នាយឧត្តមសេនីយ៍ គន់ គីម អគ្គមេបញ្ជាការរង និងជានាយសេនាធិការចម្រុះ នៃកងយោធពលខេមរភូមិន្ទ នាព្រឹកថ្ងៃទី១៩ ខែតុលានេះ បាននាំយកអាវរងារចំនួន ៦ ៣១២ អាវ ដែលជាអំណោយដ៏ថ្លៃថ្លា នៃ សម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ដើម្បីឧបត្ថម្ភជូនដល់កងទ័ព និង កងនគរបាលជាតិ ជួរមុខ ដែលកំពុងបំពេញភារកិច្ច នៅតាមបណ្តាខ្សែបន្ទាត់ព្រំដែនកម្ពុជា-ថៃ ទិសទី២ នៃយោធភូមិភាគទី៤ ។ ពិធីប្រគល់ជូនអាវរងារទាំងអស់នេះ បានរៀបចំឡើងនៅទីបញ្ជាការវរសេនាតូចលេខ៤១៣ ចំណុះកងពលតូចថ្មើរ ជើងលេខ៤១ ។
នាយឧត្តមសេនីយ៍ គន់ គីម បានថ្លែងថា ការយកចិត្តទុកដាក់ចំពោះសុខទុក្ខ នៃ កងកម្លាំងប្រដាប់អាវុធ ជួរមុខ គឺជាប្រពៃណី និងជាតម្លៃគុណធម៌ដ៏ជ្រាលជ្រៅបំផុត នៃសម្តេចតេជោ ប្រមុខរាជរដ្ឋាភិបាល និង សម្តេចកិត្តិព្រឹទ្ធបណ្ឌិត ប្រធានសមាគមជាតិកាកបាទក្រហមកម្ពុជា ។ ឯកឧត្តមបានបញ្ជាក់ថា ជារៀងរាល់ រដូវកាល ដែលអាចមានបញ្ហា ប្រឈមចំពោះសុខភាព ដូចជារដូវវស្សាជិតកន្លងផុតទៅនេះ សម្តេចទាំងពីរបានផ្ញើ ជូនកងទ័ព កងនគរបាលជួរមុខ នូវអាវភ្លៀង ភួយ មុង ជាដើម ។ ជាក់ស្តែងពេលនេះ រដូវធ្លាក់ខ្យល់ត្រជាក់ពីទិស ខាងជើងជិតឈានចូលមកដល់ សម្តេចទាំងពីរ បានត្រៀមលក្ខណៈរួចជាស្រេច ផ្ញើជូនអាវរងារសម្រាប់ បងប្អូន កងទ័ព កងនគរបាលជាតិការពារព្រំដែនបន្តទៀត ។
នាយឧត្តមសេនីយ៍ គន់ គីម បានលើកឡើងថា តាមរយៈនៃអំណោយទាំងនេះ គឺពិតជាសក្ខីភាព នៃការ ឆ្លុះបញ្ចាំងថា សុខទុក្ខកងទ័ព កងនគរបាលជួរមុខ គឺជាសុខទុក្ខ របស់សម្តេចតេជោប្រមុខរាជរដ្ឋាភិបាល និង សម្តេចកិត្តិព្រឹទ្ធបណ្ឌិត ហើយការរួមសុខរួមទុក្ខនេះ គឺវាប្រាកដឡើងគ្រប់ពេលវេលា គ្រប់កាលៈទេសៈទាំងអស់ ។
ឧត្តមសេនីយ៍ទោ នាង ឃីម មេបញ្ជាការកងពលតូចថ្មើរជើងលេខ៤១ តាងនាមយោធិន និង ពលនគរបាល ជួរមុខទាំងអស់ បានសម្តែងនូវកតញ្ញូតាធម៌ដ៏ជ្រាលជ្រៅបំផុត ចំពោះការគិតគូរដ៏ខ្ពង់ខ្ពស់បំផុត នៃសម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ៕
ប៊ុនធឿន ( សៀមរាប )
