ខេត្តសៀមរាប៖ កម្លាំងសមត្ថកិច្ច PM ខេត្តសៀមរាប មន្ត្រីជលផល និងអាជ្ញាធរមូលដ្ឋាន បានចុះប្រតិបត្តិការ បង្ក្រាប ករណីលួចចិញ្ចឹមត្រីឆ្តោរខុសច្បាប់បានចំនួន០៣ស្រះ និងរឹបអូសបានកូនត្រីឆ្តោរប្រមាណជាង២ម៉ឺនក្បាល រួចប្រគល់ឱ្យមន្ត្រីជលផល កំទេចចោលនៅនឹងកន្លែង។
ប្រតិបត្តិការចុះបង្ក្រាបករណីចិញ្ចឹមត្រីឆ្តោរខុសច្បាប់នេះ បានធ្វើឡើងពេញ១ថ្ងៃ គឺថ្ងៃទី២០ ខែតុលា ឆ្នាំ២០១៥ ស្ថិតនៅក្នុងភូមិអារញ្ញ សង្កាត់សៀមរាប ក្រុងខេត្តសៀមរាប ក្រោមកិច្ចដឹកនាំដោយលោកវរៈសេនីយ៍ឯក ស្រី យូរ៉ា មេបញ្ជាការរងកងរាជអាវុធហត្ថខេត្តសៀមរាប ។
ការកម្រើកឡើងនៃប្រតិបត្តិការនេះ គឺដោយទទួលបាននូវសេចក្តីណែនាំ របស់ក្រសួងកសិកម្ម និង បទបញ្ជា របស់គណៈបញ្ជាការឯកភាពរដ្ឋបាលសាលាខេត្ត ដែលត្រូវបានដាក់ចេញយ៉ាងម៉ឺងម៉ាត់ លើប្រសិទ្ធិភាពនៃវិធានការបញ្ឈប់ និងលុបបំបាត់ការចិញ្ចឹមត្រីឆ្តោរ នៅក្នុងខេត្តសៀមរាប ដែលជាប្រភេទត្រី ស៊ីចំណីត្រីដូចគ្នា ធ្វើឱ្យហិនហោចនូវពូជត្រីធម្មជាតិ ព្រមទាំងធ្វើឱ្យកើតនូវបទល្មើសនេសាទទ្វេរឡើងថែមទៀត នេះ បើតាមការឲ្យដឹងដោយលោកវរសេនីយ៍ឯក ស្រី យូរ៉ា ។
លោកបានឱ្យដឹងទៀតថា ជាមួយនឹងការចុះបង្រ្កាបទីតាំងចិញ្ចឹមត្រីនេះ កម្លាំងជំនាញបានឱ្យម្ចាស់អាជីវកម្មចិញ្ចឹមត្រីឆ្តោរ ធ្វើកិច្ចសន្យា បញ្ឈប់សកម្មភាពចិញ្ចឹមត្រីឆ្តោរនេះជាស្ថាពរ បើមិនដូច្នោះទេ ត្រូវប្រឈមនឹងមុខច្បាប់ មិនអាចលើកលែងបាននោះឡើយ។
លោក ព្រិន្ទ សាវិន នាយខ័ណ្ឌ រដ្ឋបាលជលផលខេត្តសៀមរាប បានឱ្យដឹងថា ការបង្ក្រាបបទល្មើសចិញ្ចឹមត្រីឆ្តោរនេះ គឺមិនត្រឹមតែធ្វើនៅលើដែនគោកប៉ុណ្ណោះទេ ក៏ប៉ុន្តែត្រូវបន្តធ្វើនៅតាមដែនទឹក ក្នុងបឹងទន្លេសាប ក្នុងភូមិសាស្ត្រខេត្តសៀមរាបទាំងមូល ។ ជាមួយគ្នានេះ លោកក៏បានឲ្យដឹងថា ម្ចាស់ចិញ្ចឹមកូនត្រីឆ្តោរឈ្មោះ យី សាន ភេទប្រុស ជាជនជាតិវៀតណាម រស់នៅក្នុងភូមិ អារញ្ញ សង្កាត់សៀមរាប ក្រុង ខេត្តសៀមរាប ។ អាចនិយាយបានជនល្មើសរូបនេះ ត្រូវបានសម្ត្ថកិច្ចជំនាញ ធ្វើការណែនាំ ចុះកិច្ចសន្យាបញ្ឈប់សកម្មភាពចិញ្ចឹមត្រីឆ្តោរ ព្រមទាំងត្រូវបានធ្វើការផាកពិន័យ តាមច្បាប់ស្តីពីរដ្ឋបាលជលផលផងដែរ ។
គួរបញ្ជាក់ដែរថា ក្រុមសមត្ថកិច្ចដដែលនេះ កាលពីថ្ងៃទី១៩ ខែតុលា មុនប្រតិបត្តិការនេះមួយថ្ងៃ បានចុះប្រតិបត្តិការបង្ក្រាបទីតាំងចិញ្ចឹមត្រីឆ្តោរ នៅភូមិភ្នំក្រោម និង ភូមិអារញ្ញ បានចំនួន ៤ស្រះ រឹបអូសបានត្រីឆ្តោរប្រមាណជា ៣ ម៉ឺនក្បាល ឃាត់ខ្លួនបានមនុស្ស៣នាក់ ដែលជាម្ចាស់ចិញ្ចឹមត្រីឆ្តោរនោះ ឲ្យធ្វើកិច្ចសន្យា បញ្ឈប់សកម្មភាពចិញ្ចឹមត្រីឆ្តោរបន្តទៀត និងផាកពិន័យ តាមច្បាប់ស្តីពីជលផល ៕
ប៊ុនធឿន (សៀមរាប)
