ខេត្តកោះកុង ៖ នៅថ្ងៃទី១ ខែកក្កដា ឆ្នាំ២០២៥នេះ ក្នុងយុទ្ធនាការនិយាយថាទេចំពោះព័ត៌មានក្លែងក្លាយ លោកស្រី មិថុនា ភូថង អភិបាលខេត្តកោះកុង បានស្នើដល់គ្រប់ភាគីពាក់ព័ន្ធទាំងអស់នៅមូលដ្ឋានខេត្ត គប្បីចូលរួមបង្កើនការយល់ដឹងឱ្យកាន់តែច្រើន និងទប់ស្កាត់ប្រឆាំងគ្រប់ព័ត៌មានក្លែងក្លាយដែលកើតមាន។
ក្នុងយុទ្ធនាការនិយាយថាទេចំពោះព័ត៌មានក្លែងក្លាយ រួមមានកងកម្លាំងប្រដាប់អាវុធ រដ្ឋបាលក្រុងស្រុក ពលរដ្ឋ និងយុវជនជិត៤០០នាក់ចូលរួម។
លោកស្រីអភិបាលខេត្ត សង្កត់ធ្ងន់ថា ការផ្សព្វផ្សាយព័ត៌មានមិនពិត ដោយប្រើប្រាស់ប្រព័ន្ធឌីជីថលថ្មីបានបង្កើតឲ្យមានការផ្ទុះឡើងនូវអំពើហិង្សា ការស្អប់ខ្ពើម ការរើសអើង ការមាក់ងាយ ដែលធ្វើឱ្យមានផលប៉ះពាល់ទៅដល់ ផ្នែកសន្តិសុខ សណ្តាប់ធ្នាប់ សង្គម សេដ្ឋកិច្ច នយោបាយ និងប៉ះពាល់ដល់ទំនាក់ទំនងសង្គម។
លោកស្រី មិថុនា ភូថង មើលឃើញថា នៅរយៈពេលចុងក្រោយនេះ នៅលើពិភពលោកបាននិងកំពុងប្រឈមនឹងបញ្ហាភូមិសាស្ត្រនយោបាយ បញ្ហាភូមិសាស្ត្រសេដ្ឋកិច្ច ទន្ទឹមនេះក៏ត្រូវប្រឈមមុខចំពោះការបញ្ចេញនូវព័ត៌មានក្លែងក្លាយដែលប៉ះពាល់ដល់កិច្ចប្រឹងប្រែងការពារសន្តិភាព និងស្ថេរភាពពិភពលោកផងដែរ។ លើសពីនេះទៅទៀត បញ្ញាសិប្បនិមិត្ត(AI) ត្រូវបានគេយកទៅប្រើប្រាស់បង្កើតនូវព័ត៍មានដែលមានចរឹកបំភាន់ និងបំពុលសង្គម ព្រមទាំងងាយស្រួលបោកប្រាស់ប្រជាពលរដ្ឋ ដែលមិនសូវចេះប្រើប្រាស់បច្ចេកវិទ្យាបែបទំនើប ឬយើងហៅថា «អ្នកអក្ខរកម្មព័ត៌មាន»។
ក្នុងនាមថ្នាក់ដឹកនាំរដ្ឋបាលខេត្ត លោកស្រី មិថុនា ភូថង ក៏សូមអំពាវនាវ ដល់អ្នកបង្កើតមាតិកា អ្នកសារព័ត៌មាន ពិសេសក្រុម MMO (Make Money Online) កុំព្រោះតែប្រយោជន៍ខ្លួន កុំព្រោះតែលុយ បង្កើតនូវព័ត៌មានក្លែងក្លាយដើម្បីបានប្រយោជន៍ពីការផ្សាយនោះ ធ្វើឱ្យប្រាស់ចាកពីក្រមសីលធម៌ និងវិជ្ជាជីវៈរបស់ខ្លួន និងសូមស្នើឱ្យអ្នកសារព័ត៌មាន អ្នកបង្កើតមាតិកាសង្គម ប្រកាន់ខ្ជាប់នូវសីលធម៌វិជ្ជាជីវៈឱ្យបានល្អ គោរពនូវតម្លៃសង្គម កិត្តិយសជាតិ និងសីលធម៌។
ទន្ទឹមនោះ លោកស្រីអភិបាលខេត្ត ថ្លែងអំណរគុណ ចំពោះក្រុមការងារអ្នកនាំពាក្យរបស់រដ្ឋបាលខេត្តកោះកុង ក្រុមការងារព័ត៌មានវិទ្យារដ្ឋបាលខេត្ត ក្រុង ស្រុក និងតាមបណ្តាមន្ទីរអង្គភាពជុំវិញខេត្ត និងអ្នកសារព័ត៌មានក្នុងខេត្តទាំងអស់ ដែលបានបំពេញតួនាទីភារកិច្ចរបស់ខ្លួនបានយ៉ាងល្អប្រសើរ ដែលឆ្លើយតបបានទាន់ពេលវេលានៅពេលដែលទទួលបាននូវសំនួរ ចម្ងល់ សំណូមនានារបស់ប្រជាពលរដ្ឋដែលបានលើកឡើងនៅក្នុង ផេកហ្វេសបុក របស់រដ្ឋបាលខេត្តកោះកុង ឬផេកហ្វេសបុករបស់លោកស្រីផ្ទាល់។
បន្ថែមលើនេះទៀត លោកស្រីអភិបាលខេត្តកោះកុង កោតសរសើរ ចំពោះអ្នកសារព័ត៌មាន និងអ្នកមានឥទ្ធិពលក្នុងបណ្ដាញសង្គម ដែលបានផលិតមាតិកាផ្សព្វផ្សាយ អំពីសមិទ្ធផលនានាដែលរដ្ឋបាលខេត្តសម្រេចបាននាពេលកន្លងមក និងសក្តានុពលនៃតំបន់ទេសចរណ៍នានាក្នុងខេត្ត និងសូមលើកទឹកចិត្តដល់អ្នកសារព័ត៌មាន និងអ្នកផលិតមាតិកាផ្សព្វផ្សាយក្នុងបណ្តាញសង្គមទាំងអស់ បន្តផលិតមាតិកាផ្សព្វផ្សាយ អំពី សក្តានុពលសំខាន់ៗ នៃតំបន់ទេសចរណ៍ក្នុងខេត្តកោះកុង ឱ្យបានកាន់តែច្រើនបន្ថែមទៀត សម្រាប់ទាក់ទាញអ្នកទេសចរឱ្យមកលេងកម្សាន្តនៅតាមតំបន់ទេសចរណ៍នានាទូទាំងខេត្តកោះកុង និង ចូលរួមជាមួយរាជរដ្ឋាភិបាលក្នុងការគាំទ្រដល់គោលនយោបាយលើកកម្ពស់វិស័យទេសចរណ៍ និង ចូលរួមលើកកម្ពស់ជីវភាពប្រជាពលរដ្ឋនៅក្នុងមូលដ្ឋានផងដែរ។
ដោយឡែកលោក មុំ ម៉ាលិកា ប្រធានមន្ទីរព័ត៌មានខេត្តកោះកុង លើកឡើងថា យុទ្ធនាការនេះ នឹងត្រូវបានអនុវត្តន៍ទូទាំងប្រទេសកម្ពុជាក្នុងរយៈពេល១២ខែ គឺផ្តើមពីថ្ងៃទី១ ខែមេសា ឆ្នាំ២០២៥ ដល់ថ្ងៃទី៣១ ខែមីនា ឆ្នាំ២០២៦ ហើយចាំបាច់មានការចូលរួមពីគ្រប់ភាគីពាក់ព័ន្ធទាំងអស់ ក្នុងគោលបំណងដើម្បីលើកកម្ពស់យល់ដឹងជាសាធារណៈអំពីគ្រោះថ្នាក់ និងផលវិបាកនៃព័ត៌មានក្លែងក្លាយ។
លោកប្រធានមន្ទីរព័ត៌មានខេត្ត បានបន្ថែមទៀតថា ការបញ្រ្ចបការយល់ដឹងដល់ប្រជាពលរដ្ឋឋក្នុងសហគមន៍ និងពង្រឹងអក្ខរកម្មព័ត៌មាន និងប្រព័ន្ធផ្សព្វផ្សាយជាកត្តាដ៏សំខាន់មួយ ដើម្បីផ្លាស់ប្តូរឥរិយាបទរបស់ពលរដ្ឋដែលជាអ្នកប្រើប្រាស់បណ្តាញទំនាក់ទំនងសង្គម និងប្រព័ន្ធផ្សព្វផ្សាយទំនើបឱ្យមកចូលរួមទប់ស្កាត់ការរីកសាយភាពនូវព័ត៌មានក្លែងក្លាយ។ ក្នុងបរិបទនេះ លោកប្រធានមន្ទីរព័ត៌មានខេត្ត ជឿជាក់ថា តាមរយៈយុទ្ធនាការនេះ នឹងផ្តល់ប្រយោជន៍យ៉ាងសំខាន់ដល់អ្នកពាក់ព័ន្ធទាំងឡាយ ហើយចូលរួមតាមដានទប់ស្កាត់ព័ត៌មានក្លែងក្លាយប្រកបដោយការទទួលខុសត្រូវខ្ពស់ ផ្សព្វផ្សាយព័ត៌មានដែលពិតប្រាកដ ចៀសវាងបំភ្លៃការនាំឱ្យមានទោសទណ្ឌប្រការណាមួយ៕
