ខេត្តព្រះវិហារ៖ នៅព្រឹកថ្ងៃទី៣១ ខែតុលា ឆ្នាំ២០១៥ កម្លាំងផ្នែករដ្ឋបាលព្រៃឈើឆែប និងសង្កាត់រដ្ឋបាល ព្រៃឈើ ព្រមទាំងអាជ្ញាធរស្រុកឆែប ដឹកនាំដោយលោក គឹម ចេថាវី នាយផ្នែកឆែប បានចុះធ្វើការ ឃាត់ខ្លួនបានជនសង្ស័យ៣នាក់ រួមទាំងត្រាក់ទ័រចំនួនពីរគ្រឿង ដែលកំពង់ធ្វើសកម្មភាពឈូសឆាយ រំលោភយកដីគំរបរបស់ រដ្ឋបាលព្រៃឈើ នៅចំនុចព្រំប្រទល់ស្រុកឆែប និងស្រុកត្បែងមានជ័យ ក្នុងភូមិពោធិ៍ទាប ឃុំម្លូរព្រៃមួយ ស្រុកឆែប ខេត្តព្រះវិហារ ។
នៅពេលកំពង់ធ្វើសកម្មភាពឈូសឆាយដីព្រៃទាំងនោះ សមត្ថកិច្ចបានទៅដល់ភ្លាមៗ ហើយធ្វើការ ឃាត់ខ្លួនមនុស្សចំនួន៣នាក់ និងទ្រាក់ទរ័បាន២គ្រឿង រួចធ្វើការបញ្ជូនមកកាន់ខណ្ឌរដ្ឋបាលព្រៃឈើ ព្រះវិហារ ដើម្បីសួរនាំ។
ជនសង្ស័យដែលឃាត់ខ្លួនទាំង៣នាក់ ១ឈ្មោះ ឈុំ សាន ភេទប្រុស អាយុ៤៦ ឆ្នាំ រស់នៅភូមិកងជ័យ ឃុំព្រៃគុយ ស្រុកកងមាស ខេត្តកំពង់ចាម ទី២ឈ្មោះ ឈឿន តុលា ភេទប្រុស ទី៣ឈ្មោះ យី នីតា អ្នកទាំងបីបានយកត្រក់ទ័រចូលមក ស៊ីឈ្នួលឈូសឆាយដីអោយ ឈ្មោះ វ៉ាន់ រិទ្ធ ភេទប្រុស អាយុ៤០ឆ្នាំ និងប្រពន្ធឈ្មោះឡើង សុខឃីន មានទីលំនៅ ភូមិបុស្សធំ ឃុំប្រមេរ ស្រុកត្បែងមានជ័យ ខេត្តព្រះវិហារ ក្នុងមួយហិចតា១២ម៉ឺនរៀល។
លោក អ៊ិត ភូម្រា នាយខណ្ដរដ្ឋបាលព្រៃឈើខេត្តព្រហវិហារ បានអោយដឹងថា ការឈូស ឆាយដីដែលគ្មានលិខិតស្នាម ចេញពី ស្ថាប័ណ្ឌពាក់ព័ន្ធរឺក៏ក្រុម និស្សិត ចុះវាស់វែងដីធ្លី និងរដ្ឋបាលព្រៃឈើគឺជាដីខុសច្បាប់ ហើយណាមួយដីនៅតំបន់នោះជាដីគំរបរបស់ព្រៃរដ្ឋបាលព្រៃឈើ និងជាជំរកសត្វព្រៃសព្វថ្ងៃ។
គួររំលឹកផងដែរថា ម្ចាស់ដីដែលមានឈ្មោះ វ៉ាន់ រិទ្ធ បានមានលិខិតពាក្យស្នើសុំបញ្ជាក់កម្មសិទ្ធប្រើប្រាស់កាន់កាប់ដីធ្លីខាងលើ ពីអាជ្ញាធរឃុំដែលមានឈ្មោះប្រាក់ កែន ជាមេឃុំប្រមេរ ជាអ្នកចេញនិងវាយត្រាលើលិខិតនោះ តាំងពីថ្ងៃទី ០៨ ខែសីហា ឆ្នាំ២០០៧ មកម្លេះ។ ក៏ប៉ុន្តែដីនោះ ឈ្មោះ វ់ាន់ រិទ្ធ មិនបានធ្វើការឈូសឆាយឡើយ ទើបតែមកដល់ខែតុលា ឆ្នាំ២០១៥ នេះទើបចាប់ផ្តើមឈូសឆាយ ។
បច្ចុប្បន្នជនសង្ស័យទាំងបីនាក់ ត្រូវបានខណ្ឌរដ្ឋបាលព្រៃឈើខេត្តព្រះវិហារ កសាងសំនុំរឿង បញ្ជូនទៅសាលាដំបូងខេត្តព្រះវិហារ ដើម្បីចាត់ការបន្តតាមនិតិវិធីច្បាប់ ចំណែកត្រាក់ទ័រត្រូវរក្សាទុក នៅផ្នែករដ្ឋបាលព្រៃឈើឆែប រីឯម្ចាស់ដីឈ្មោះ វ៉ាន់ រិទ្ធ នោះសមត្ថកិច្ចមិនទាន់បានធ្វើការ ឃាត់ខ្លួននៅឡើយទេ ព្រោះសមត្ថកិច្ចកំពុងចុះត្រួតពិនិត្យទីតាំង និងស្រាវជ្រាវរកលិខិតស្នាមបន្តទៀត។ចំណែកលោក ប្រាក កែន មេឃុំ ពោធិ៍មេ មិនអាចទំនាក់ទំនង សុំការបំភ្លឺបាននោះទេជាប់រវល់ ៕
