ខេត្តសៀមរាប៖ រថយន្ត LEXUS – 470 មួយគ្រឿង ដែលកើតចេញពីទឹកចិត្តសទ្ធានៃឯកឧត្តម ខេង សុមេធ និងលោកជំទាវ បាននាំយកទៅប្រគេនដោយផ្ទាល់ ចំពោះព្រះតេជគុណ សន សារិទ្ធិ ព្រះគ្រូចៅអធិការវត្ត ព្រិន្ទ នៅភូមិក្រសាំង សង្កាត់ជ្រាវ ក្រុងសៀមរាប នាព្រឹកថ្ងៃទី០៥ ខែវិច្ឆិកាឆ្នាំ២០១៥នេះក្រោមការចូលរួម
អនុមោទនា ពីសំណាក់អាជ្ញាធរក្រុង សង្កាត់ ផងដែរ ។
ឯកឧត្តម ខេង សុមេធ មានប្រសាសន៍ថា ៖ ផ្អែកលើការរីកចម្រើនរបស់សង្គមជាតិ ទាំងវិស័យពុទ្ធចក្រ និងអាណាចក្រ ការធ្វើដំណើរបច្ចុប្បន្ន គឺមានតម្រូវការមធ្យោបាយជាចាំបាច់ សូម្បីតែក្នុងជីវភាពដ៏សាមញ្ញានៃគ្រួសារប្រជាពលរដ្ឋ នៅទីជនបទ ប្រមាណជា៧០% អាចនឹងមានទោចក្រយានយន្ត១គ្រឿង សម្រាប់ធ្វើដំណើរទៅកាន់ទីប្រជុំជន ។ ឯកឧត្តម បានបន្តថា ៖ អាស្រ័យដោយធាតុពិតយ៉ាងដូច្នេះ ចំពោះព្រះសង្ឃវិញ ក្នុងកិច្ចការប្រតិបត្តិប្រចាំថ្ងៃ វិន័យ សាសនា និងសង្គម រមែងតែងតែត្រូវនិមន្តទៅកាន់ទីជិត ទីឆ្ងាយ ចៀសមិនរួចនោះឡើយ ហើយព្រះសង្ឃឯណា នឹងអាចប្រើប្រាស់បច្ច័យពុទ្ធបរិស័ទ ដោះស្រាយបញ្ហាទាំងនេះ ដូច្នេះហើយ ទើបមានកើតនៃសទ្ធា នាំយកមធ្យោបាយធ្វើដំណើរ មានរថយន្ត១គ្រឿងនេះ ប្រគេនចំពោះព្រះគ្រូចៅអធិការវត្តព្រិន្ទ ដោយយោងតាមហេតុផលខាងលើ ។
ឯកឧត្តម បញ្ជាក់ថា ៖ នៅសប្តាហ៍ក្រោយ នឹងនាំយកស្លាកលេខ មកបំពាក់រថយន្តនេះ ដើម្បីបានព្រះសង្ឃប្រើប្រាស់និមន្តស្របតាមច្បាប់ចរាចរណ៍ ។ ឯកឧត្តមបន្ថែមឲ្យដឹងថា ៖ ការប្រគេនមធ្យោបាយនិមន្តនៃព្រះសង្ឃ ឯកឧត្តម ឧកញ៉ា សៀង ណាំ តំណាងរាស្រ្តមណ្ឌលសៀមរាប បានប្រព្រឹត្តដោយសទ្ធា បានជាច្រើនវត្តកន្លងមកហើយ នៅក្នុងខេត្តសៀមរាប ។
ព្រះតេជគុណ សន សារិទ្ធិ ព្រះគ្រូចៅអធិការវត្តព្រិន្ទ មានសង្ឃដីកាថា ៖ មធ្យោបាយនិមន្តនេះ គឺត្រូវបានរាប់បញ្ចូលក្នុងបច្ច័យទាំងបួន ដែលពុទ្ធបរិស័ទ តែងតែបានបរិច្ចាគសទ្ធាប្រគេន ចំពោះព្រះសង្ឃ មធ្យោបាយនិមន្តគឺជាសេនាសនៈបច្ច័យ ឬក៏អាចនិយាយបានថា សេនាសនៈទាន ៕
ប៊ុនធឿន (សៀមរាប)
