ខេត្តឧត្តរមានជ័យ៖ បញ្ហាទំនាស់ដីធ្លី រវាងប្រជាពលរដ្ឋ ជាមួយគ្រួសារកងទ័ព នៅភូមិពពេលសែនជ័យ ឃុំអូរស្វាយ ស្រុកត្រពាំងប្រាសាទ ខេត្តឧត្តរមានជ័យ ដែលត្រូវបានដោះស្រាយ ជាច្រើនជំហានកន្លងមកហើយនោះ ត្រូវបានបញ្ចប់ក្នុងជំហានចុងក្រោយ ជូនបងប្អូនប្រជាពលរដ្ឋចំនួន៥៣គ្រួសារ ក្រោមដំណោះស្រាយដោយ សន្តិវិធី គ្មានអ្នកចាញ់និងគ្មានអ្នកឈ្នះ គឺឈ្នះទាំងអស់គ្នា ទាំងប្រជាពលរដ្ឋនិងគ្រួសារកងទ័ព ត្រូវទទួល បានដីសាងសង់លំនៅដ្ឋាន និងដីបង្កបង្កើនផល ក្រោមដំណោះស្រាយដ៏សមស្រប តាមនីតិវិធី និង គោល នយោបាយរបស់រាជរដ្ឋាភិបាល ។
នាយឧត្តមសេនីយ៍ គន់ គីម អគ្គមេបញ្ជាការរង និងជានាយសេនាធិការចំរុះ នៃកងយោធពលខេមរ ភូមិន្ទ មានប្រសាសន៍យ៉ាងដូច្នេះ ក្នុងខណពេលដែលឯកឧត្តម រួមទាំងអាជ្ញាធរស្រុក និងមន្រី្តមូលដ្ឋាន មន្រ្តីជំនាញសូរិយោដី ចុះទៅពិនិត្យស្ថានភាពដីទំនាស់ នាព្រឹកថ្ងៃទី១៩ ខែតុលានេះ ។
ឯកឧត្តម គន់ គីម បានបញ្ជាក់ថា បញ្ហាទាមទារដណ្តើមកម្មសិទ្ធិដីធ្លី លើទីតាំងត្រួតគ្នានោះ វាជាបញ្ហា ប្រឈមដែលមិនអាចរកច្រកចេញរួចឡើយ ឯកឧត្តមបានពន្យល់ថា ការយល់អព្យាស្រ័យគ្នាទៅវិញទៅមក វាជាគន្លឹះដ៏សំខាន់នៃដំណោះស្រាយរាល់បញ្ហានានា ។ ឯកឧត្តមបញ្ជាក់ថា វាពិតជាមិនដូចគ្នានោះទេ ការដោះស្រាយគឺផ្អែកតាមស្ថានភាពនៃទំនាស់ និងផ្អែកតាមស្ថានភាពនៃភូមិសាស្រ្តផងដែរ ។ ជាក់ស្តែង សម្រាប់ដំណោះស្រាយជូន ប្រជាពលរដ្ឋទាំង៥៣គ្រួសារចុងក្រោយនេះ ឯកឧត្តមបានសម្របសម្រួលថា ៖ អាស្រ័យដោយគ្រួសារកងទ័ព បានសាងសង់លំនៅដ្ឋាន និងកំពុងបានអាស្រ័យផលរួចមកហើយ លើផ្ទៃដី ដែលមានបញ្ហានេះ ដូច្នេះវាមិនខុសគ្នាទេ សូមឲ្យបងប្អូនប្រជាពលរដ្ឋទាំង៥៣គ្រួសារយល់អព្យាស្រ័យ និងព្រមទទួលយក នូវការដោះដូរយកទីតាំងដីថ្មី នៅជាប់ព្រំគ្នាក្នុងតំបន់គ្រួសារកងទ័ព ដែលនៅមិនឆ្ងាយ ពីគ្នានោះឡើយ ។
ហេតុផលដែលត្រូវបានពន្យល់នេះ ត្រូវបានបងប្អូនប្រជាពលរដ្ឋទាំង៥៣គ្រួសារ ទទួលយកដោយការ ពេញចិត្ត ។ នាយឧត្តមសេនីយ គន់ គីម បានបន្តឲ្យដឹងថា ៖ នេះគឺជាភ្លើងខៀវនៃដំណោះស្រាយ ហើយ ឯកឧត្តមបានបញ្ជាក់បន្ថែមថា អ្វីដែលនៅសេសសល់ គឺជាភារកិច្ចរបស់ឯកឧត្តមផ្ទាល់ ដែលត្រូវធ្វើ របាយការណ៍ ចូលទៅប្រមុខរាជរដ្ឋាភិបាល ស្នើសុំគោលការណ៍ ប្រើប្រាស់ដីសម្បទានសង្គមកិច្ច បែងចែកជូនបងប្អូន បានកាន់កាប់ដោយស្របច្បាប់ និងប្រើប្រាស់អាស្រ័យផលតទៅ ៕៕
ប៊ុនធឿន (សៀមរាប)
