ប្រជាពលរដ្ឋប្រុសស្រី ពិសេសយុវជន ប្រមាណ១៥ម៉ឺននាក់ នៅព្រឹកថ្ងៃទី១៨ មិថុនានេះ បានដើរដោយថ្មើរជើងពីកោះពេជ្រទៅវិមានឯករាជ្យជាមួយការស្រែកច្រៀងយ៉ាងកងរំពងនូវបទ «ខ្ញុំស្រឡាញ់ទឹកដីខ្មែរ» ហើយដៃមានលើកទង់ជាតិប្រាសាទកំពូលប្រាំ។
ជាមួយទឹកមុខរីករាយ ទោះជាស្ថិតក្រោមកំដៅថ្ងៃ ដំណើរដោយថ្មើរជើងដែលពេញពាសផ្លូវនេះ បានបង្ហាញស្មារតីសាមគ្គីរួមគ្នាជាធ្លុងមួយ គាំទ្រដល់រាជរដ្ឋាភិបាល និងកងកម្លាំងនៅជួរមុខកម្ពុជា ។ បង្ហាញពីការគាំទ្រសុចរិតភាព និងភាពស្របច្បាប់របស់កម្ពុជាផ្អែកលើច្បាប់ និង បទដ្ឋានគតិយុត្តផ្សេងៗ ។ បង្ហាញការគាំទ្រចំពោះរាជរដ្ឋាភិបាល ទាំងផ្នែកការទូត ផ្នែកការពារជាតិ ផ្នែកច្បាប់ និងខឿនការពារជាតិប្រជាជន និងដើម្បីបង្ហាញពីការគាំទ្រចំពោះការសម្រេចចិត្តរបស់រាជរដ្ឋាភិបាលកម្ពុជាក្នុងការនាំយកជម្លោះព្រំដែននៅតំបន់មុំ៣ ប្រាសាទតាមាន់តូច ប្រាសាទតាមាន់ធំ និងប្រាសាទតាក្របីទៅតុលាការយុត្តិធម៌អន្តរជាតិ ។
សូមបញ្ជាក់ថា កម្មវិធីដំណើរថ្មើរជើងពីកោះពេជ្រទៅវិមានឯករាជ្យនេះ រៀបចំឡើងភ្លាមៗតែប៉ុន្មានថ្ងៃមុនតែប៉ុណ្ណោះ ដោយក្រុមយុវជនមកពីសហភាពសហព័ន្ធយុវជនកម្ពុជា ប៉ុន្តែទទួលបានការចូលរួមពីមហាជនយ៉ាងច្រើន។កុះករ។
ឯកឧត្តមឧបនាយករដ្ឋមន្ត្រី ហ៊ុន ម៉ានី និងជាប្រធានសហភាពសហព័ន្ធយុវជនកម្ពុជា នៅក្នុងពិធីនេះ បានលើកឡើងថា ដំណើរថ្មើរជើងថ្ងៃនេះ មិនមែនជាកម្មវិធីរបស់ ស.ស.យ.ក. ទៀតនោះទេ ប៉ុន្តែជាកម្មវិធីរបស់ បងប្អូនប្រជាពលរដ្ឋខ្មែរយើងម្នាក់ៗទាំងអស់គ្នា។ ការមកចូលរួមនេះសរបញ្ជាក់អំពីទឹកចិត្តម្នាក់ៗជាកូនខ្មែរដែលមានការគិតគូរយល់ពីសុខទុក្ខ មានការចូលរួមចំណែក ដែលចង់បង្ហាញអំពីឆន្ទៈ និងមោទនភាព ចង់បង្ហាញអំពីក្តីស្រឡាញ់ ចង់បង្ហាញអំពីការគាំទ្រ ចង់បង្ហាញអំពីការជឿជាក់លើព្រះរាជាណាចក្រកម្ពុជា ជឿជាក់លើព្រះមហាក្សត្រ ជឿជាក់លើសម្ដេចយាយ ជឿជាក់លើសម្ដេចតេជោជាពិសេសជឿជាក់លើសម្ដេចបវរធិបតីនាយករដ្ឋមន្ត្រីប្រមុខរាជរដ្ឋាភិបាលកម្ពុជា។
ឯកឧត្តមឧបនាយករដ្ឋមន្ត្រី ហ៊ុន ម៉ានី បានបញ្ជាក់ថាការជួបជុំរបស់យើងនៅ ថ្ងៃនេះ មិនមានបំណងបង្ហាញកម្លាំង រឺជាការគំរាមកំហែងដល់ អ្នកណាទេ ។ ប៉ុន្តែជាកម្មវិធីក្នុងលក្ខណៈជាមហាគ្រួសារខ្មែរបង្ហាញពីមនោសញ្ចេតនាជឿជាក់និងគាំទ្រលើរាជរដ្ឋាភិបាលកម្ពុជា។គាំទ្រទៅលើកងកម្លាំងប្រដាប់អាវុធរបស់យើង គាំទ្រទៅលើវិធានការដោះស្រាយការពារទឹកដីដោយសន្តិវិធី៕ប្រភពអាកាប៉េ
