សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាមានប្រសាសន៍ថា សមិទ្ធផលសម្រាប់វិស័យអប់រំ បានឆ្លុះបញ្ចាំងពីកិច្ចខិតខំប្រឹងប្រែងរបស់រាជរដ្ឋាភិបាលនៅក្នុងការអភិវឌ្ឍគុណភាពអប់រំនៅកម្ពុជា ជាពិសេសការផ្តល់ការអភិវឌ្ឍគ្រប់ជ្រុងជ្រោយដល់អ្នកសិក្សា និងការលើកកម្ពស់សុខុមាលភាពរបស់គ្រូបង្រៀន សំដៅផលិតធនធានមនុស្សដែលមានចំណេះដឹងទូលំទូលាយ ជំនាញបច្ចេកទេសច្បាស់លាស់ និងជំនាញទន់គ្រប់ប្រភេទ។ ការលើកឡើងរបស់សម្តេចធិបតីនាយករដ្ឋមន្ត្រីដូចនេះធ្វើឡើងក្នុងពិធីសម្ពោធដាក់ឱ្យប្រើប្រាស់នូវអគារសិក្សា អគារទីចាត់ការ និងអគារស្នាក់នៅរបស់គ្រូបង្រៀនទូទាំងខេត្តកំពង់ស្ពឺ នៅវិទ្យាល័យឧដុង្គ ស្ថិតនៅភូមិក្រាំងពន្លៃ សង្កាត់វាំងចាស់ ក្រុងឧដុង្គម៉ែជ័យ ខេត្តកំពង់ស្ពឺ នាព្រឹកថ្ងៃទី០៨ ខែកក្កដា ឆ្នាំ២០២៥។
សម្តេចធិបតី ហ៊ុន ម៉ាណែត បានថ្លែងថា សមិទ្ធផលថ្មីនៃវិស័យអប់រំក្នុងខេត្តកំពង់ស្ពឺដែលបានសម្ពោធដាក់ឱ្យដំណើរការជាផ្លូវការនាពេលនេះនឹងរួមចំណែកក្នុងការលើកស្ទួយវិស័យអប់រំ លើកកម្ពស់សុខុមាលភាពរបស់លោកគ្រូ អ្នកគ្រូ និងជំរុញការអភិវឌ្ឍសមត្ថភាពរបស់សិស្សានុសិស្ស ជាពិសេសពូនជ្រុំមូលធនមនុស្សនៅក្នុងខេត្តកំពង់ស្ពឺឱ្យកាន់តែសម្បូរបែបសម្រាប់ការអភិវឌ្ឍសង្គម សេដ្ឋកិច្ចខេត្តឱ្យបានជឿនលឿនតាមរយៈការទាក់ទាញការវិនិយោគ និងការលើកកម្ពស់ភាពប្រកួតប្រជែង និងនវានុវត្តន៍។
សម្តេចធិបតីនាយករដ្ឋមន្រ្ដីបានគូសបញ្ជាក់ថា មូលធនមនុស្សបានដើរតួនាទីយ៉ាងសំខាន់នៅក្នុងការប្រែក្លាយចក្ខុវិស័យកម្ពុជាឱ្យទៅជាការពិតនៅឆ្នាំ២០៥០ខាងមុខ ពីព្រោះការអភិវឌ្ឍធនធានមនុស្សធានាបាននូវ សមត្ថភាពនៃការប្រកួតប្រជែងប្រកបដោយភាពជោគជ័យរបស់ប្រទេសជាតិ ជាពិសេសនៅក្នុងបរិការណ៍តំបន់ និងសកលលោក។
សម្ដេចធិបតីបានបន្ដថា អាស្រ័យហេតុនេះការពង្រីកធនធានមនុស្ស និងការពង្រឹងមូលធន មនុស្សនៅតាមបណ្តាខេត្ត គឺមានភាពចាំបាច់ និងបន្ទាន់ ដើម្បីឆ្លើយតបទៅនឹងតម្រូវការចំពោះមុខ ក៏ដូចជានិន្នាការតំបន់ និងសកល ហើយចំពោះព្រឹត្តិការណ៍នាពេលនេះគឺជាសក្ខីកម្មថ្មីមួយទៀតនៃការខិត ខំរបស់រាជរដ្ឋាភិបាលក្នុងការបោះជំហានទៅមុខជាវិជ្ជមាន ក្នុងការផលិតធនធានមនុស្សសម្រាប់ប្រើបម្រើឱ្យវិស័យនានានៅក្នុងខេត្តកំពង់ស្ពឺក៏ដូចជានៅកម្ពុជាទាំងមូលប្រកបដោយនវានុវត្តន៍ បច្ចេកវិទ្យាទំនើប និងបច្ចេកទេសខ្ពស់។
សម្តេចធិបតីនាយករដ្ឋមន្រ្ដីបានលើកឡើងថា នៅក្នុងន័យនេះរាជរដ្ឋាភិបាលតែងតែផ្តោតលើអាទិភាពនៃការវិនិយោគទៅលើការកសាងធនធានមនុស្ស ដែលជាធនធានចាំបាច់មិនអាចខ្វះបានសម្រាប់ការគ្រប់គ្រង អភិវឌ្ឍន៍សុខភាពរឹងមាំនៃសេដ្ឋកិច្ចជាតិ និងការបង្កើតតម្លៃបន្ថែម ការទាក់ទាញវិនិយោគ ការលើកកម្ពស់នវានុវត្តន៍ និងការប្រកួតប្រជែង។ ជាក់ស្តែងវិស័យអប់រំត្រូវបានធ្វើការកែទម្រង់ជាប្រចាំ ដើម្បីពង្រឹងអភិបាលកិច្ចស្ថាប័ន និងបង្កើតបរិយាកាសល្អសម្រាប់ការអប់រំប្រកប ដោយបរិយាប័ន្ន សំដៅជំរុញដល់ការអភិវឌ្ឍធនធានមនុស្សប្រកបដោយចំណេះដឹងទូលំទូលាយ ជំនាញបច្ចេកទេសច្បាស់លាស់ ជំនាញទន់សមស្រប និងសុខភាពល្អសម្រាប់ការបំពេញនូវតម្រូវការនៃការអភិវឌ្ឍជាតិ និងទីផ្សារការងារ តាមរយៈការបង្កើតសាលាចំណេះដឹងទូទៅ ការពង្រឹងគុណភាព និងប្រសិទ្ធភាពនៃការបង្រៀន និងការរៀន ការលើកកម្ពស់សមត្ថភាពស្ថាប័ន និងអភិបាលកិច្ចនៅតាមគ្រឹះស្ថានសិក្សា ការធ្វើបច្ចុប្បន្នកម្មនៃកម្មវិធីសិក្សានៅគ្រប់កម្រិតសិក្សា ការបង្កើនការផ្តល់អាហារូបករណ៍សម្រាប់សិស្ស និស្សិតក្រីក្រ និងងាយរងគ្រោះ និងការបង្កើតបរិយាកាសសម្រាប់ការសិក្សាពេញមួយជីវិត ដើម្បីធ្វើបច្ចុប្បន្នកម្មចំណេះដឹង និងសម្រួចជំនាញឯកទេសជាប្រចាំ សំដៅលើកកម្ពស់ភាពប្រកួតប្រជែងនៃកម្លាំងពលកម្ម និងកសាងយុវជនបន្តវេនរបស់កម្ពុជាប្រកបដោយសមត្ថភាព និងគុណវុឌ្ឍដឹកនាំខ្ពស់៕ប្រភពអាកាប៉េ
