ជប៉ុនគាំទ្រអាមេរិក យាមល្បាតជុំវិញ កោះសិប្បនិម្មិតរបស់ចិន

នាយករដ្ឋមន្ត្រីជប៉ុន លោកស៊ីនហ្ស៊ូអាបេ បញ្ចាក់ថា ជប៉ុនគាំទ្រអាមេរិក បញ្ចូននាវាយាមល្បាត ជុំវិញកោះសិប្បនិម្មិតរបស់ចិន ។មានប្រសាសន៏ទៅកាន់ក្រុមអ្នកសារព័ត៌មាន នៅប្រទេសកាហ្សាស្ថាន លោកអាបេបញ្ចាក់ថា លោកបានគាំទ្រអាមេរិក យាមល្បាតជុំវិញកោះសិប្បនិម្មិតខុសច្បាប់ ដែលចិនបានបង្កើតឡើង នៅតំបន់សមុទ្រចិនភាគខាងត្បូង។

លោកអាបេបញ្ចាក់ថា «ខ្ញុំយល់ឃើញថាការបញ្ចូននាវាចម្បាំងយាមល្បាត ទៅកាន់ដែនសមុទ្រចិនភាគខាងត្បូង គឺសមស្របទៅនឹងច្បាប់អន្តរជាតិ។ ប៉ុន្តែជាធម្មតា សកម្មភាពជាឯកតោភាគី តែងតែបង្ករការព្រួយបារម្ភយ៉ាងខ្លាំងពីអន្តរជាតិ ខ្លាចធ្វើឲ្យមានភាពតានតឹងកើតឡើង។
កន្លងមក ប្រធានខុទ្ទការល័យរដ្ឋាភិបាលជប៉ុន លោកYoshihideSugaបញ្ចាក់ថា ជប៉ុននិងអាមេរិក នឹងចែករំលែកព័ត៌មានគ្នាទៅវិញទៅមក ពេលដែលដាក់ពង្រាយនាវាយាមល្បាតនៅទីនោះ។ រដ្ឋមន្ត្រីការពារជាតិជប៉ុន លោកGen Nakataniបញ្ចាក់ថា «បញ្ហាដែនសមុទ្រចិនភាគខាងត្បូង បានធ្វើឲ្យប៉ះពាល់ដលសន្តិសុខរបស់ជប៉ុន ដូច្នេះជប៉ុនត្រូវតែតាមដាន រាល់សកម្មភាពដែលបានកើតឡើងនៅសមុទ្រចិន ដើម្បីដោះស្រាយឲ្យបានទាន់ពេលវេលា៕