ខេត្តសៀមរាប៖ ដើមី្បធានាបាននូវសុវត្ថិភាពសន្តិសុខសណ្តាប់ធ្នាប់ ជូនប្រជាពលរដ្ឋ និង ភ្ញៀវទេសចរណ៍ដែលចូលមក ទស្សនា កម្សាន្តនៅក្នុងទីក្រុងប្រវត្តិសាស្ត្រអង្គរ-ខេត្តសៀមរាប លោកវរៈសេនីយ៍ឯក ស្រី យូរ៉ា មេបញ្ជាការរង កងរាជអាវុធហត្ថខេត្ត ប្រធានមន្ទីរសន្តិសុខ និង ព្រហ្មទណ្ឌ ជំនួសមុខឲ្យឧត្តមសេនីយ៍ត្រី ប៉ោ វណ្ណនិត មេបញ្ជាការកងរាជអាវុធហត្ថខេត្តសៀមរាប បានដឹកនាំកម្លាំងចុះបង្រ្កាប ទីតាំងលេងល្បែងហ្គេមបាញ់ត្រី នៅផ្សារអង្គរ ទ្រេតសេនធឺ ស្ថិតនៅភូមិមណ្ឌល១ សង្កាត់ស្វាយដង្គំ ក្រុង ខេត្តសៀមរាប ក្នុងតំបន់ផ្សារចាស់ កាលពីវេលាម៉ោង២២ និង ១០នាទី នាថ្ងៃទី៣១ ខែតុលា ឆ្នាំ២០១៥ ។
កម្លាំងសមត្ថកិច្ចកងរាជអាវុធហត្ថខេត្ត បានឆ្មក់ចូលបង្ក្រាបទីតាំងល្បែងហ្គេមបាញ់ត្រីមួយកន្លែង នៅជាន់ទី៣ នៃផ្សារអង្គរទ្រេតសេនធឺ ស្របពេល ក្នុងរាត្រី ដែលភ្ញៀវទេសចរណ៍បរទេស មកទស្សនាកម្សាន្តនៅក្រុងប្រវត្តិសាស្ត្រ និងបានប្រារព្វធ្វើបុណ្យហូល្លូវីននោះ ។ ជាការរក្សានូវសុវត្ថិភាព សន្តិសុខ សណ្តាប់ធ្នាប់ក្នុងក្រុង ព្រមទាំងលុបបំបាត់នូវការគេចវេស និងការបោះបង់ ការសិក្សា របស់សិស្សានុសិស្ស និសិ្សត ដែលមិនបានចូលសាលារៀនផងដែរ
ម៉្យាងវិញទៀត អនុវត្តឲ្យកាន់តែមាន ប្រសិទ្ធភាពខ្ពស់ នូវគោលនយោបាយភូមិឃុំ មានសុវត្ថិភាព ជូនប្រជាពលរដ្ឋ និង ភ្ញៀវទេសចរណ៍ទៀតផង ។
ក្នុងប្រតិបត្តិការបង្រ្កាបទីតាំងល្បែងហ្គេមបាញ់ត្រី កម្លាំងសមត្ថកិច្ចយើង បានធ្វើការដកហូតនូវវត្ថុតាង នូវទូហ្គេមបាញ់ត្រី ចំនួន ៤ និង ធ្វើការឃាត់ខ្លួនមនុស្សបាន ចំនួន០៤នាក់ ហើយបានធ្វើការបញ្ជូន ទៅកាន់ទីបញ្ជាការដ្ឋានកងរាជអាវុធហត្ថខេត្ត ដើមី្បកសាងសំណុំរឿងបញ្ជូនទៅកាន់សាលាដំបូងខេត្ត ៕
ប៊ុនធឿន (សៀមរាប)
