ភ្នំពេញ ៖នៅថ្ងៃទី៤ខែវិច្ឆិកាឆ្នាំ២០១៥ ប្រធានក្រុមប្រឹក្សាជំនុំជម្រះសភាស៊ើបសួរសាលាឧទ្ធរណ៍ លោក ប្លង់ សំណាង សម្រេចបដិសេធការសុំនៅក្រៅឃុំបណ្ដោះអាសន្ន
របស់លោក ហុង សុខហួរ សមាជិកព្រឹទ្ធសភាគណបក្ស សម រង្ស៊ី ដែលត្រូវដកអភ័យឯកសិទ្ធិ។មូលហេតុនៃការសម្រេចនេះ គឺដោយសារសំណុំរឿងនេះបានបញ្ជូន
ដល់សវនាការអង្គសេចក្តី នៅសាលាដំបូងរាជធានីភ្នំពេញហើយ ដូច្នេះគប្បីរក្សាទុកជនជាប់ចោទក្នុងពន្ធនាគារ ដើម្បីឲ្យតុលាការចាត់ការតាមនីតិវិធី។
លោកមេធាវី ជូង ជូងី បានតម្កល់ប្រាក់ចំនួន១០លានរៀល ជាថ្នូរនឹងការសុំនៅក្រៅឃុំនេះ។ លោក ហុង សុខហួរ ពុំមានវត្តមានក្នុងពេលសវនាការទេ។ ចៅក្រមសាលាដំបូងរាជធានីភ្នំពេញ សម្រេចចាត់របៀបរឿងក្ដីលោក ហុង សុខហួរ ដោយបង្វិលរឿងទៅចៅក្រមស៊ើបសួរ ដើម្បីផ្តល់ភស្តុតាងសាជាថ្មី តាមការស្នើរបស់ក្រុមមេធាវី។ លោក ជូង ជូងី មេធាវីការពារលោក ហុង សុខហូរ បានឲ្យដឹងថា លោកនឹងជួបពិភាក្សាជាមួយកូនក្តីលោកថា តើសម្រេចប្តឹងសាទុក្ខ ទៅតុលាការកំពូល ឬមិនប្តឹង?។
លោកហុងសុខហួរ ត្រូវបានចាប់ឃុំខ្លួន កាលពីថ្ងៃទី១៥ ខែសីហា ឆ្នាំ២០១៥ ពីបទចោទប្រកាន់បង្ហោះសន្ធិសញ្ញាព្រំដែនក្លែងក្លាយ តាមហ្វេសប៊ុក។ កាលពីដើមខែតុលា ឆ្នាំ២០១៥ តុលាការសាលាដំបូងរាជធានីភ្នំពេញ បានបើកសវនាការលើអង្គសេចក្តី ក្នុងសំណុំរឿងចោទប្រកាន់លោកហុងសុខហួរ។ ចៅក្រម ក៏បានសម្រេចចាត់របៀប ដោយបង្វិលសំណុំរឿងក្តីនោះ ទៅចៅក្រមស៊ើបអង្កេត ដើម្បីស្រាវជ្រាវ ស៊ើបសួរសំណុំរឿងក្តីនោះឡើងវិញ។
លោកចៅក្រម រស់ ពិសិដ្ឋ បានសម្រេចបែបនេះកាលពីរសៀលថ្ងៃទី៧ ខែតុលា ឆ្នាំ២០១៥ នៅក្នុងសវនាការជាលើកទី២ កាត់ទោសលោក ហុង សុខហួរ សមាជិកព្រឹទ្ធសភាគណបក្ស សម រង្ស៊ី ដែលត្រូវដកអភ័យឯកសិទ្ធិ។
លោក ហុង សុខហួរ ត្រូវបានចោទប្រកាន់ពីបទក្លែងបន្លំឯកសារសាធារណៈ បទប្រើប្រាស់ឯកសារសាធារណៈក្លែង និងបទញុះញង់ឲ្យប្រព្រឹត្តបទឧក្រិដ្ឋជាអាទិ៍ តាមមាត្រា៦២៩ ,៦៣០ និង មាត្រា៤៩៥ នៃក្រមព្រហ្មទណ្ឌ ពាក់ព័ន្ធសន្ធិសញ្ញាព្រំដែនកម្ពុជា-វៀតណាម។ យោងតាមបទចោទប្រកាន់នេះ លោក ហុង សុខហួរ អាចប្រឈមមុខនឹងការជាប់ពន្ធនាគារ ពី៧ឆ្នាំ ៦ខែ ទៅ១៧ឆ្នាំ និង ពិន័យជាប្រាក់ពី៥លានរៀល ទៅ១៤លានរៀល ប្រសិនបើតុលាការរកឃើញថា មានពិរុទ្ធភាពដូចការចោទប្រកាន់មែន។ សូមរំលឹកថា កាលពីរសៀលថ្ងៃទី១៧ ខែសីហា ឆ្នាំ២០១៥ ព្រឹទ្ធសភាបានសម្រេចដកអភ័យឯកសិទ្ធិលោក ហុង សុខហួរ ប្រយោជន៍ដើម្បីឲ្យតុលាការបន្តនីតិវិធី៕
លោក សម រង្សី ប្រធានបក្សប្រឆាំង បានវិលមកដល់កម្ពុជាវិញហើយ ហើយនឹងបន្តវប្បធ៏មសន្ទនាជាមួយបក្សកាន់អំណាច និងសុំដោះលែងសកម្មជនដែលកំពុងជាប់ឃុំឃាំង៕
