិច្ចធ្វើមើលមិនឃើញទាំងអ្នកធំទាំងអ្នកតូច បើមិនឃុបឃឹតគ្នាពុករលួយទេ ម៉េចឧកញ៉ាខ្នារដឹកឈើរលូនទៅរួច បើរថយន្តក្រឡាប់ផ្អើលម៉ាចំហៀងនគរ។
