ប្រជាពលរដ្ឋ២នាក់ប្តី-ប្រពន្ធ អំពាវនាវសុំរកយុត្តិធម៌ ដោយសារតែដីរបស់ខ្លួន ត្រូវបានស្នាក់ការមណ្ឌល៤ រឹបអូសយក ចំណែកនាយការិយាល័យទី២ ជាមេរបស់ស្នាក់ការមណ្ឌល៤ បកស្រាយថា ការទាមទារនោះ គឺជាទង្វើខុសច្បាប់ !

ខេត្តសៀមរាប៖ ប្រជាពលរដ្ឋ២នាក់ប្តីប្រពន្ធ ដែលមាន លិខិតកាន់កាប់ដីធ្លីជាភស្តុតាងមួយចំនួននៅជាប់នឹងខ្លួន កើតទុក្ខមិនសុខចិត្ត ព្រោះថាដីមួយកន្លែងរបស់ខ្លួន មានទំហំ ២០ម៉ គុណនឹង ៣០ម៉ ស្ថិតនៅភូមិវាល សង្កាត់គោកចក ក្រុងសៀមរាប ត្រូវបានអង្គភាពស៊ើបការមណ្ឌល៤ រឹបអូសយក បន្ទាប់ពីពួកគាត់ បានអនុញ្ញាតិឲ្យអង្គភាពមួយនេះខ្ចី ដើម្បីកសាងស្នាក់ការ ប្រើប្រាស់លើដីនោះជាបណ្តោះអាសន្ន ។ បុរសជាប្តី ឈ្មោះ តាំង អៀង អាយុ៤៣ឆ្នាំ ស្រ្តីជាភរិយា ឈ្មោះ ជា មួយ ស្នាក់នៅបច្ចុប្បន្ន នៅភូមិមណ្ឌល៣ សង្កាត់ស្លក្រាម ក្រុង-ខេត្តសៀមរាប ។

លិខិតកាន់កាប់ដីដែលជាភស្តុតាងនោះ ត្រូវបានបញ្ជាក់ដោយលោក ហ៊ុយ ហួន ជាចៅសង្កាត់ គោកចក ចុះថ្ងៃទី០៥ ខែកុម្ភៈ ឆ្នាំ២០១៥ ដែលអះអាងថា ដីនោះ ជាដីរបស់ឯកឧត្តម សៀង ណាំ អ្នកតំណាងរាស្រ្តមណ្ឌលសៀមរាប ត្រូវបានប្រគល់ឲ្យ ឯកឧត្តម ដុម ហាក់ នៅឆ្នាំ២០០៧ ទំហំដីរួម ៦១២៨ ម៉ែត្រក្រឡា ចាត់ចែងឲ្យទៅអ្នកណាសម្រេចលើឯកឧត្តម ដុម ហាក់ ! ហើយ ឯកឧត្តមបាន ប្រគល់ឲ្យប្រជាពលរដ្ឋចំនួន៥គ្រួសារ និងទីតាំងមណ្ឌល៤ ស៊ើបការ១(មួយ)ទៀតមានទំហំ (១៧២៨ម៉ែត្រការ៉េ)ទាំងអស់៦គ្រួសារ ! មួយចំណែកដែលឲ្យទៅ ឈ្មោះ តាំង អៀង ក្នុងទំហំ ២០ម៉ គុណនឹង ៣០ម៉ ស្មើនឹង ៦០០ ម៉ែត្រក្រឡា ។

លិខិតមួយច្បាប់ទៀត ចុះថ្ងៃទី១៧ ខែកុម្ភៈ ឆ្នាំ២០១៥ ដើម្បីសុំទីតាំងដីនោះ មកវិញ ក្នុងលិខិត នោះ ភាគីទាំងពីរបានព្រមព្រៀងគ្នា ដោយឲ្យភាគីម្ចាស់ដី ( លោក តាំង អៀង ) ព្រមប្រគល់លុយចំនួន ៣៥០០ដុល្លា ជាតម្លៃសំណងអាគារស្នាក់ការ ដែលបានសាងសង់លើដីនោះ ។ ភាគីជាអ្នកទទួល គឺលោកវរសេនីយ៏ត្រី តាន់ ហ៊ុយហួត ដោយមានចុះហត្ថលេខា ( បានឃើញ និង ឯកភាព ) ដោយលោកវរសេនីយ៍ឯក ប្រាក់ ហឿន អតីតនាយមណ្ឌល ៤ ។

លុះដល់ថ្ងៃទី ២៥ ខែ កុម្ភៈ ឆ្នាំ២០១៥ លោក តាំង អៀង បានចូលធ្វើរបងដីរបស់ខ្លួនរហូតរួចរាល់ ដោយសារមានការខ្វះខាត ពួកគាត់បានសម្រាកមួយរយៈសិន រហូតដល់ថ្ងៃទី០៧ ខែតុលា ឆ្នាំ២០១៥
ភាគីដែលជាម្ចាស់ដី បានចូលទៅរៀបចំទីតាំងដីដើម្បីស្នាក់នៅ បែជាលោក គុយ សុវត្ថិ មេមណ្ឌល៤ ឡើងថ្មី មិនព្រមឲ្យដីទៅម្ចាស់គេវិញ ! ហើយនិយាយថា ទៅសុំឯកឧត្តម កែវ មាស នាយការិយាល័យទី២ កងទ័ពជើងគោកទៅ ។
ឯកឧត្តម កែវ មាស បានបំភ្លឺតាមទូរស័ព្ទថា ដីមណ្ឌល៤សព្វថ្ងៃជាដី បានមកពីការដោះដូដីមួយ កន្លែងដែលមានទំហំ ២ ហិចតា នៅបន្ទាយស្រី ស្រុកបន្ទាយស្រី នោះទេ ! រីឯលោក តាំង អៀង និង ប្រពន្ធគាត់ មិនដឹងនៅឯណានោះឡើយ ! បញ្ហានេះកើតឡើងដោយសា ឯកឧត្តម ដុម ហាក់ អនុរដ្ឋ លេខាធិការក្រសួងការពារជាតិបាន ឃុបឃិតគ្នាជាមួយលោកវរៈសេនីយ៍ឯក ប្រាក់ ហឿន មេមណ្ឌល៤ចាស់ និងលោក តាន់ ហ៊ុយហួត មេស្នាក់ការ ព្រមទាំងលោកមេឃុំនោះទេ ! ។

លោកវរៈសេនីយ៍ឯក ប្រាក់ ហឿន មេមណ្ឌល៤ចាស់ បានបញ្ជាក់ថា នៅឆ្នាំ២០០៧ ឯកឧត្តម ដុម ហាក់ បានប្រគល់ដីមានទំហំ ១៧២៨ ម៉ែត្រការ៉េ រីឯដី ២០គុណនិង៣០របស់លោក តាំង អៀង និង ប្រពន្ធគាត់ ខាងមណ្ឌល៤បានខ្ចីសង់អាគារសម្រាប់ដាក់សម្ភារៈពិតមែន ។

ជុំវិញបញ្ហាខាងលើនេះ ឯកឧត្តម ដុម ហាក់ បានបញ្ជាក់តាមទូរសព្ទ័នៅចុងសប្តាហ៍នេះថា ដំបូងឡើយជាដីរបស់ឯកឧត្តមអ្នកឧកញា សៀង ណាំ តំណាងរាស្រ្តមណ្ឌលខេត្តសៀមរាប បានប្រគល់ ឲ្យលោក ក្នុងនោះមានអាគារ ៣(បី) ខ្នងទៀតផង ។ ដោយមើលឃើញ ទាហានមណ្ឌល៤ ផ្នែកស៊ើប ការមួយនេះ មិនមានទីតាំងសម្រាប់ធ្វើការច្បាស់លាស់ ក៍បានប្រគល់ដីមួយនេះ ឲ្យទៅលោក ប្រាក់ ហឿន មេមណ្ឌល៤មុន មិនមែនឲ្យដីទាំងអស់នោះទេ ! ក្នុងនោះឯកឧត្តមក៍បានប្រគល់ដីមានទំហំ ២០ គុណ និង ៣០ ម៉ ឲ្យទៅលោក តាំង អៀង និងប្រពន្ធគាត់ ព្រមទាំងអ្នកផ្សេងៗទៀតចាប់តាំងពីឆ្នាំ ២០០៧មកម្លេះ ! នៅឆ្នាំតែមួយដូចគ្នា ពីព្រោះប្រជាពលរដ្ឋទាំងនោះជាអ្នកក្រីក្រ ។ ឯកឧត្តមបានបញ្ជាក់ ដីនេះគឺជាការ សម្បទាននោះទេ ! មិនមែនលក់ ដូនោះ ឡើយ ហើយអាជ្ញាធរ អប្សរា បានប្រកាសទទួលស្គាល់ពួកគេគ្រប់ៗគ្នាទៀតផង ។

ភាគីទាំង២ រងគ្រោះដូចគ្នា បញ្ហា នៅលើ ឯកឧត្តម( ដុម ហាក់ ) ៕
ប៊ុនធឿន (សៀមរាប)