ខេត្តមណ្ឌលគិរី៖ លោកឧកញ៉ា ទ្រី ភាពដែលរងភាពអាស្រូវកាប់បំផ្លាញព្រៃឈើបានអះអាងថា ឈប់ដឹកនិងធ្វើអាជីវកម្មរកស៊ីឈើទៀតហើយកាលពីពេលកន្លងទៅតែសាធារណៈជនមិនរំពឹងថាជាការពិតឡើយ ក្នុងពេលដែលគេសង្កេតឃើញនៅតែមានក្រុមមេការខ្លះរបស់ឧកញ៉ានៅតែលេចមុខយ៉ាងសកម្មប្រមូលទិញឈើប្រណិតដដែល។ ជាមួយគ្នានេះដែរ លោកឧកញ៉ា ទ្រី ភាព ក៏បានប្រកាសថានឹង ចាប់ខ្លួនចំពោះអ្នកដែលយកឈ្មោះក្រុមហ៊ុន ទ្រី ភាព ទៅរកស៊ីឈើទៀតផងតែមកទល់ពេលនេះក្រុមហ៊ុនមិនបានអនុវត្តន៏តាមការប្រកាសរបស់ខ្លួនឡើយ។
សេចក្តីរាយការណ៍ពីប្រជាពលរដ្ឋ នៅខេត្តមណ្ឌលគិរី បាននិយាយថា លោក ម៉ុត វិសាល ដែលជាមេការប្រមូលទិញឈើអោយក្រុមហ៊ុន លោកឧកញ៉ា ទ្រី ភាព ប្រចាំខេត្តរតនគិរីនោះ ឥឡូវបានទទួលបានការចាត់តាំងធ្វើជាមេការប្រមូលទិញ ឈើ ប្រចាំខេត្តមណ្ឌលគិរីបន្ថែមទៀត។
ការលេចមុខរបស់លោក ម៉ុត វិសាល មេការប្រមូលទិញឈើឱ្យក្រុមហ៊ុន លោកឧកញ៉ា ទ្រី ភាព នៅខេត្តមណ្ឌលគិរីក្នុងពេលនេះ គឺបន្ទាប់ពី ព្រៃឈើនៅខេត្តរតនគិរី ត្រូវបានកាប់បំផ្លាញ ស្ទើរតែរលាយហិនហោចអស់ទៅហើយ។ ម្យ៉ាងវិញ ទៀត គេមិនច្បាស់ទេថា តើការលេចមុខលោក ម៉ុត វិសាល ប្រមូលទិញឈើនៅខេត្តមណ្ឌលគិរី លើកនេះ ជាការចាត់តាំងរបស់ក្រុមហ៊ុន ឬយ៉ាងណានោះឡើយ ព្រោះថា បើតាមការអះអាងរបស់ លោកឧកញ៉ា ទ្រី ភាព នាពេលកន្លងទៅ គឺក្រុមហ៊ុនមួយនេះមិនជាប់ពាក់ព័ន្ធក្នុងការរកស៊ីឈើនាពេលបច្ចុប្បន្ននោះទេ ចំណែក ក្រុមហ៊ុន ទ្រី ភាព មិនអាចធ្វើការទំនាក់ទំនងសុំការពន្យល់បាន ទេពីបញ្ហានេះ ។
ប្រភពខាងលើបន្តទៀតថា ព្រៃឈើនៅក្នុងតំបន់ជីវចម្រុះសីម៉ា ស្ថិតនៅក្នុងស្រុកកែវសីម៉ា ខេត្តមណ្ឌលគិរី ជាប់ព្រំប្រទល់នឹងខេត្តក្រចេះ កំពុងរងការកាប់បំផ្លាញយ៉ាងរង្គាលពុំមាន ការទប់ស្កាត់នោះឡើយ ហើយមេការលោកឧកញ៉ា ទ្រី ភាព ដែលមានឈ្មោះ ម៉ុត វិសាល ជាមេក្លោងបាននិងកំពុង ប្រមូលទិញឈើនិង កំពុងធ្វើការសម្រុកដឹកជញ្ជូនយ៉ាងមមាញឹកចេញពីតំបន់ទឹកដីខេត្តមណ្ឌលគិរី មកស្តុកទុកក្នុងឃ្លាំងមួយកន្លែង ក្នុងដីសម្បទានរបស់ក្រុមហ៊ុន តុងមីន (TONGMIN) ដែលមាន ទីតាំងស្ថិតក្នុងស្រុកសំបូរ ខេត្តក្រចេះ បន្ទាប់មកទើបក្រុមមេការធ្វើការដឹកជញ្ជូនបន្តទៅកាន់ គោលដៅរបស់ខ្ឡួន។ មន្ត្រីជំនាញបរិស្ថាន មន្ត្រីជំនាញរដ្ឋបាលព្រៃឈើខេត្ត រសមត្ថកិច្ចពាក់ពន្ធ័មួយចំនួន ត្រូវបានគេសង្ស័យថា មានការឃុបឃិតនិងសំរបសំរួលគ្នាជាមួយក្រុមមេការខាងលើ បើកដៃអោយមានការកាប់ បំផ្លាញព្រៃឈើនៅក្នុងតំបន់ជីវចម្រុះសីម៉ាយ៉ាងអាណាធិបតេយ្យជារៀងរាល់ថ្ងៃ។
ចំណែកអភិបាល ខេត្តមណ្ឌលគិរី លោក អេង ប៊ុនហៀង ក៏ដូចជាលោក កែប កត់ នាយខណ្ឌរដ្ឋបាលព្រៃឈើខេត្តត្រូវតែ យកចិត្តទុកដាក់ឲ្យបានខ្លាំងក្លា ចំពោះសោដនាដ្យកម្មកាប់បំផ្លាញព្រៃឈើ នៅក្នុងខេត្តមណ្ឌលគិរីទាំងមូល។
លោក ម៉ុត វិសាល បានថ្លែងប្រាប់បណ្តាញព័តមានក្នុងស្រុកមួយថា លោកពិតជាចុះប្រមូលទិញឈើនៅក្នុង ខេត្តមណ្ឌលគិរីប្រាកដមែន ប៉ុន្តែលោកមិនបានប្រាប់ទេថា ការប្រមូលទិញឈើនេះ គឺទទួលការចាត់តាំងពីក្រុមហ៊ុនឬយ៉ាងណានោះទេ គ្រាន់តែលោកបញ្ជាក់ថា ការងារនេះលោកមិនបានចុះផ្ទាល់ ឡើយ គឺប្រគល់អោយឈ្មោះ ធី រួចក៏បិទទូរស័ព្ទតែម្តងទៅ។ ចំណែកឈ្មោះ ធី ក៏បានអះអាងថា លោកពិតជាកូនដៃទិញឈើឲ្យឈ្មោះម៉ុត វិសាល ប្រាកដមែន ហើយគាត់គ្រាន់តែជាអ្នកប្រមូលទិញប៉ុណ្ណោះមិនដឹងថា ឈើទាំងអស់នោះទិញឲ្យក្រុមហ៊ុនលោកឧកញ៉ា ទ្រី ភាព ឬយ៉ាងណានោះឡើយ។
បញ្ហាឧក្រិដ្ឋកម្មព្រៃឈើដ៏ធ្ងន់ធ្ងរនេះ ត្រូវតែក្រុមហ៊ុនទ្រីភាពពិនិត្យឡើងវិញ និងធ្វើការបំភ្លឺ ព្រោះវាប៉ះពាល់ដល់កេរ្តិឈ្មោះក្រុមហ៊ុន ជាពិសេសសមត្ថកិច្ចជំនាញនិងមេព្រៃបើកភ្នែកមើលផង រលាយព្រៃឈើដោយសារអស់លោកបិទភ្នែកបណ្តោយឲ្យមេការក្រុមហ៊ុនទ្រីភាពប្រមូលទិញឈើយ៉ាងអានាធិបតេយ្យ៕
